Nu bollaa maalaaliya hanotan paxana danddayiyaaba oottidi Xoossay medhdhiis. Paxa deˈiya bollay qanxxettiyo, gaarettiyo woy cadettiyo wode, “gita masunttaykka guutta masunttaykka paxanaadan oottiya muttumurettidabay bollaa giddon hanees.” (Jons Hopkins Medisin) Bollay sohuwaara suuttay suuxxennaadan, goggiyoosay aakkanaadan, masunttay paxanaadaaninne he sohoy kaseegaadan hananaadan oottiyoogaa doommees.

HAGAA QOPPA: Xoossay masunttay paxanaadan oottidi nu bollaa medhdhido gishshawu, I nu seelay xayanaadan maaddanawu gelido qaalaa ammanettana danddayokkoo? Mazamuraawee hagaadan giis: “Wozanai meqqidoogeeta i pattees; eta mazunttaakka i qachchees.” (Mazamure 147:3) SHin nena kase gakkidabaa woy haˈˈi gakkiyaabaa gaasuwan neeni waayettikko, Yihooway haˈˈikka sinttappekka ne masunttaa qachchanaagaa waata ammanettana danddayay?

Xoossay hagaadan gees: “Taani nenaara de7iyo gishshau yayyoppa; taani ne Xoossaa gidiyo gishshau dagammoppa. Taani nena minttana; qassi taani nena maaddana.” (Isiyaasa 41:10) Yihooway awu qoppiyoogaa eriya uri woppaanne dumma dumma metuwan gencciyo wolqqaa demmees. Kiitettida PHawuloosi he woppay ‘asa eratettaa ubbaappe aadhdhiya Xoossaa sarotettaa’ gidiyoogaa yootiis. I Xoossay ‘bawu immido wolqqan ubbabaa oottanawu danddayiyoogaa’ yootiis.—Piliphphisiyuusa 4:4-7, 9, 13.

Yihooway asawu sinttappe ehaanawu qaalaa gelidobaa mintti ammananaadan Geeshsha Maxaafay nuna maaddees. Leemisuwawu, Ajjuutaa 21:4, 5y (qofay kaalliya sinttan deˈees) I ay oottanaakko, qassi I hegaa oottanaagaa nuuni ammanettana danddayiyoy aybissakko yootees:

• ‘Xoossay asaa ayfiyaappe afutta ubbaa quccana.’ Yihooway nu waayiyaanne nuna hirggissiya ubbabaa, haray atto nuna qofissiya harati laafabadan xeelliyoobaakka xayssana.

• Ubbaa Danddayiya, mereta ubbaa Kawoy saluwan bonchcho ‘araatan uttidi’ waayiyaa xayssanawunne nuna koshshiyaaban maaddanawu ba wolqqaanne ba maataa goˈettana.

• Yihooway I gelido qaalay “ammanettiyaagaanne tuma” gidiyoogaa yootiis. Hegee, I ba gelido qaalaa poliyoogan tumu Xoossaa gidiyo ba sunttaa erissees giyoogaa.

“‘Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis’ yaagiis. Araatan uttidaagee, ‘Taani ubbabaa ooraxissais’ yaagiis. Qassikka zaarettidi tana, ‘Taani haasayiyoogee ammanettiyaagaanne tuma gidiyo gishshau xaafa’ yaagiis.”—Ajjuutaa 21:4, 5.

Saluwan saˈan deˈiya ubbabaykka Geeshsha Maxaafaykka saluwan deˈiya nu Aawaa eeshshaa qonccissees. Meretay nuuni Xoossaa mata dabbodan eranaadan shoobbiyoogee qoncce gidana xayikkonne, Geeshsha Maxaafay, “Xoossaakko shiiqite; ikka inttekko shiiqana” giidi qoncciyan shoobbees. (Yaaqooba 4:8) Oosuwaa 17:27y, “Xoossai nuuppe ooyyoonne haaho gidenna” yaagees.

Neeni loddan loddan Xoossaa eriyo wode, ‘I neessi qoppiyoogawu’ ne ammanoy minni minni baana. (1 PHeexiroosa 5:7) Yihoowan hegaadan ammanettiyoogan ay goˈettay?

Jaappaanen deˈiya Toru hanotaa qoppa. A dichchida aayyiyaa Yihoowa Markka, shin I danobaa oottiya yakuza giyo Jaappaane dirijjitiyan geliis. I hagaadan gees: “Taani kase Xoossay tana ixxees gaada qoppays; hegaa bollikka tanaara deˈiyaageeti, ubba qassi taani keehi siiqiyoogeeti hayqqidoogee tawu qixaatedan siyettiis.” Toru he iita laggetettaanne iita qofaa gaasuwan I “meqettaa iitanne qarettennaagaa” gididoogaa ammanees. I kase koyiyoobaa hagaadan gees: “Taappe aaruwan erettida  yelagaa woriyoogan hayttatada hayqqanawu koyaas.”

SHin, Torunne A machchiyaa Haanna Geeshsha Maxaafaa xannaˈido wode, Toru deˈoynne A xeelay keehi laamettiis. Haanna, “Ta azinay laamettiyoogaa taani beˈaas” yaagaasu. Haˈˈi Toru hagaadan gees: “Nuussi ubbawu tumuppe qoppiya Xoossay deˈees. I ooninne hayqqanaadan koyenna; qassi wozanappe bantta nagaraappe simmiyaageetussi I atto gaana koyees. Nuuni appe harawu yootana danddayennabaa, qassi hara uri akeekennabaa I siyees. Mata wode Yihooway meto ubbaa, waaye ubbaanne barchche ubbaa xayssana. I nuuni qoppibeenna ogetun nuna haˈˈikka maaddees. I nuna siiqeesinne nuuni azzaniyo wode maaddees.”—Mazamure 136:23.

Toru hanotaappe akeekiyoogaadan, Xoossay daafabaa ubbaa xayssananne afutta ubbaa quccana danddayiyoogaanne mata wode yaatanaagaa eriyoogee, nuussi hidootay deˈanaadan oottiyoogaa xalla gidennan, nuuni haˈˈi loˈˈo deˈo deˈanaadan maaddees. Ee, waayee kumido alamiyankka Xoossaa siiquwan neeni goˈettana danddayaasa.