Xoqqa timirttiyaa tamaariyoogeenne duretiyoogee ufayssiya deˈuwaa demissiyaabadan daroti qoppoosona. Issi uri yuniversttiyan tamaariyoogee oosuwan, so giddooninne deretettan gooba gidanaadan maaddana danddayees giidi ammanoosona. Xoqqa timirttiyaa tamaariyoogee daro miishshaa demissiya oosuwaa oyqqanawu maaddiyaabadan, qassi daro miishshay deˈiyoogeeti ufayttiyaabadan eti qoppoosona.

CHaynan deˈiya ZHan CHen giyo bitanee yootidobaa akeeka. I hagaadan giis: “Taani hiyyeesatettaappe kiyanawunne ufayttanawu yuniversttiyan tamaarada anjjettananne daro miishshaa demissiya oosuwaa oyqqana koshshees gaada qoppaas.”

Daroti ufayssiya deˈuwaa deˈanawu keehi erettida yuniversttiyan, geella hara biitti biidi tamaaranawu koyoosona. Asay issisaappe harasaa biyoogee koronaa harggiya gaasuwan digettana gakkanaashin hegee meeze gididaba. Isiyaa biittan deˈiya tamaaretuppe baggappe dariyaageeti hara biittan tamaariyoogaa, issi dirijjitee 10 layttappe kase yootiis.

Yelidaageeti hara biittan deˈiya yuniversttiyan bantta naata tamaarissanawu keehi baaxetoosona. Taywaanen deˈiya issi yelagay hagaadan giis: “Tana yelidaageeti dure gidana xayikkonne, nuna oyddu naatakka Amarkkan deˈiya kolloojjiyan tamaaranaadan yeddidosona.” A yelidaageetinne hara daroti hegaa mala timirtte keettatun bantta naata tamaarissanawu acuwan gelidosona.

Ufayssiya deˈuwaa deˈanawu timirttee amarida ogetun maaddana danddayikkonne, tamaariyaageeti qoppidoogaadan ubbatoo maaddenna. Leemisuwawu, eti tamaaranawu unddenna layttaayyo baaxetidabanne daro miishshaa talˈˈidaba gidikkonne, eti koyido oosuwaa demmana danddayibookkona. Rachel Muy giyo maccaasiyaa Bizines Taymis giyo gaazeexan hagaadan gaasu: “Yuniversttiyaappe anjjettiya keehi daroti oosuwaa demmana danddayibookkona.” Taywaanen deˈiya Jenjja giyo daro tamaarida bitanee hagaadan giis: “Daroti bantta tamaaridoogaa mala oosuwaa demmibookkona.”

Bantta tamaaridoogaa mala oosuwaa demmidaageetikka, eta deˈoy eti qoppidoogaadan hanibeennaagaa akeekidosona. Taylandden deˈiya Nirin giyo bitanee, Awurooppan deˈiya yuniversttiyaappe anjjettidi ba tamaaridoban oosuwaa demmiis. I hagaadan giis: “Taani qoppidoogaadan, digiriyan anjjettidoogee daro miishshaa demissiya oosuwaa oyqqanaadan tana maaddiis. SHin taani daro miishshaa demmanawu, keehi baaxetananne daro saatiyaa oottana koshshiis. Guyyeppe, nu ooso keettay tananne hara daro oosanchchata oosuwaappe kessiis. Ufayssiya deˈuwaa demmanawu ooso oyqqiyoogaa xallay maaddennaagaa taani akeekaas.”

Daro miishshay deˈiyoogeeti woy ufayttiyaaba milatiyaageetikka, sahettoosonanne miishshaabawu hirggoosona; qassi eta son sarotettay baawa. Jaappaanen deˈiya Kasitosha giyo bitanee hagaadan giis: “Taani dure gidikkonne, harati tana qanaatiyoonne keehi qohiyo gishshawu ufayttikke.” Veetinaamen deˈiya Leema hagaadan gaasu: “Daro miishshaa shiishshiyoogee ufayttanawu maaddees giidi daro asay qoppiyo gishshawu duretanawu baaxetees; shin eti keehi hirggoosona, sahettoosonanne unˈˈettoosona.”

Xoqqa timirttiyaa tamaariyoogaappenne duretiyoogaappe aaruwan, deˈuwawu keehi koshshiyaabay deˈiyoogaa Frenkilinaagaadan daroti akeekidosona. Etappe amaridaageeti, aquwaabaa xallan xeelaa wottiyoogaappe loˈˈo asa gidiyoogaaninne haratussi kehiyoogan ufayssaa demmidosona. Hegaadan oottiyoogee ufayssiya deˈuwaa deˈanawu maaddii? Kaalliya huuphe yohoy he oyshaa zaaruwaa qonccissees.