BENI Baabiloone katamaa gimbbanawu goˈettido xuubetuppe daro miiloone gidiyaagaa biittaa bookki xannaˈiyaageeti demmidosona. Biittaa bookki xannaˈiya Roobert Koldevi yootidoogaadan, hegaa mala xuubeti “loˈˈo urqqay deˈiyoonne xuugganawu goˈettiyo daro mittay deˈiyo katamaappe kareera” merettoosona.

Baabiloone kawotettaa sunttati he xuuggiyo sohuwaa keehi azzanttiyaabaa oottanawukka goˈettiyoogaa bessiyaabaa biittaa bookki xannaˈiyaageeti demmidosona. Torontto Yuniversttiyaa profeeseree Pool-Alan Booliyu hagaadan giis: “Kawoy bawu azazettibeennaageeti woy Baabiloone xoossata bonchchibeennaageeti xuugiyo sohuwan olettanaadaaninne yan xuugettanaadan azaziyoogaa Baabiloone xuufee yootees.” Kawuwaa Naabukadanaxoora wodiyaappe ekettida issi xuufee hagaadan gees: “Eta xayssite, xuuggite, eettite, . . . taman olite . . . eta cuway pude kiyanaadan oottite, eti hayqqanaadan taman eta yeggite.”

Hagee Geeshsha Maxaafaa nabbabiyaageti Daaneela shemppo 3n odettidabaa hassayanaadan oottees. Baabiloone katamaappe kareera deˈiya Duura dembban Kawuwaa Naabukadanaxoori gita misiliyaa worqqaappe medhdhidoogaa hegee yootees. Sidiraaqa, Misaaqanne Abddanaaga geetettiya heezzu Ibraawe yelagati he misiliyaayyo gufannidi goynnennan ixxido wode, Naabukadanaxoori eta bolli hanqquwaa suullidi itoone “tamai kase eexxiyoogaappe laappun kushiyaa aadhdhidi” eexxanaadaaninne ha heezzu attumaageeta “eexxiya itoone tamaa giddo olanaadan” azaziis. Wolqqaama kiitanchchay hayquwaappe eta ashshiis.—Dane. 3:1-6, 19-28.

Baabiloonen beettida xuubetikka Geeshsha Maxaafay tuma gidiyoogaa bessoosona. He xuubetuppe darotun kawuwaa sabbiya qofay deˈees. Hegeetuppe issoy hagaadan gees: “Baabiloone Kawuwaa, Naabukadanaxoora . . . Kawo keettaa, taani Gita Kawoy keexxidoogaa . . . Ta zerettati merinawu haariyaageeta gidona.” Hagee Daaneela 4:30n Naabukadanaxoori otoruwan yootido qofaa mala: “Hagee ta kawo keettai an de7ana mala, taani ta gita wolqqan, ta gitatettaa bonchchuwaassi gimbbissido Baabiloone katamaa gitaa gidennee?”