MGA napulo ka tuig na an naglabay, an mag-asawa nga hira Gregorio ngan Marilou, nga hito nga panahon sobra 30 anyos an edad, nagpapayunir ha Manila ngan bug-os-panahon liwat nga nagtatrabaho. Diri ito masayon, pero nagmalampuson hira. Katapos, hi Marilou nagin manidyer ha bangko nga iya gintatrabahoan. “Komportable hinduro an amon kinabuhi tungod han amon mag-opay nga trabaho,” siring niya. Ha pagkamatuod, maopay gud an ira kahimtang ha pinansyal salit nagdesisyon hira nga magpatukod han ira ginhihingyap nga balay ha maopay gud nga lokasyon mga 19 ka kilometro ha este han Manila. Nagkontrata hira hin kompanya nga magtutukod hito ngan nakigsabot nga babaydan ito kada bulan ha sulod hin napulo ka tuig.

Hi Marilou nagsiring: “Daku hinduro nga panahon ngan kusog an ginkikinahanglan han akon bag-o nga trabaho salit naibanan an akon kadasig ha espirituwal nga mga buruhaton. Inabat ako nga ginkakawatan ko hi Jehova.” Nagsiring liwat hiya: “Diri ko na naihahatag kan Jehova an panahon nga akon igindedikar ha pag-alagad ha iya.” Nasubo hira Gregorio ngan Marilou hito nga kahimtang, salit usa ka adlaw  nag-istorya hira mahitungod han paagi han ira paggamit han ira kinabuhi. Hi Gregorio nagsiring: “Karuyag namon maghimo hin pagbag-o pero diri kami maaram kon ano gud an amon hihimoon. Amon gin-istoryahan kon paonan-o mas magagamit an amon kinabuhi ha pag-alagad kan Jehova, labi na kay waray kami anak. Nag-ampo kami kan Jehova ha pangaro hin giya.”

Hito nga panahon, nakapamati hira hin pipira nga pahayag mahitungod han pag-alagad ha lugar nga mas daku an panginahanglan hin mga magwarali han Ginhadian. “Inabat namon nga ini nga mga pahayag an baton ni Jehova ha amon mga pag-ampo,” siring ni Gregorio. Nag-ampo hira ha pangaro hin dugang nga pagtoo basi magkaada kaisog ha paghimo hin husto nga mga desisyon. Usa nga daku nga ulang amo an ira ginpapatukod nga balay. Nakabayad na hira hin kantidad nga para ha tulo ka tuig. Ano an ira bubuhaton? Hi Marilou nagsiring: “Kon ikakansela namon an kontrata, makakarag an ngatanan nga amon iginbayad, ngan daku na adto nga kantidad. Kondi ginhunahuna namon nga hito nga kahimtang kinahanglan kami magpili kon uunahon ba namon an kaburut-on ni Jehova o an amon kalugaringon nga mga hingyap.” Ira ginhunahuna an ginsiring ni apostol Pablo mahitungod han ‘pagsalikway han ngatanan nga butang,’ salit ira ginkansela an pagpatukod han ira balay, inundang ha ira trabaho, iginbaligya an kadam-an han ira mga panag-iya, ngan binalhin ha hirayo nga baryo ha isla han Palawan, mga 480 ka kilometro ha sur tikang ha Manila.—Fil. 3:8.

Antes bumalhin hira Gregorio ngan Marilou, nangalimbasog na hira nga mag-andam ha pagkinabuhi hin simple, kondi dida la nira nasantop kon ano gud kasimple an ira magigin bag-o nga pagkinabuhi han inabot na hira didto. “Diri gud kami makatoo hito,” siring ni Marilou. “Waray koryente ngan waray mga butang nga nakakahimo han kinabuhi nga mas komportable. Imbes nga gumamit hin rice cooker, kinahanglan kami magtiak hin isurungo ngan magharing para makagluto. Nahidlaw ako han pagpasyada ha mall, pagkaon ha mga restawran, ngan ha iba pa nga butang nga aadto ha syudad.” Bisan pa hito, pirme nira ginpapahinumdoman an ira kalugaringon kon kay ano nga binalhin hira, ngan waray pag-iha nahiara na hira. Hi Marilou nagsiring: “Yana nalilipay na ako pagkinita han makaruruyag nga palibot, pati na an mapawa nga mga bitoon ha gab-i. Labaw ha ngatanan, makalilipay makita an kalipay han mga tawo kon nagsasangyaw kami ha ira. Pinaagi ha pag-alagad dinhi, amon ‘hinbaroan an sekreto’ kon paonan-o magigin kontento.”—Fil. 4:12.

Hi Gregorio nagsiring: “Han inabot kami dinhi, upat la an Saksi. Nalipay gud hira han nagtikang ako paghatag hin pahayag publiko kada semana ngan ginduyogan ko han akon gitara an pagkanta hin mga Kingdom song.” Waray pa mag-usa ka tuig, nakita hini nga mag-asawa kon paonan-o iton gutiay nga grupo nagin mainuswagon nga kongregasyon nga may 24 nga magwarali. Hi Gregorio nagsiring: “Nababantad gud kami han gugma nga iginpapakita ha amon hini nga kongregasyon.” Yana, kon ira gindudumdom an unom ka tuig nga ira pag-alagad  hiton hirayo nga lugar, nasiring hira: “Waray kapariho an kalipay nga resulta han pakakita ha damu nga bag-ohan nga nagigin bahin han kongregasyon. Labaw kay ha kakan-o pa man, naabat kami nga mapulsanon an amon kinabuhi.”

Ha Pilipinas, haros 3,000 nga kabugtoan an binalhin ha mga lugar nga daku an panginahanglan hin mga magwarali han Ginhadian. Mga 500 ha ira an solo nga mga sister. Usa nga ehemplo hi Karen.

Hi Karen, nga mga 25 anyos na yana, nagdaku ha Baggao, Cagayan. Han tin-edyer hiya, agsob hiya maghunahuna nga pauswagon an iya ministeryo. Hiya nagsiring: “Tungod kay maaram ako nga halipot na la an panahon ngan kinahanglan makabati han mensahe han Ginhadian an ngatanan nga klase hin tawo, karuyag ko mag-alagad ha lugar diin mas daku an panginahanglan hin mga magsarangyaw.” Bisan kon gin-aghat hiya han pipira han iya kapamilya nga magkolehiyo imbes nga bumalhin ha interyor nga lugar basi magsangyaw, hi Karen nag-ampo kan Jehova ha pangaro hin giya. Nakiistorya liwat hiya ha mga nag-aalagad ha usa nga hirayo nga lugar. Han 18 anyos hiya, binalhin hiya ha interyor nga lugar nga mga 64 ka kilometro tikang ha ira bungto.

Sakop han teritoryo han gutiay nga kongregasyon diin nagboluntaryo hi Karen an kabukiran ha ligid han Baybayon han Pasipiko. Hi Karen nagsiring: “Basi la makaabot ha bag-o nga kongregasyon, tikang ha Baggao nagbabaktas kami hin tulo ka adlaw, nasagka ngan nalugsad ha kabukiran, ngan natabok ha mga salog hin sobra 30 ka beses.” Nagsiring liwat hiya: “Basi makadto an iba nga estudyante han Biblia, nagbabaktas ako hin unom ka oras, nahuron ha balay han usa nga estudyante, ngan pagkabuwas nagbabaktas na liwat hin unom ka oras tipauli.” Bawi ba an iya mga pangalimbasog? “May mga panahon nga maul-ol an akon mga bitiis, pero,” siring ni Karen nga nahiyom, “inabot hin 18 an akon gindudumarahan hin pag-aram ha Biblia. Akon ‘natilawan ngan nakita nga hi Jehova maopay’!”—Sal. 34:8.

Hi Sukhi usa nga solo nga sister nga sobra 40 anyos ngan naukoy ha Estados Unidos. Ano an nagpagios ha iya nga bumalhin ha Pilipinas? Han 2011 tinambong hiya ha usa nga sirkito nga asembleya diin may gin-interbyu nga mag-asawa. Ira gin-istorya nga ira iginbaligya an kadam-an han ira mga panag-iya ngan binalhin ha Mexico basi bumulig ha pagsangyaw nga buruhaton didto. “Tungod hito nga interbyu,” siring ni Sukhi, “nagtikang ako paghunahuna mahitungod han mga tumong nga waray ko mahunahuna hadto.” Han hinbaroan ni Sukhi, nga Indian an lahi, nga ginkikinahanglan an daku nga bulig ha pagsangyaw ha Punjabi nga mga tawo nga naukoy ha Pilipinas, nagdesisyon hiya nga bumalhin basi bumulig. Inatubang ba hiya hin mga ulang?

“An pagdesisyon kon hain han akon mga gamit an akon titipigan ngan hain an ibabaligya mas makuri kay han akon ginlalaoman,” siring ni Sukhi. “Sugad man, katapos han komportable nga pag-ukoy hin 13 ka tuig ha akon kalugaringon nga apartment, nakilungon ako ha  akon pamilya ngan diri sugad kakomportable an akon kinabuhi. Diri ito masayon, kondi maopay ito nga paagi ha pag-andam para ha simple nga pagkinabuhi.” Ano nga mga problema an iya naeksperyensyahan katapos niya bumalhin ngadto ha Pilipinas? “An kahadlok ha mga insekto ngan pag-abat hin kamingaw amo an pinakamakuri para ha akon. Nahibaro ako nga mas sumarig kan Jehova!” Bawi ba ito? Hi Sukhi nahiyom ngan nasiring: “Hi Jehova nagsiring ha aton, ‘Sarihi ako, kon diri ko ba kamo buboan hin bendisyon.’ Ini nga mga pulong nagigin tinuod gud ha akon ha kada panahon nga an tagbalay napakiana ha akon, ‘San-o ka mabalik? Damu pa an akon pakiana.’ Nalilipay ngan kontento gud ako nga makabulig ha mga tawo nga nagugutom ha espirituwal!” (Mal. 3:10) Hi Sukhi nasiring liwat: “Ha tinuod la, an pinakamakuri amo an pagdesisyon nga bumalhin. Katapos ko ito buhaton, makalilipay gud makita kon paonan-o iginpahamutang ni Jehova an ngatanan para ha akon.”

Hi Sime, usa nga inasaw-an nga brother nga hirani na mag-40 anyos, binaya ha Pilipinas basi karawaton an usa nga trabaho nga daku an sweldo ha usa nga nasud ha Middle East. Han nakadto hiya, nadasig hiya han usa nga paramangno han sirkito ngan han pahayag han usa nga membro han Nagmamando nga Lawas salit napagios hiya nga unahon hi Jehova ha iya kinabuhi. “Kondi an paghunahuna nga umundang ha akon trabaho nakapabaraka gud ha akon,” siring ni Sime. Bisan pa hito, inundang hiya ha iya trabaho ngan binalik ha Pilipinas. Yana, hi Sime ngan an iya asawa nga hi Haidee nag-aalagad ha Davao del Sur, ha sur nga bahin han nasud, nga nanginginahanglan hin mga magsarangyaw han Ginhadian basi makobrehan an haluag nga teritoryo. “Ha paghinumdom han naglabay,” siring ni Sime, “nagpapasalamat gud ako nga nalamposan ko an akon kahadlok nga mawad-an hin trabaho ngan gin-una ko hi Jehova. Waray na mas makalilipay kay han paghatag han imo gimaopayi kan Jehova!”

Han hira Ramilo ngan Juliet, usa nga mag-asawa nga payunir nga sobra 30 anyos an edad, nahibaro nga nanginginahanglan hin bulig an usa nga kongregasyon nga mga 30 ka kilometro la an kahirayo tikang ha ira, nagboluntaryo hira didto. Salit kada semana, maopay man o maraot an panahon, hira Ramilo ngan Juliet pipira ka beses nga nagbibiyahe sakay ha ira motorsiklo basi tumambong ha mga katirok ngan umupod ha pagsangyaw. Bisan kon makuri an pagbiyahe ha mabatse nga mga kalsada ngan ha mga hanging bridge, malipayon hira nga ira ginpauswag an ira ministeryo. Hi Ramilo nagsiring: “Onse nga pag-aram ha Biblia an gindudumara namon nga mag-asawa! An pag-alagad ha lugar nga mas daku an panginahanglan nag-uupod hin pagsakripisyo, pero kontento gud kami hito!”—1 Cor. 15:58.

Karuyag mo ba mahibaro hin dugang pa mahitungod han pag-alagad ha lugar nga mas daku an panginahanglan hin mga magwarali han Ginhadian ha iyo nasud o ha iba nga nasud? Kon amo, pakiistorya ha iyo paramangno han sirkito, ngan basaha an artikulo nga “Mahimo Ka ba ‘Kumadi ha Masedonia’?” ha Agosto 2011 nga gowa han An Aton Ministeryo ha Ginhadian.