An mga tawo ha bug-os nga kalibotan naabat nga nag-uusahan ngan baga hin diri hira mahimo magin duok nga sangkay han iba. An pipira nga eksperto ha kahimsog natoo nga an pagbulig ha iba usa nga paagi basi maatohan an sugad nga mga pag-abat.

•   “An pagbulig ha mga nanginginahanglan makakahatag hin katuyoan ha aton kinabuhi ngan makakabulig nga maatohan an mga pag-abat nga nag-uusahan o hin pagin bulag ha kadam-an.”—U.S. National Institutes of Health.

 An Biblia naghahatag hin praktikal nga sagdon kon ano an puydi naton buhaton basi buligan an iba. An pag-aplikar hito makakabulig ha aton nga maatohan an pag-abat hin pag-inusahan.

 Magin mahinatagon. Pamiling hin mga oportunidad nga makaupod an iba, labi na ha personal. Magin andam paghatag ha iba kon ano an may-ada ka. Kon buhaton mo ito, magigin mapasalamaton gud hira, ngan magriresulta ito hin pagkamagsangkay.

•   Prinsipyo ha Biblia: “Batasana an paghatag, ngan an mga tawo mahatag ha iyo.”—Lucas 6:38.

 Buligi an iba. Pamiling hin mga paagi nga buligan an mga tawo nga nakakaeksperyensya hin magkuri nga sitwasyon. Mahimo ito mag-upod han mahigugmaon nga pagpamati ha ira o paghatag hin praktikal nga bulig nga magpapagaan han ira mga buruhaton.

•   Prinsipyo ha Biblia: “An usa nga sangkay, sangkay ha ngatanan nga takna.”—Darahunon [Proberbios] 17:17, An Baraan nga Biblia.

 Para ha dugang nga impormasyon kon paonan-o mo matitipigan an maopay nga relasyon ha iba, kitaa an artikulo nga “Relasyon ha Pamilya Ngan Kasangkayan.”