Yes, Bible give us better proof to show say God dey. Bible de encourage us to get faith for God, this one no mean say we go just de believe anything wey people for religion talk, but we need to use our “sense” and wetin we know to check if wetin e talk na true. (Romans 12:1; 1 John 5:20, footnote) Make we see some examples wey Bible give to prove say God really dey:

•   Life for this earth and the way things arrange for this earth and the sky de prove say God dey. Bible talk say: “True-true, every house wey we see, na person build-am, but na God make everything.” (Hebrews 3:4) Na true say this example for Bible dey simple, but plenty people wey go school well de see-am as better proof to show say God dey. a

•   Even if people get everything wey they need, e still de hungry them to want know why we dey this life. This one na wetin Bible talk say we really “need,” and part of this one na to want know and worship God. (Matthew 5:3; Revelation 4:11) This need to know God na proof say God dey and e still de show say God love us and e want make we know who e be.—Matthew 4:4

•   Bible talk about some things say they go happen plenty years before they happen and e happen just as Bible talk. The way things wey Bible talk happen na strong proof to show say no be ordinary person make-am.—2 Peter 1:21.

•   People wey write Bible know some things about science wey people no know that time. For example, that time plenty people believe say this earth stand ontop animals like elephant, boar, or ox. But, Bible talk say God “no use anything hold the earth.” (Job 26:7) Bible still talk say the earth dey “round” like ball. (Isaiah 40:22, footnote; Douay Version) Plenty people de feel say the only way wey they fit explain why this Bible writers talk wetin they talk, na because wetin they write na from God.

•   Bible answer plenty hard questions, the kind of questions wey if they no answer-am well e fit make person no believe say God dey. For example: If God love us and get power, why plenty people de suffer and bad things de happen for this world? Why people de use religion to do bad instead of to do good?—Titus 1:16.