Taani Hanggaare bbiittan deˈiya keehi daro layttaa gamˈˈida kataman yelettaas. Naaˈˈantto alamiyaa olay yan gattido azzanttiya qohuwaa hanno gakkanawu hassayays.

Taani naatettan ta aayee aayyeeranne aayee aawaara deˈaas. Taani etabaa, ubbakka ta aayee aayeebaa keehi ufayssiyaabaa hassayays. A taani Xoossaa mintta ammananaadan baaxetaasu. Tawu layttay heezza gidiyo wode, ubbatoo omarssan Godaa Woosaa giyo woosaa issippe woossoos. Gidoppe attin, tawu layttay 30 matana gakkanaashin he woosay woygiyoogaakko erikke.

Ta aawaynne aayyiyaa deˈanawu injjetiya keetta shammanawu gidiya miishsha qoraphphanwu giidi gallassinne qammi oottiyo gishshawu, ta aayee aayyiyaanne ta aayee aaway tana guutta naatettan dichchidosona. Naaˈˈu saaminttappe issitoo Qeeraa Qeeraa gallassi kumetta keettaa asay issippe shiiqidi qumaa moos. Issippe shiiqiyo he wodetun taani keehi ufayttays.

Nu soo asaa amoy 1958n polettiis; eti nuuni heezzay deˈanawu gidiya keettaa shammidosona. Wurssettan nu soo asaara deˈiyoogaa doommido gishshawu keehi ufayttaas! SHin usuppun aginappe simmin, he ufayssay xayi bayiis. Ta aaway kansseriya harggiyan hayqqiis.

Taani keehi kayyottaas. Taani, “Xoossawu, ta aawaa ashshanaadan nena woossaas. I taappe shaahettanaadan koyikke. Ta woosaa ayssi zaarabeykkii?” giidoogaa hassayays. Ta aaway awan deˈiyaakko eranawu keehi koyaas. Taani, ‘I saluwaa biideeyye? Woy merinawu hayqqidi xayidee?’ gaada qoppaas. Qassi aaway deˈiyo naata qanaataas.

Daro layttawu, ubba galla giyoogaa keena ta aawaa duufoy deˈiyoosaa bays. Ta aawaa duufuwaa lanqqen gulbbatada, “Hayyanaa Xoossoo, ta aaway awan deˈiyaakko tana erissa” gaada woossays. Qassi nuuni merettidoy aybissakko eranawu maaddanaadankka woossays.

Tawu layttay 13 gidiyo wode Jarmmanettuwaa tamaaranawu kuuyaas. Jarmmanettuwan cora allaalliyaabaa yootiya daro xuufee deˈiyo gishshawu, ta oyshaa zaaruwaa hegaappe demmanaakkonne gaada qoppaas. Yaatada, 1967n he wode Arshsho Jarmmane bagga gidida, Yena kataman tamaariyoogaa doommaas. Jarmmane eranchchati xaafido, ubba qassi asaa deˈuwaabaa yootiya maxaafata yeemuwan nabbabaas. Taani eridobaa dosaas, shin ta oyshatussi loˈˈo zaaro demmabeykke. Zaaruwaa demmanawu woossiyoogaa aggabeykke.

Taani 1970n, Hanggaare simmaas; yaatada, guyyeppe ekkido Rooziira erettaas. He wode Hanggaaree Koministte haaruwan deˈees. Taani O ekka simmin takkennan Osttiriya biida. Guyyeppe Awusttiraaliyan ta aayee ishay deˈiyo Sidine katamaa baanawu giidi yaa biido.

Taani Osttiriyan sohuwaara oosuwaa demmaas. Issi gallassi, tanaara oottiyaagee taani ta oyshatu ubbawukka Geeshsha Maxaafaappe zaaruwaa demmana danddayiyoogaa yootiis. I Geeshsha Maxaafaabaa qonccissiya amarida maxaafata tawu immiis. Taani he maxaafata eesuwan nabbabada, gujja eranawu koyaas. Yaatada, he maxaafata giigissida Yihoowa Markkatussi dabddaabbiyaa xaafada hara xuufiyaakka koyiyoogaa yootaas.

Nu bullachchaa koyro layttaa bonchchiyo gallassi, Yihoowa Markka gidida issi yelaga Osttiriya asi Rooziiranne tanaara gayttanwu yiis. I taani oychchido xuufeta ekki yiidi, Geeshash Maxaafaa xannaˈanaadan tana shoobbin eeno gaas. Taani eranawu keehi koyido gishshawu, saaminttan naaˈˈuttoo xannaˈoos; xannaˈiyo wode ubban oyddu saate gidiyaagaa takkoos!

Yihoowa Markkati Geeshsha Maxaafaappe tamaarissidobay tana keehi ufayssiis. Eti Xoossaa sunttaa, Yihoowa giyaagaa Hanggaare qaalan xaafettida ta Geeshsha Maxaafaappe bessido wode keehi maalaalettaas. Taani woosa keettaa biido 27 laytta ubban, eti Xoossaa sunttaa xeesishin issitoonne siyabeykke. Ta oyshatuyyo Geeshsha Maxaafay ammanttiya qoncce zaaruwaa yootiyoogee tana maalaaliis. Leemisuwawu, hayqqida asay aynne erennaagaa, xiskkuwan kayrida asaa mala gidiyoogaa akeekaas. (Eranchchaa 9:5, 10; Yohaannisa 11:11-15) Qassi Geeshsha Maxaafay ‘hayqoy deˈenna’ ooratta alamee yaanaagaa yootiyoogaakka akeekaas. (Ajjuutaa 21:3, 4) He ooratta alamiyan ‘asay hayquwaappe denddiyo’ gishshawu, ta aawaara gayttanaagaa hidootan naagays.—Oosuwaa 24:15.

Roozakka tanaara issippe Geeshsha Maxaafaa ufayssan xannaˈiyoogaa doommaasu. Nuuni xannaˈiyo xuufeta naaˈˈu agina xallan xannaˈi wurssi aggida! Yihoowa Markkati SHiiquwaa Addaraashan shiiqiyo shiiqota ubbaa boos. Yihoowa Markkati issoy issuwaa siiqiyoogaa, maaddiyoogaanne eta issippetettaa beˈidi keehi ufayttida.—Yohaannisa 13:34, 35.

Taaninne Rooza 1976n, Awusttiraaliyan deˈanawu biida. Yaa biidi, Yihoowa Markkatuura sohuwaara gayttida. Yan deˈiya Yihoowa Markkati sohuwaara nuuni boorasennaadan oottidosona. Nuunikka 1978n Yihoowa Markka gidida.

Tana daro wodiyawu qofissiiddi takkida oyshatu zaaruwaa wurssettan demmaas. Xoossaa Yihoowakko shiiqiyoogan ooppenne aadhdhiya Aawaakka demmaas. (Yaaqooba 4:8) Qassi sinttappe yaana ooratta alamiyan tana yelida aawaara gayttanawu hidootan naagays; hegee tana keehi ufayssees.—Yohaannisa 5:28, 29.

Taaninne Rooza 1989n, nu ammanuwaabaa nu laggetuyyo, nu soo asaayyoonne yan nunaara gayttiya haratuyyo yootanawu Hanggaare simmanawu qofaa qachchida. Nuuni xeetan qoodettiya asawu Geeshsha Maxaafaa tamaarissiyo maataa demmida. Hegeetuppe ta aayyiyo gujjin, haˈˈi 70ppe dariyaageeti nunaara Yihoowayyo haggaazoosona.

Ta oyshatu zaaruwaa demmanawu 17 layttaa woossaas. Hegaappe simmin 39 layttay aadhdhikkokka, haˈˈikka woossays—Taani, “Saluwan deˈiya ta Aawawu, naatettan taani oychchido oyshata zaarido gishshawu nena galatays” gaana danddayidoy haˈˈa.