CHii, gidokkona. Yihoowa Markkati Geeshsha Maxaafan ammaniya Kiristtaaneta. Issi issi haymaanooteti Ayhudati Pilisxxeema biittan shiiqiyoogee Geeshsha Maxaafaa hiraagaa polo giidi tamaarissikkokka, Yihoowa Markkati hegaadan gookkona. Eti polotikaara gayttidaagan hanettiya ha hanotay Geeshsha Maxaafay kasetidi yootidoba giidi ammanokkona. Ubba, Geeshsha Maxaafay asa kawotetta awugaanne kaafenna woy issi zariyaa woy issi heeraa asaa haraappe xoqqu oottenna. Yihoowa Markkati attamissiyo Wochchiyo Keelaa maxeetee qonccissidi hagaadan giis: “Polotikaara gayttida Xiyoonaawe giyoobay Geeshsha Maxaafay kaafiyooba gidenna.”

 Inssaykilooppidiya Birittaanika giyo maxaafay Xiyoonaawe giyoobay, “Ayhudatussi Pilisxxeeman sohoy deˈanaadaaninne eta maaddanawu halchchidi Ayhudati essidoba” gidiyoogaa yootees. Hegawu denddoy haymaanootiyaaranne polotikaara gayttidaba. Yihoowa Markkati Xiyoonaawe giyoobaa haymaanoote timirttedan xeellokkona, qassi polotikaara gayttidaagan Xiyoonaawe giyoobaa mule kaafokkona.

 Yihoowa Markkatu dirijjitee tamaarissiyoobay haymaanooteera gayttidabaa xalla, qassi Xiyoonaawe giyoobaa gujjin polotikaara gayttidabaa aybakka kaafokkona. Yihoowa Markkati polotikan gelennaagee darosan erettidaba, qassi eti polotikan gelennaagaa gaasuwan daro biittatun eta iita yedetay gakkiis. Ha saˈan tumu sarotettaa ehaanay saluwan deˈiya Xoossaa Kawotettaa xalla gidiyoogaa nuuni ammanoos; asa kawotetti awugeenne woy asi essido dirijjitee awugeenne hegaa oottana danddayenna.

 Yihoowa Markkati ammaniyo waannabaappe issoy, eti deˈiyo biittay awanne gido, kawotettati kessido higgiyawu haarettiyoogaa. Eti kawotettaa sunttata eqettidi makkalokkona, woy eqettiyaageetakka kaafokkona.