SUMALA ha asoy ha Ebanghelyo ni Mateo, “Sinulod hi Jesus ha templo ngan ginpaiwas an ngatanan nga namamaligya ngan namamalit didto, ngan ginbalintong an mga lamesa han mga parabalyo hin kwarta ngan an mga lingkoran han mga parabaligya hin sarapati. Ngan iya ginsidngan hira: ‘Ini an iginsurat: “An akon balay tatawagon nga balay nga arampoan,” pero ginhihimo niyo ini nga lungib han mga kawatan.’”​—Mat. 21:12, 13.

An mga rekord han kasaysayan han mga Judio nagpapakita nga gin-abuso han mga negosyante ha templo an ira mga kustomer pinaagi ha paghatag hin presyo nga mahal hinduro. Pananglitan, mababasa ha Mishnah (Keritot 1:7) nga han siyahan nga siglo C.E. may higayon nga an presyo han duha nga sarapati nga ginagamit ha paghalad inabot hin usa ka denaryo nga bulawan. Katugbang ito hin mga 25 ka adlaw nga suhol han usa nga ordinaryo nga trabahador. An mga sarapati mahimo ighalad han mga pobre; pero bisan ito nga mga tamsi makuri na nira maakos. (Leb. 1:14; 5:7; 12:6-8) Nasina gud an rabbi nga hi Simeon ben Gamaliel hini nga nahitatabo ha templo salit iya gin-ibanan an kadamu han halad nga gin-oobligar ha mga Judio. Sugad nga resulta, inubos dayon an presyo han duha nga sarapati hin usa ka gatos ka pilo ha presyo hito hadto.

Uyon ha aton mga ginhisgotan, husto gud nga tawagon ni Jesus an mga negosyante ha templo sugad nga “mga kawatan” tungod han ira pan-abuso ngan kahakog.