HA MAXEETIYAU koyro sinttan deˈiya oyshaa beˈada dagammadii? Issoti issoti dagammana; shin ha wodiyan daro asay Xoossay meqettaa iiteeyye kehee giidi qoppees. Ubba i meqettaa iita giyaageetikka deˈoosona. Aybissi?

Meretay gattiyo daafabaappe attida issoti issoti, “Hagaa malabay hananaadan Xoossay paqqadiyoy aybissee? I asau qoppennee? Woy qassi i meqettaa iitee?” yaagidi oychoosona.

Harati qassi Geeshsha Maxaafaa nabbabiyo wode hegaa mala oyshaa oychoosona. Eti Nohe wode Bashsha Haattaa taarikiyaa malaa nabbabiyo wode, ‘Siiqo Xoossay ha ubba asaa xayssiyoy aybissee? I meqettaa iiteeyye?’ giidi qoppoosona.

Neeni hegaa mala oyshata oycha eray? Woykko Xoossay meqettaa iitakkonne oychiyaageetussi zaaranau metootay? He naaˈˈu hanotankka nena maaddana danddayiya hara oyshaa beˈa.

Nuuni meqettaa iitatettaa ixxiyoy iitaa kehaa eriyo gishshataassa. Nuuni hegan mehiyaappe keehi dummatoos. Xoossay nuna “ba leemisuwan medhdhiis.” (Doomettaabaa 1:27) Hegee woygiyoogee? I nuna aagaa mala eeshshay deˈiyoogeetanne i kessido kandduwaa maaraa kaalliyaageeta, qassi iitaa kehaa shaakki eriyaageeta oottidi medhiis. Hagaa akeeka: Xoossay nuna iitaa kehaa shaakki eriyaageeta, qassi meqettaa iitatettaa ixxiyaageeta oottidi medhikko, ikka meqettaa iitatettaa ixxees giyoogee bessiyaaba gidennee?

Hegaadan qoppiyoogee bessiyaaba; ayssi giikko, Geeshsha maxaafay Xoossay, “Ta ogee intte ogiyaappe xoqqees; ta qofaikka intte qofaappe xoqqees” yaagidoogaa yootees. (Isiyaasa 55:9) Gidoppe attin, nuuni Xoossay meqettaa iita giikko, he qofaappe dummatiyaabaa yootoos; hegee nu ogee a ogiyaappe xoqqees goos giyoogaa mala. Hegaadan gaanaappe kasetidi, darobaa akeekiyoogee eratetta. Nuuni Xoossay meqettaa iitakkonne oychiyoogaappe, geella i oottiyo issi issibay meqettaa iitatettaa bessiyaaba milatiyoy aybissakko oychana koshshees. Hegaa akeekanau, “meqettaa iita” giyoogee tumuppe woygiyoogaakko ane beˈoos.

Nuuni issi ura meqettaa iita giikko, a qofay iita giiddi deˈoos. Meqettaa iita uri harati tuggatiyo wode ufayttiya ura woy eti unˈˈettiyo wode etau qoppenna ura. Yaatiyo gishshau, ba naˈaa qohiyoogee bana ufayssiyo gishshau a seeriya aawi meqettaa iita. SHin ba naˈaa tamaarissanau woy iitabaappe naaganau seeriyaagee keha aawa. Asay issi uri oottidobaa issi issitoo bala ogiyan akeekees; issi uri neeni oottidobaa bala ogiyan akeekidaba gidikko hegaa loytta eraasa.

Issoti issoti Xoossay meqettaa iita giyo gaasotuppe naaˈˈata, giishin ha wodiyan meretay gattiyo daafabaa, qassi Xoossay pirddido pirddaa xeelliyaagan Geeshsha Maxaafay yootiyoobaa ane beˈoos. Tumuppe hegee Xoossay meqettaa iita gidiyoogaa bessii?