An mga tawo mahimo magdiskriminar diri la hadton iba an nasyonalidad, lahi, tribo, o yinaknan kondi pati liwat hadton iba an relihiyon, sekso, o estado ha kinabuhi. An pipira naman may-ada negatibo nga panhunahuna ha iba tungod han ira edad, edukasyon, depekto ha panlawas, o hitsura. Pero diri nira nahuhunahuna nga diskriminasyon na ngay-an ito.

Puydi ka ba matapnan han diskriminasyon? Nakikita han kadam-an kon an usa nagdidiskriminar ha iba. Pero makuri naton ito makita ha aton kalugaringon. Ha tinuod la, kita tanan nakagpakita na hin diskriminasyon. Kon negatibo an paghunahuna han mga tawo ha usa nga partikular nga grupo katapos may nakilala hira nga tikang hito nga grupo, siring han propesor han sociology nga hi David Williams, “iba an ira magigin pagtratar hito nga tawo pero diri nira nasasabtan nga ito na ngay-an an ira ginbubuhat.”

Pananglitan, ha usa nga nasud ha Europa diin naukoy hi Jovica, may-ada usa nga gutiay nga tribo. “Naghunahuna ako nga waray maopay nga tawo hito nga tribo,” siring niya. “Pero waray ako maghunahuna nga nagdidiskriminar ako, kay nagtoo ako nga tinuod an akon nababatian mahitungod ha ira.”

Damu nga gobyerno an naghihimo hin balaud kontra ha diri patas nga pagtratar ha iba nga lahi ngan ha iba pa nga klase hin diskriminasyon. Bisan pa hito, nagpapadayon an diskriminasyon. Kay ano? Tungod kay an ginbubuhat la han usa an ginlilimitahan hito nga mga balaud. Diri hito kontrolado an hunahuna ngan kasingkasing, diin nagtitikang an diskriminasyon. Kon sugad, may paglaom pa ba nga madaog an diskriminasyon? Mawawara pa ba ito?