Daro asay koshshiyaabaa demmanawu ubba galla baaxetees. Alamiyan kumida metoy hegee yaa wayssanaadan oottana danddayiyoogee azzanttiyaaba. Aybissi?

• Heeran metoy merettiyo wode kattay, keettaa keraynne hegaa mala harabati keehi alˈˈoosona.

• Daafabay dariyoogee asawu oosoy xayanaadan woy damoozay guutta gidanaadan oottana danddayees.

• Daafabay oosuwaa, keettaanne harabaa xayssana danddayees; hegee asay hiyyeesanaadan oottees.

• Ne miishshaa bessiyaagaadan goˈettikko, daafabay gakkiyo wode waayettennan aggana danddayaasa.

• Ubba wode miishshan ammanettana danddayettenna; ne demmiyo miishshaa, ne minjjaanne neeyyo deˈiyaabaa waagay guuxxana danddayees.

• Ufayssaanne so asaa issippetettaa malabata miishshan shammana danddayettenna.

Geeshsha Maxaafay Yootiyoobaa: “Miyoobainne maayiyoobai de7ikko, hegee nuuyyo gidana.”—1 Ximootiyoosa 6:8.

Deˈiyaabay gidana giyoogee darobaa koyennaaagaanne hachchissi koshshiyaabaa demmidi ufaytti deˈiyoogaa gujjees. Neeyyo deˈiya miishshay guutta gidiyo wode, hegee ubba keehi koshshiyaaba.

Deˈiyaabay gidana gaanawu, ne deˈuwaa sima oottana koshshees. Ne abbiyaappe aadhdhiyaabaa ubbatoo shammiyaaba gidikko, guyyeppe nena daro metoy gakkana danddayees.