• Intte naˈay otorettees; shin awu layttay biron tamma!

• I bana asa ubbay dummayidi xeellanaadan koyees.

Intte hagaadan qoppeeta: ‘I hegaadan haniyoy aybissee? Taani i babaa loˈˈobaa qoppanaadan koyays; shin i ubba asaappe aadhiyaabadan qoppanaadan koyikke!’

Naˈi bana laafa asadan xeellennan ba huuphiyaa kawushshanaadan tamaarissana danddayettii?

Mata wodeppe haa simmin, aawatussinne aayotussi eti bantta naati koyiyoobaa ubbaa oottanaadan, galatana bessiyaabaa eti oottana xayikkonne, coo galatanaadan, qassi naata seerennaadaaninne qaxxayennaadan odettees. Naati banttana dumma asadan qoppanaadan oottikko, eti banttana bessiyaagaadan bonchidi diccoosona giidi qofettees. SHin hanotay ay bessii? Jenereshin Mi giyo maxaafay hagaadan gees: “Bana bonchanaadan denttettiyoogee wozannaamanne ufayttiya naati daranaadan gidennan, banttana sabbiya naati daranaadan oottiis.”

Daro naati coo galatin diccido gishshawu hidootaa qanxxissiyaabay merettiyo wode, eta asi boriyo wodenne issi issitoo qoppidobay polettennan attiyo wode ammanidi ekkokkona. Eti banttabaa xallaa qoppanaadan tamaarido gishshawu gasttiyo wode asaara maayettidi deˈanawu metootoosona. Hegaappe denddidaagan, etappe daroti hirggoosonanne unˈˈettoosona.

Naati banttana tumuppe bonchanaadan oottiyay eti issibaa poliyoogaappe attin, dumma asa gididabadan etawu ubbatoo yootiyoogaa gidenna. Hegawu banttanan ammanettiyoogaappe aadhiyaabay koshshees. Eti issi issi hiillaa tamaarana, meezetananne kaseegaappe loytti erana bessees. (Leemiso 22:29) Qassi eti hara asawu koshshiyaabaa qoppana bessees. (1 Qoronttoosa 10:24) Hegaa ubbaa oottanawu eti bantta huuphiyaa kawushshana koshshees.

Galatana bessiyo wode galatite. Intte naˈiyaa timirtte keettaa paaciyan loˈˈo markkiyaa demmikko, o galatite. A demmido markkee guutta gidikko, coo asttamaariyan gaasoyoppite. Hegee intte naˈiyaa ba huuphiyaa kawushshanaadan maaddenna. A haroode loˈˈo markkiyaa waata demmana danddayiyaakko akeekanaadan maaddite. Loˈˈobaa oottiyo wode galatite.

Bessiyo wode seerite. Hegaa giyoogee eti mooro wode ubban borana koshshees giyoogaa gidenna. (Qolasiyaasa 3:21) SHin gita balaa baliyo wode seerana bessees. Iitabaa haniyo wodekka hegaadan oottana danddayettees. Hegee xayikko, hanotay yaa iitana danddayees.

Leemisuwawu, intte naˈay ayyiyoogaa doommiis giidi qoppite. Seerana xayikko, i otorettananne harati baakko shiiqennaadan oottiyoogaa doommana danddayees. Yaatiyo gishshawu, ayyiyoogee i iita gidanaadan oottiyoogaanne hegee a yeellayana danddayiyoogaa intte naˈaassi odite. (Leemiso 27:2) Bana bessiyaagaadan xeelliya uri ba eraa haratuyyo awaajjana koshshennaagaakka yootite. Hegaadan naˈaa siiquwan seeriyoogee i bana laafa asadan xeellennan ba huuphiyaa kawushshiyoogaa tamaaranaadan maaddees.—Geeshsha Maxaafaa maaraa: Maatiyoosa 23:12.

Deˈuwan gakkiyaabawu intte naˈay giigettanaadan maaddite. Naˈi koyiyoobaa ubbaa ayyo immiyoogee i aawatanaadan oottana danddayees. Leemisuwawu, intte wolqqappe darobaa intte naˈay oychiyaaba gidikko, intte wolqqadan deˈana koshshiyoy aybissakko qonccissite. Allaxxanawu keeri uttidi, hegaa agganawu koshshikko, qoppidobay polettennan attiyoogee wottin deˈiyaaba gidiyoogaa yootana danddayeeta; qassi hegaa malabay gakkiyo wode intte waatana danddayiyaakko tobbana danddayeeta. Naata ayba metoynne gakkennaadan teqqiyoogaappe, gasttiyo wode gakkanabawu giigettanaadan eta maaddite.—Geeshsha Maxaafaa maaraa: Leemiso 29:21.

Immanaadan minttettite. ‘Ekkiyoogaappe immiyoogee ufayssiyoogaa’ intte naˈaassi qonccissite. (Oosuwaa 20:35) Waatidi? Issibaa shammiyooban, issisaappe harasaa biyo wode kaamiyawu koshshiya miishshaa qanxxiyoogan woy moorettidabaa giigissiyoogan maaddana koshshiyo asaa qoppanaadan maaddana danddayeeta. Intte etappe amaridaageeta maaddiyo wode intte naˈaa inttenaara efiite. Haratuyyo koshshiyaabaa kunttiyo wode intte keehi ufayttiyoogaa intte naˈay beˈanaadan oottite. Leemiso gidiyoogan intte naˈay ba huuphiyaa kawushshanaadan hegaadan loˈˈo ogiyan intte tamaarissana.—Geeshsha Maxaafaa maaraa: Luqaasa 6:38.