Issi issi oosoti likkeba woy keehi balaba gidiyogaa daro asay maayees. Leemisuwawu, woriyogaa, wolqqan mattumaa gayttiyogaanne naata mattuman qohiyogaa daroti eqettikkonne, suurebaa oottiyogaa, kehiyogaanne qarettiyogaa daro asay nashshees. Shin mattumaa gaytettaa, ammanettiyogaa woy naata dichchiyogaa mala hara hanotatun daroti likke woy bala dooroy baynnabadan qoppoosona. Eti ay dooroykka haniyabadan qoppoosona. Daroti issibaa xeelliyagan banttayyo woy haratuyyo siyettiyagaa maaran kuuyoosona. Shin yaatiyogee loˈˈoo?

Nuuni darotoo likkebaanne balabaa xeelliyagan nuuyyo siyettiyagaa maaran, hegeekka nu kahay yootiyogaa maaran kuuyoos. (Roome 2:14, 15) Ubba, guutta naatikka issibay likke gidenna wode eroosona, qassi balabaa oottiyo wode zilˈˈettoosona. So asaappe, laggetuppe, asttamaaretuppe, deretettaappe, haymaanootiyappenne wogaappe tamaariyoban wodiyappe wodiyan nu kahay loohees. Nuuni issibaa kuuyiyo wode, nu kuuyiyobay likkebaa woy balabaa xeelliyagan nuuni eridobaara maayettiyakko maayettennaakko nu kahay yootees.

Likkebaanne balabaa xeelliyagan nuuni qoppiyobay, nuuni haratuyyo siyettiyabaa akeekiyageeta, nashshiyageeta, suurebaa oottiyageetanne qarettiyageeta gidanaadan oottees. Qassi hegee nuuni siiqiyogeeta qohiyabaa, woy nuna hanqqetissana, yeellayananne zilˈˈana danddayiyabaa oottennaadan naagees.

Nuuyyo siyettiyabay ubbatoo ammanttiya kaaleto gidii? Gaariki yelagatettan doorido deˈuwabaa hagaadan giis: “Taani koyido aybanne oottana danddayays.” Gidikkonne, I bawu likke milatidabaa oottidoogee loˈˈobaa kaalettibeennaagaa akeekiis. A deˈoy “moorettida kandduwan, jallissiyabaa goˈettiyogan, ushshaa likkiyappe aattidi uyiyogaaninne makkalan kumida cammida deˈo” gididoogaa I guyyeppe qonccissiis.

Nuuyyo siyettiyabaa maaran kuuyiyogaa bolli, issi issitoo nuuni kuuyiyobata xeelliyagan haratu qofaa kaallidi kuuyoos. Hegee nuuni eta meeziyappenne hayyuwappe goˈettanaadan maaddees. Nu so asay, laggetinne deretettay likke giidi qoppiyobaa nuuni oottiyo wode eti nuna bonchchoosona.

Haratuyyo siyettiyabay ubbatoo ammanttiya kaaleto gidii? Pirisiila yelagatettan deˈiyo wode ba laggetuppe daroti dosiyobaa oottawusunne aqo oyqqanaappe kase mattumaa gayttawusu. Gidikkonne, harati likke giidi qoppiyobaa kaallidoogee A ufayttanaadan oottibeennaagaa akeekaasu. A hagaadan gaasu: “Ubba asay oottiyobaa kaallidoogee, taani ufayttanaadan oottibeenna. Hegee taani oottiyobay eeyyabanne qohiyaba gidanaadan oottiis.”

Nuuyyo siyettiyabaynne haratuyyo siyettiyabay nuuni likkebaanne balabaa xeelliyagan kuuyiyo wode keehi maaddees. Shin hegaa xallaa kaalliyogee ubbatoo loˈˈo ayfiya demissenna. Nuuni kuuyiyobay ay kaalettanaakko erenna gishshawu, issi issitoo nuna woy harata qohiyabaa oottana danddayoos. (Leemiso 14:12) Qassi nuuninne harati issibay likke giidi qoppikkokka, hegee qohiyaba gidananne he qofay laamettana danddayees. Ubbaappe aaruwan, kase balabadan qoppiyo issi issi eeshshay haˈˈi daro asay dosiyoba gidiis; qassi kase daroti dosiyobay haˈˈi bessennabadan xeelliyoba gidiis.

Likkebaynne balabay aybakko kuuyanawu maaddiya aybippe aadhdhiya kaaletoy deˈii? Likkebaynne balabay aybakko eranawu maaddiya, daro layttaappe simminkka laamettenna nuuni ha wodiyan kaallana danddayiyobi deˈii?

Ufayssiyabay, ubbasan deˈiya, ubba asawu haniyanne awudenne laamettenna ammanttiya kaaletoy deˈees. Nuuni likkebaanne balabaa shaakkanawu maaddiya ammanttiya kaaletuwa awuppe demmana danddayiyakko kaalliya huuphe yohoy qonccissees.