Amarkkan Kaliforniyaninne Baja Kaliforniya Mekisikon, Kaliforniya giruniyen giyo guutta moleti Pasifikke abbaa doonan phuuphulloosona. He moleti phuuphulliyo injje gallassatanne wodeta loytti eriyo gishshawu, eta marati qohettokkona.

 Hagaa qoppa: Aginay xeeriyo woy goobaniyo wode denddiya wolqqaama beetaappe simmin, heezzantto woy oyddantto qamma xallan giruniyeneti phuuphulloosona. Eti aginay xeeranaappe woy goobananaappe kasetiya qammatun phuuphulliyakko, abbaa doonan deˈiya shafiya meeccidi abban gelissiya wolqqaama beetay eta phuuphulliya efirggana. Shin, eti he beetay aadhdhi simmin sohuwara phuuphulloosona; beetay leppi leppi biyo wode phuuphulletu bolli shafee doorettiyo gishshawu qohettennan attoosona.

 Hegaa bollikka, eti phuuphulliyo ofinttaanne bone wodiyan ubbatookka gallassaappe aaruwan qammi beetay wolqqaamees; qassi hegee moleti haattaa wadhdhidi abbaa dooni haakkidi baanaadaaninne zaarettidi denddiya wolqqaama beetay eta phuuphulliyakko gakkennaadan maaddees.

 Giruniyeneti phuuphullanawu gita beetaa naagoosona; yaatidi abbaa doonan deˈiya shafiyakko gakkanawu banttawu danddayettida keenan haattaa wadhdhiiddi boosona. Haattay guyye simmiyo wode, maccaara irxxa shafiya washada ba goynaa kaseyada ba bollaappe baggaa shafiya giddon moogawusu. A ichchashaappe hosppun santti meetire gakkiya ciimman ba phuuphulleta dagayawusu; yaatin issi woy hegaappe daro attuma moleti yiidi he phuuphulleti maraa kukkumanaadan oottoosona. Hegaappe simmin, moleti kiyidi guyye abbawu simmanawu, zaarettidi denddiya wolqqaama beetaa goˈettoosona.

 Phuuphulleti irxxa shafiya giddon haphettoosona; shin eti qoxettanawu wolqqaama beetaa qaattay koshshees. Hegaa gishsawu, naaˈˈu saaminttaa gidiyagaappe simmin giruniyeniya marati zaarettidi denddiya wolqqaama beetaa wode qoxettoosona; shin kaalliya wolqqaama beetay denddanaashin oyddu saaminttawu naaganakka danddayoosona.

 Ne qofay aybee? Giruniyeneti awude qassi waati phuuphullanaakko lodda laamiyan eridonaayye, meretan eridonaa?