Nakab-ot ni Hulda an Iya Tumong
KON nakabisita ka ha gutiay nga isla han Sangir Besar ha Indonesia ha naglabay nga mga tuig, bangin nakita mo an aton tulo nga sister ha baybayon. Kilala hira ha isla tungod han ira pagsangyaw—ginbubuligan an mga tawo nga masabtan an Biblia. Pero hito nga higayon, may ginbubuhat hira nga kakaiba.
An isla han Sangir Besar ha norte han Indonesia
Siyahan, napakadto hira ha tubig basi magbiling hin dagku nga bato ngan gindadara ngadto ha baybay. An pipira nga bato pariho kadaku ha bola han soccer. Sunod, ito nga mga sister mangangalingkod ha kahoy nga bangkito ngan pupusakon an mga bato pinaagi hin mga martilyo tubtob nga magin mas gudtiay pa ito ha bonay han manok. Kahuman, ira ginbubutang an guti nga mga bato ha balde ngan gindadara nira ito tipasagka ngadto ha ira gin-uukyan. Katapos, ibubutang nira an mga bato ha dagku nga bag ngan igkakarga ha mga trak ngan gagamiton ito para ha konstruksyon han kalsada.
Hi Hulda nga nangunguha hin mga bato ha baybayon
An usa hito nga mga sister amo hi Hulda. Gintutugot han iya kahimtang nga buhaton ito hin mas agsob kay ha iba. Kasagaran nga gin-gagamit niya an iya kwarta nga nakukuha hini nga trabaho para ha adlaw-adlaw nga panginahanglan han iya pamilya. Pero yana may-ada pa hiya usa nga tumong. Karuyag niya magkaada hin tablet basi maka-access ha JW Library® nga app. Maaram hi Hulda nga an mga video ngan an iba pa nga sulod han app makakabulig ha iya ministeryo ngan ha iya pagsabot ha Biblia.
Hi Hulda nagtatrabaho hin duha ka oras kada aga ha sulod hin usa ngan tunga ka bulan, nagpupusak hin mga bato basi mapuno an likod han usa nga gutiay nga trak. Yana may-ada na hiya igo nga kwarta basi makapalit hin tablet.
Hi Hulda nga may kapot nga tablet
“Bisan kon makapoy ngan mapaul an pagpinusak hin mga bato,” hi Hulda nagsiring, “nakalimtan ko dayon an kapaul han nagamit ko ini nga bag-o nga tablet basi makabulig ha akon nga magin mas epektibo ha ministeryo ngan ha mas masayon nga pagpangandam ha Kristiano nga mga katirok.” Nagsiring liwat hiya nga an tablet nakabulig ha iya han bag-o pala an pandemya, tungod kay an ngatanan nga buruhaton ha kongregasyon ginhihimo pinaagi ha videoconference. Nalilipay gud kita para kan Hulda nga nakab-ot niya an iya tumong.
