Nabilngan Ko an Paglaom han Ginkikinahanglan Ko Gud Ito
Tigda nga inabat ko nga nakulob na ako ha tubig. Naniguro ako nga ihangad an akon ulo basi makaginhawa, pero diri ko maikiwa an akon liog. Nahadlok ako, karuyag ko humuyang, pero diri ko maigios an akon mga kamot ngan mga tiil. Nakainom na ako hin damu nga tubig. Hito nga katpaso han 1991, nabag-o gud an akon kinabuhi.
NATAWO ako ha syudad han Szerencs ngan nagdaku ha baryo han Tiszaladány ha norte-este han Hungarya. Han Hunyo 1991, namasyada kami han akon kasangkayan ha lugar nga waray pa namon makadtui ha Tisza River. Tungod kay kahuna ko nga hilarom an tubig, nagdayb ako. Daku gud adto nga sayop! Nabarian ako hin tulo nga tul-an ha liog ngan nadaot an akon butagtok. Nakita han akon sangkay nga diri na ako nagkikiwa, ngan hinay-hinay nga iginhaw-as niya ako antes pa ako malumos.
Waray mawara an akon sarabotan salit maaram ako nga may seryoso nga problema. May nakapangaro hin bulig ngan usa nga helikopter an umabot. Gindara ako ha hospital ngan gin-operahan an akon butagtok. Ha urhi, iginbalhin ako ha kapital nga syudad, ha Budapest, basi didto magpatambal. Tulo ka bulan nga nakahigda la ako. Bisan kon naikikiwa ko an akon ulo, diri ko naikikiwa an tikang ha akon sugbong tipaubos. Bainte anyos pa la ako, pero bug-os nga nadepende na ako ha iba. Nanluya gud ako ngan karuyag ko na mamatay.
Han puydi na ako makauli ha balay, ginbansay an akon mga kag-anak kon paonan-o ako mamangnoan. Pero an pagmangno ha akon nagpakuri ha ira diri la ha pisikal, kondi pati liwat ha emosyon, ngan paglabay hin mga usa ka tuig, nadepres ako. Hito nga takna, nakakarawat ako hin professional counseling nga nakagbag-o han akon panhunahuna ha akon kahimtang.
Ginpamurubuot ko liwat an mahitungod ha kinabuhi. May katuyoan ba ito? Kay ano nga nahitabo ha akon ini nga trahedya? Nagbasa ako hin mga magasin ngan mga libro basi mabilngan an mga baton. Nagbasa liwat ako han Biblia, pero nakurian ako pagsabot hito. Salit waray ko na ito ipadayon. Nakiistorya pa ngani ako ha padi, pero waray ako makontento han iya ginsiring.
Han katsaringsing han 1994, duha nga Saksi ni Jehova an nagbisita ha akon tatay, ngan ginsidngan niya hira nga kaistoryahon ako. Namati ako samtang iginsasaysay nira an katuyoan han Dios ha paghimo han tuna nga paraiso ngan pagwara han sakit ngan pag-antos. Naopayan gud ako hito, pero nagruhaduha ako. Kondi ginkarawat ko la gihapon an duha nga libro nga basado ha Biblia. Han mabasa ko ito, gintanyagan ako han mga Saksi nga mag-aram ha Biblia, ngan ginkarawat ko ito. Gin-aghat liwat nira ako nga mag-ampo.
Nakombinse ako nga an Dios nahigugma gud ha akon
Samtang nag-aaram kami, nababaton han Biblia an damu ko nga pakiana. Nakombinse liwat ako nga an Dios nahigugma gud ha akon. Salit han Septyembre 13, 1997, katapos hin duha ka tuig nga pag-aram han Biblia, ginbawtismohan ako ha amon bathtub. Usa ito han pinakamalipayon nga adlaw han akon kinabuhi!
Han 2007, bumalhin ako ha Budapest, ha usa nga institusyon para ha mga baldado. Tungod hini nagkaada ako damu nga higayon nga isumat ha iba an magpakalilipay nga butang nga akon hinbaroan. Kon maopay an panahon, nakakagawas pa ngani ako basi magsangyaw. Maopay na la kay may ginpatuyo nga de-makina nga wheelchair nga napapaandar ko pinaagi han akon sulang.
Tungod han pinansyal nga bulig han usa nga pamilya ha amon kongregasyon, nagkaada liwat ako laptop nga napapagana han gios han akon ulo. Pinaagi han Internet, may nakakaistorya ako nga mga tawo ngan nakakagsurat liwat ha mga diri naaabtan han akon mga kakongregasyon ha pagbalay-balay. An pagbulig ha iba hini nga paagi nagpauswag gud han akon abilidad ha pakigkomunikar ngan nakabulig ha akon nga diri magpokus ha akon kahimtang.
Nagsasangyaw pinaagi han Internet ha bulig hin gadyet nga napapagana han gios han akon ulo
Nakakatambong pa ngani ako ha mga katirok ha Kingdom Hall. Pag-aabot ko didto, gin-aalsa ako han akon mga kakongregasyon sakay han akon wheelchair ngadto ha ikaduha nga andana nga ginkakatirokan. Ha mga katirok nga may pakigbahin an mamarati, an akon sapit an nag-aalsa han iya kamot para ha akon. Ginkakaptan niya an akon Biblia o publikasyon samtang nakomento ako.
Pirme ako naabat hin kaul-ol ngan nadepende ako ha iba ha haros ngatanan nga butang. Salit may mga panahon nga nadidepres pa gihapon ako. Kondi an akon relasyon kan Jehova nga Dios nagliliaw ha akon tungod kay maaram ako nga namamati hiya kon iginsusumat ko ha iya an akon mga kabaraka. Napaparig-on liwat ako han akon mga igkasi-Saksi ngan pinaagi ha pagbasa han Biblia adlaw-adlaw. An ira pakigsangkay, pagdasig, ngan pag-ampo para ha akon nabulig nga magin timbang an akon panhunahuna ngan emosyon.
Ginliaw ako ni Jehova ha panahon nga ginkikinahanglan ko gud ito. Gintagan liwat ako niya hin paglaom nga magkaada perpekto nga kahimsog ha bag-o nga kalibotan. Salit ginpapamulat ko an panahon nga ‘makalakat, makalukso-lukso, ngan makagdayaw’ ha iya tungod han iya diri matupngan nga gugma ngan pagkabuotan.
