MPANTTA 8
Vaavo Enikhumela Aya Ehasara
“Ehal’ila ennosarihani otteliwa murima, vanamwi vaphaveleyaka wira ninlelo okathi vakhani muhaweke mwaha wo wehereriwa n’inamuna sinjene”.
Nnaamwi mwiimananihaka wira mukhalane ekasamento ni etthoko yoohakalaliha, pooti okhumelela itthu sahaalipelela anyu sikhanle oovukula ohakalala wanyu. (Musuweli 9:11) Moophenta, Muluku onninikhaliherya okathi ninkumana ahu mixankiho. Weettela malakiheryo a Biibiliya, onoowiirihani nyuwo ni etthoko anyu okhumela saana, hata mwa itthu sootepa oxankiha.
1 MMUROROMELEKE YEHOVA
ELE BIIBILIYA ONIHIMYA AWE: “Muhelé mmatatani mwawe ovelavela wanyu wothene, okhala wira owo onnokhapelelani”. (1 Pedru 5:7) Muupuweleke wira Muluku khahiyo tonikumiherya mixankiho sanyu. (Yakobo 1:13) Akhala wira munoomwaattamela Muluku, onimookhaliheryani wira mukhumele saana. (Yesaya 41:10) ‘Mmuhimeerye Yehova ovelavela wanyu wothene’.
Nave, munoowerya ophwanya nikhaliheryo mmusomaka Biibiliya khuta nihiku. Mwiira siiso, munimoona moota Yehova ‘onnihakalaliha awe mohawani mwahu mothene’. (2 aKorinto 1:3, 4; aRoma 15:4) Owo onnileiherya woovahani “murettele wa Muluku, onvikana osuwela wa mutthu”.
ELE EKHANLE ANYU OOPAKA:
-
Munvekele Yehova wira ookhaliheryeni okhala oomaaleleya ni wuupuwela saana
-
Muuluule itthu sotheene mukhanle anyu oopaka, ni muthanle ele eri yooreerexa
2 MWIIKHAPELELE NI MUKHAPELELE ETTHOKO ANYU
ELE BIIBILIYA ONIHIMYA AWE: “Murima wa mulipa-ànkhili onniphavela osuwela: màru a musuweli anniphavela miruku”. (Miruku 18:15) Musuweleke itthu sotheene siniiraneya. Mphavele osuwela sootthuneya sa khuta mutthu a vatthokoni. Nvaanele naawo ni mwaawiriyaneke.
Ankhi akhala wira ohookhwa ole mwamphenta anyu? Muhoovelele wooniherya ele eri vamurimani vanyu. Muupuweleke wira hata “Yesu ahinla”. (Yohani 11:35; Musuweli 3:4) Ophumurya ni orupa saana onnikhaliherya. (Musuweli 4:6) Opaka eyo onimookhaliheryani ovilela muxankiho.
ELE EKHANLE ANYU OOPAKA:
-
Ehinatthi okhumelela ehasara, mpake yoolema ovaanela ni etthoko anyu. Nto okathi wa mixankiho, atthu awo animoonaka okhweya olavula ni nyuwo.
-
Nvaaneleke ni ale atonko okumana muxankiho mmosaru
3 MWAAVYE OKHALIHERIWA
ELE BIIBILIYA ONIHIMYA AWE: “Mpatthani onimphenta mpatthani awe okathi t’ukathi: onnisuwanyeya okhala munnʼawe okathi w’oxanka”. (Miruku 17:17) Apatthani anyu anniphavela wookhaliheryani, masi awo pooti ohisuwela yoopaka. Muhoovelele waaleela ele enooxankihani. (Miruku 12:25) Nave, mwaavekeleke nikhaliheryo na omunepani ale animwiiwexexa Biibiliya. Malakiheryo a Biibiliya anrowa aya woovahani animookhaliheryani.
Nyuwo munoophwanya nikhaliheryo akhala wira munoothukumana ni atthu animwaamini Muluku ni aniroromela sooleiherya sawe. Nave-tho, munoophwanya ohakalala vaavo munaakhaliherya anyu ale anitthuneya olipihiwa. Mwaaleeleke ele enikupali anyu voohimya sa Yehova ni sooleiherya sawe. Muluttuweliweke waakhaliherya ale oothoiwa, ni muhiivalaanyeke ni ale anoophentani ni woocalani.
ELE EKHANLE ANYU OOPAKA:
-
Nvaaneleke ni mpatthani anyu ni munvekele nikhaliheryo
-
Muhimyeke saana sootthuneya sanyu ni mukhaleke oororomeleya