“Kon mangaro kamo ha Amay hin bisan ano, ihahatag niya ito ha iyo ha akon ngaran.”​—Juan 16:23.

Matin-aw nga iginpapakita han ginsiring ni Jesus nga karuyag ni Jehova nga mag-ampo kita ha iya, diri pinaagi hin mga rebulto, santo, anghel, o nagkamatay naton nga kaapoy-apoyan, kondi pinaagi ha ngaran ni Jesu-Kristo. Kon nag-aampo kita ha Dios ha ngaran ni Jesus, iginpapakita hito nga ginkikilala naton an importante nga papel ni Jesus. “Waray bisan hin-o nga nakakakadto ha Amay kon diri pinaagi ha akon,” siring ni Jesus.​—Juan 14:6.

“Isumat an ngatanan nga aada ha iyo kasingkasing ha iya atubangan.”​—Salmo 62:8.

Kon nag-aampo kita kan Jehova, kinahanglan makiistorya kita ha iya sugad han aton pakiistorya ha aton hinigugma nga tatay. Imbes nga basahon o memoryahon an aton mga pag-ampo, kinahanglan makiistorya kita ha iya nga may pagtahod ngan tikang ha kasingkasing.

“Anoman an aton aroon uyon ha iya kaburut-on, namamati hiya ha aton.”​—1 Juan 5:14.

Ha Biblia, ginsusumatan kita ni Jehova nga Dios kon ano an iya bubuhaton para ha aton ngan kon ano an iya karuyag nga buhaton naton para ha iya. Basi karawaton han Dios an aton mga pag-ampo, kinahanglan mag-ampo kita “uyon ha iya kaburut-on.” Para mahimo ito, kinahanglan adman naton an Biblia basi mas makilala naton hiya hin maopay. Ha pagbuhat hito, an aton mga pag-ampo makakapalipay ha iya.

Ig-ampo an Imo Panginahanglan. Puydi naton ig-ampo ha Dios an aton adlaw-adlaw nga panginahanglan​—pagkaon, bado, ngan urukyan. Puydi liwat kita mag-ampo para hin kinaadman basi makahimo kita hin tama nga mga desisyon ngan hin kusog basi mailob an aton mga problema. Puydi liwat kita mag-ampo para hin pagtoo, para mangaro hin pasaylo, ngan para han bulig han Dios.​—Lucas 11:3, 4, 13; Santiago 1:5, 17.

Ig-ampo an Iba. An mahigugmaon nga mga kag-anak nalilipay kon an ira mga anak naghihigugmaay. Karuyag liwat ni Jehova nga maghigugmaay an iya mga anak dinhi ha tuna. Salit angayan la nga ig-ampo naton an aton asawa, mga anak, mga kapamilya, ngan kasangkayan. An disipulo nga hi Santiago nagsurat: “Ig-ampo an usa kag usa.”​—Santiago 5:16.

Magpasalamat ha Dios. An Biblia nasiring mahitungod ha aton Maglalarang: “Nagbuhat hiya hin maopay pinaagi ha paghatag ha iyo hin uran tikang ha langit ngan hin mabungahon nga mga panahon, nga gintatagan kamo hin damu nga pagkaon ngan ginpupuno an iyo kasingkasing hin kalipay.” (Buhat 14:17) Kon ginhuhunahuna naton an ngatanan nga ginhimo han Dios para ha aton, mapapagios kita nga magpasalamat ha iya ha pag-ampo. Pero kinahanglan liwat naton ipakita an aton pagpasalamat ha Dios pinaagi ha pagsugot ha iya.​—Colosas 3:15.

Usahay bangin masubo kita kay diri dayon ginbabaton an aton kinasingkasing nga mga pag-ampo. Nagpapasabot ba ito nga diri interesado an Dios ha aton? Diri gud! Tagda an masunod nga eksperyensya nga nagpapakita nga bangin kinahanglan la naton padayon nga mag-ampo.

Hi Steve, nga gin-unabi ha siyahan nga artikulo, nagsiring, “Kon diri tungod ha pag-ampo, bangin nawad-an na ako hin paglaom.” Ano an nakapabag-o ha iya? Nagtikang hiya pag-aram han Biblia ngan nahibaroan niya nga kinahanglan an pag-ampo ngan an padayon nga pagbuhat hito. “Nag-ampo ako ha Dios basi pasalamatan hiya tungod han bulig nga akon nakarawat tikang ha akon kasangkayan,” siring ni Steve. “Mas malipayon gud ako yana.”

Kumusta man hi Jenny, nga inabat nga diri hiya angay pamatian han Dios? Nagsiring hiya, “Han inabat ako hin kawaray-pulos, nag-ampo ako ha Dios nga buligan ako nga masabtan kon kay ano nga sugad hito an akon inaabat.” Paonan-o ito nakabulig ha iya? “An pag-ampo nakabulig ha akon nga magkaada husto nga panhunahuna ha mga butang. Nakita ko nga bisan kon ginhuhukman ko an akon kalugaringon, diri sugad hito an pagkita han Dios ha akon. Nakabulig liwat ito ha akon nga diri umundang.” Ano an resulta? “An pag-ampo nakakombinse ha akon nga tinuod hi Jehova ngan mahigugmaon hiya nga Dios, Amay, ngan Sangkay. Andam hiya pagbulig ha akon basta mangalimbasog la ako nga sugton hiya.”

Hunahunaa liwat an eksperyensya ni Isabel. Han nagburod hiya, ginsidngan hiya han iya mga doktor nga an iya anak matatawo nga may depekto. Nasubo gud hiya. Ginsidngan pa ngani hiya han iba nga magpapunit na la. “Duro gud an akon kasubo nga haros ikamatay ko na.” Ano an iya ginbuhat? “Nag-inampo ako ha Dios para hin bulig,” siring niya. Ha urhi, igin-anak niya hi Gerard, ngan may depekto man gud hiya. Inabat ba ni Isabel nga ginbaton han Dios an iya mga pag-ampo? Oo! Ha ano nga paagi? “Kon nakikita ko an akon anak, nga 14 anyos na yana, nga malipayon bisan pa han iya kahimtang, nakasiring ako nga daku hiya nga bendisyon ha akon. Ginbaton gud ni Jehova an akon mga pag-ampo,” siring ni Isabel.

Tungod hiton kinasingkasing nga mga pulong, napapahinumdoman kita han ginsiring han salmista: “Pamamatian mo an hangyo han mga maaghop, O Jehova. Imo paparig-unon an ira kasingkasing ngan pamamatian mo hira hin maopay.” (Salmo 10:17) Maopay gud ito nga mga rason para padayon kita nga mag-ampo!

Mababasa ha Biblia an damu nga pag-ampo ni Jesus. An pinakapopular hito amo an pag-ampo nga iya igintutdo ha iya mga disipulo. Ano an aton mahibabaroan hito?