Natawo ako ha Ciudad Obregón ha norte han Mexico, ngan ako an ikalima ha siyam nga anak. Naukoy kami ha gawas han sentro han syudad, diin may gutiay nga uma hi Tatay. Maopay gud ukyan ito nga lugar, ngan an amon pamilya urosa ngan malipayon. Makasurubo kay han singko anyos pa la ako, naruba an amon uma tungod han bagyo ngan binalhin kami ha iba nga bungto.

 Nagtikang pagdaku an kita ni Tatay, pero nagin parainom liwat hiya. Nakaapekto ito ha ira pag-asawa ngan ha amon nga mga anak. Nagtikang kami pagsigarilyo, ngan ginkakawat namon ito tikang kan Tatay. Han sais anyos pa la ako, nahubog na ako. Waray pag-iha, nagbulag an akon mga kag-anak ngan nagtikagrabe an akon mga bisyo.

 Igin-upod kami ni Nanay han nag-asawa hiya hin iba nga lalaki. Diri niya gintatagan hi Nanay hin kwarta, ngan diri eksakto ha amon an kita ni Nanay. Salit nagtrabaho kami nga magburugto kon ano la an amon kaya, pero eksakto gud la an amon kita ha amon mga panginahanglan. Naglilimpyo ako hin sapatos ngan nagbabaligya hin tinapay, mga dyaryo, chewing gum, ngan iba pa. Naglinibot-libot liwat ako ha syudad basi mamiling hin pagkaon ha basurahan han mga riko.

 Han dyes anyos ako, may tawo nga nagsagda ha akon nga magtrabaho ha iya ha basurahan han syudad. Ginkarawat ko ito, ngan waray na ako umiskwela, ngan binaya ako ha balay. Waray mag-usa ka dolyar an bayad niya ha akon ha kada adlaw ngan gintatagan niya ako hin pagkaon nga nakuha ha basurahan. Inukoy ako ha payag nga tikang ha basura an mga materyales. An mga tawo ha akon palibot nagyayakan hin maglaw-ay ngan nagkikinabuhi hin imoral. Damu an drug addict ngan parainom. Ito an pinakamaraot nga parte han akon kinabuhi, ngan nagtatangis ako kada gab-i, nangungurog tungod ha kahadlok. Tungod kay pobre ako ngan kulang hin edukasyon, naaawod gud ako. Nag-ukoy ako ha tambakan han basura hin mga tulo ka tuig tubtob nga binalhin ako ha lain nga estado ha Mexico. Didto, nagtrabaho ako ha uma, nangunguha hin mga bukad ngan gapas, nagtitirok hin mga tubo, ngan nag-aani hin mga patatas.

 Paglabay hin upat ka tuig, binalik ako ngadto ha Ciudad Obregón. Ginpaukoy ako han akon dadâ ha ira balay, ngan usa hiya nga albularyo. Nagkaada ako hin magraot nga mga inop, ngan nadepres gud ako salit naghunahuna ako nga mag-unay. Usa ka gab-i, nag-ampo ako ha Dios: “Ginoo, kon buhi ka gud man, karuyag ko ikaw makilala, ngan mag-aalagad ako ha imo ha kadayonan. Kon may totoo gud man nga relihiyon, karuyag ko ito mahibaroan.”

 Tikang pa hadto, interesado na ako mahibaro mahitungod ha Dios. Bisan han bata pa ako, kinadto na ako ha damu nga singbahan han iba-iba nga relihiyon, pero waray ako makontento hito ngatanan. Diri damu an ira ginsisiring mahitungod ha Biblia o waray bisan usa ha ira an binulig ha akon nga makilala an Dios. An iba, sobra nga naghahatag hin importansya ha kwarta ngan ha iba naman, an ira mga parasingba mga imoral.

 Han 19 anyos ako, ginsumatan ako han akon bayaw nga iginpakita ha iya han mga Saksi ni Jehova an ginsisiring han Biblia mahitungod ha paggamit han mga imahen. Ginbasa niya ha akon an Exodo 20:4, 5. Nasiring ito nga diri kita angay maghimo hin inukit nga mga imahen. An bersikulo 5 nasiring: “Ayaw pagyukbo ha ira ngan ayaw liwat kadani ha pag-alagad ha ira, kay ako, hi Jehova nga imo Dios, usa nga Dios nga nagsusugo nga ihatag ha akon an eksklusibo nga debosyon.” Katapos, ginpakianhan ako han akon bayaw, “Kon an Dios nagamit hin mga imahen ha paghimo hin mga milagro o kon karuyag niya nga gumamit kita hito ha pagsingba ha iya, kay ano nga igdidiri niya ito?” Nainteres ako hito. Katapos, nagkaada kami hin mga pag-istorya mahitungod ha mga topiko ha Biblia. Naruyagan ko gud ito nga mga pag-istorya salit diri ko napapansin an paglabay han oras.

 Ha urhi, igin-upod niya ako ha katirok han mga Saksi ni Jehova. Naimpres gud ako ha akon nakita ngan nabatian didto. Bisan an kabataan nakikigbahin ha programa, nagyayakan hin maopay ha stage! Naghunahuna ako, ‘Maopay gud nga edukasyon an nakakarawat han mga tawo dinhi!’ Bisan kon hilaba an akon buhok ngan diri maopay an akon pamostura, gin-abiabi gud ako han mga Saksi. Gin-imbitar pa ngani ako han usa nga pamilya nga mangiklop kaupod nira katapos han katirok!

 Ha akon pag-aram han Biblia ha mga Saksi, nahibaroan ko nga hi Jehova nga Dios mahigugmaon nga Amay nga interesado gud ha aton anoman an aton kahimtang ha pinansyal, kahimtang ha sosiedad, lahi, o edukasyon. Diri gud hiya nagpapaurog. (Buhat 10:34, 35) Nakilala ko na gihapon an Dios. Ngan diri ko na inaabat nga may kulang ha akon.

 Nag-opay gud an akon kinabuhi! Waray na ako magsigarilyo, mag-ininom, ngan magyakan hin maglaw-ay nga mga pulong. Nawara an kasina nga akon inabat tikang han bata pa ako, sugad man an akon magraot nga mga inop. Ngan nalamposan ko an pag-abat hin kawaray-pulos, nga resulta han mga kakurian nga akon gin-agian han bata pa ako ngan han akon kakulang hin edukasyon.

 May-ada ako maopay gud nga asawa nga nahigugma kan Jehova ngan daku gud hiya nga bulig ha akon. Yana, nag-aalagad ako sugad nga nagbibiyahe nga paramangno han mga Saksi ni Jehova, nga nabisita ha mga kongregasyon basi magdasig ngan magtutdo ha akon kabugtoan ha espirituwal. Tungod han bulig han Biblia ngan han maopay gud nga edukasyon nga iginhahatag ha aton han Dios, diri ko na iginkakaawod an akon kalugaringon.