INDONEZHIYAN Saniger Bezar giyo qeeri haruuruwan nu michchonttuppe heezzati deˈoosona. Amarida layttaappe kase eti abba doonan issippe oottidosona. Eti ha haruuruwan asay Geeshsha Maxaafaa eranaadan maaddanawu sabbakiyogan erettoosona. Shin he wode eti dumma oosuwa oottidosona.

Koyruwan, eti haattaa giddo hemettidi deexxiya shuchchaa demmoosona, qassi tookkidi abbaa gaxaa guyye simmoosona. He shuchchatuppe amaridaageeti tohuwa kuwasiyadan gita. Naaˈˈanttuwan, he shuchchaa yesoy kuttuwa phuuphulliyappe guuxxana gakkanaashin eti guutta oydiyan uttidi madooshan mentterettoosona. Hegaappe simmin, suuppa shuchchaa balddiyan yeggidi bantta heeran deˈiya adussa xekkaa kiyoosona. Yaatidi ogiya oosuwawu kaamee caanidi efaanaadan he shuchchaa wogga qanccan qoloosona.

He michchonttuppe issinniya Hulddo. He oosuwa oottiya haraatuppe aaruwan hegaa oottanawu iyyo daro wode deˈees. A hegaappe demmiyo miishshaa ubbaa ba so asawu koshshiyabaa kunttanawu darotoo goˈettawusu. Shin A haˈˈi he miishshaappe amaridaagaa harabawukka goˈettanawu koyaasu. A JW Laybreeriya goˈettanawu taabileetiya koyaasu. Ha applikeeshiniyan deˈiya biidotinne harabati Huldda haratussi markkattanaadan, Geeshsha Maxaafaa xannaˈanaadaaninne akeekanaadan maaddiyogaa eraasu.

Huldda qeeri kaamiya kumiyagaa keena shuchchaa mentterettanawu issi aginanne baggaa maallado maallado naaˈˈu saatiyawu oottaasu. Wurssettan, A taabileetiya shammanawu gidiya miishshaa demmaasu.

Huldda hagaadan gaasu: “Shuchchaa mentterettiyogan ta keehi daafuridabanne sahettidaba gidikkokka, taani haggaazuwan qara gidanawunne shiiqotussi metootennan giigettanawu ha ooratta taabileetiya goˈettiyo wode ta daafuraanne sahuwa ubbaa sohuwara dogaas.” Koronaa harggiya wodiyan shiiquwawunne haggaazuwawu galchchaara gayttanaadan O he taabileetee maaddidoogaakka yootaasu. Huldda ba halchchuwa polidoogan nu keehi ufayttoos.