Hi Maria ba an Iroy han Dios?

I-PLAY

An baton han Biblia

Diri. An Biblia waray magtutdo nga hi Maria an iroy han Dios, ngan waray liwat hito ig-aghat ha mga Kristiano nga kinahanglan singbahon o pasidunggan hi Maria. a Hunahunaa ini:

Hi Maria waray gud mag-angkon nga hiya an iroy han Dios. Iginsasaysay han Biblia nga iya igin-anak “an Anak han Dios,” diri an Dios mismo.—Marcos 1:1; Lucas 1:32.
Hi Jesu-Kristo waray gud magsiring nga hi Maria an iroy han Dios o takos hi Maria hin debosyon. Ha pagkamatuod, ginsaway ni Jesus an babaye nga naghatag hin espesyal nga atensyon ha makalilipay nga papel ni Maria sugad nga iroy niya, nasiring hiya: “Diri, lugod, malipayon an mga namamati ha pulong han Dios ngan nagtutuman hito!”—Lucas 11:27, 28.
An mga pulong nga “Iroy han Dios” ngan “Theotokos” (Nagburod han Dios) waray ha Biblia.
Ha Biblia, an mga pulong nga “Rayna han Langit” nagtutudlok, diri kan Maria, kondi ha buwa nga diosa nga ginsingba han apostata nga mga Israelita. (Jeremias 44:15-19) An “Rayna han Langit” posible nga hi Ishtar (Astarte), usa nga diosa ha Babilonya.
Hi Maria waray singbaha han siyahan nga mga Kristiano, waray liwat hira maghatag ha iya hin bisan ano nga espesyal nga kadungganan. Usa nga historyador an nasiring nga an siyahan nga mga Kristiano “posible nga nagdumiri ha mga kulto ngan bangin nahadlok nga an diri kaangayan nga paghatag hin atensyon kan Maria magin sugad hin pagsingba ha diosa.”—In Quest of the Jewish Mary.
An Biblia nasiring nga an Dios waray tinikangan ngan waray kataposan. (Salmo 90:1, 2; Isaias 40:28) Tungod kay waray hiya tinikangan, diri hiya puydi magkaada hin iroy. Dugang pa, diri puydi igburod ni Maria an Dios; an Biblia klaro nga nasiring nga bisan an langit diri igo an kadaku para umeksakto an Dios.—1 Hadi 8:27.

Maria—Iroy ni Jesus diri “Iroy han Dios”

Judio hi Maria, ngan tulin hiya ni Hadi David. (Lucas 3:23-31) Gin-uuyonan gud hiya han Dios tungod han iya pagtoo ngan debosyon. (Lucas 1:28) Ginpili hiya han Dios nga magin iroy o nanay ni Jesus. (Lucas 1:31, 35) Hi Maria may iba pa nga mga anak ha iya bana nga hi Jose.—Marcos 6:3.

Bisan kon iginpapakita han Biblia nga hi Maria nagin disipulo ni Jesus, diri damu nga impormasyon an iginsumat mahitungod ha iya.—Buhat 1:14.

Kay ano nga naghuhunahuna an iba nga hi Maria an iroy han Dios?

An debosyon kan Maria nagtikang han kataposan nga bahin han ikaupat nga siglo C.E. Hito nga panahon, an Katoliko an nagin relihiyon han Estado han Imperyo han Roma. Sugad nga resulta, damu nga pagano an nagin mga “Kristiano.” Ginkarawat liwat han singbahan an diri basado ha Biblia nga katutdoan han Trinidad.

Tungod han doktrina han Trinidad, damu an naghunahuna nga kon hi Jesus amo an Dios, hi Maria an iroy han Dios. Han 431 C.E., opisyal nga ginproklamar han usa nga konseho han singbahan ha Efeso hi Maria nga “Iroy han Dios.” An Mariolatry—an sobra nga pagpasidungog kan Maria—nagin kalyap katapos hini nga Konseho han Efeso. Ngan han an mga pagano inapi ha singbahan, an mga imahen ngan ladawan han Birhen Maria hinay-hinay nga sinaliwan ha mga diosa han pag-anak, sugad kanda Artemis (Diana, ha mga Romano) ngan Isis.

Han 432 C.E., hi Pope Sixtus III nagsugo nga magtukod ha Roma hin singbahan sugad nga pagpasidungog ha “Iroy han Dios.” Gintukod ito hirani ha lugar nga gintukoran hadto hin templo sugad nga pagpasidungog kan Lucina, usa nga Romano nga diosa han panganak. Usa nga awtor an nagsiring nga ini nga singbahan “usa nga nagpapabilin nga simbolo han pagtampo han Harangdon nga Iroy han pagano nga mga kulto ngadto ha kulto ni Maria katapos nga magin Kristiano an Roma.”—Mary—The Complete Resource.

a May mga relihiyon nga nagtututdo nga hi Maria an iroy han Dios. Gintatawag nira hiya nga “Rayna han Langit” o Theotokos, usa nga Griego nga pulong nga nangangahulogan “Nagburod han Dios.”