Yakobo 2:1-26
2 Annaka, okhala wira munnimwaamini Yesu Kristu Pwiya ahu, yoowo ovuwihinwe, xeeni waattittimihaka atthu akina, munaathanya akina?
2 Vakhala wira onnikela mmuthukumanoni mwanyu mutthu aawanre ene anela a eweero mukathani ni ikuwo sa musurukhu munceene, nave onakela mukina ori masikhini, owanre ene ikuwo soonanara,
3 niireke munoomwaakhela ni nttittimiho ole owanre ikuwo sooreera, mmuleelaka wira: “Iwo akilaathi nipuro nla nooreera”, masi munamuleela ole ori masikhini wira: “Nyuwo, mweemele-vo”, aahiiso: “Nyuwo, mukilaathi vathi-vo”?
4 Mwiiraka siiso, khahiyo wira munaathanla atthu? Khahiyo wira munaaphukela mwa enamuna yootakhala?
5 Annaka oophentiwa, nwiriyane. Niireke Muluku khaathanlale atthu anooniwa okhala amasikhini vathi-va, wira aakhalihe athaaciri moowaaminini ni waavaha Omwene, aaleihenrye awe ale animphenta?
6 Nyuwo khamunimuttittimiha masikhini. Khamunoona wira athaaciri ti yaawo anoohaaxani, ni wira ti yaawo anooroihani omilattuni?
7 Khahiyo yaawo aniveeha nsina nooloka nvahiwe anyu?
8 Vakhala wira munnitthara nlamulo nooreerexa, ntoko silempwe aya wira: “Mumphenteke mukhwiinyu ntoko muniiphenta anyu”, weeso munniira etthu yooreera.
9 Masi mwaathanlaka atthu, munnittheka; nave nlamulo nnimoolamulani* okhala anatampi.
10 Vakhala wira mutthu onniiwelela Nlamulo notheene, masi onatthekela yooruma emosa, mutthu owo ootthekela nlamulo notheene.
11 Tthiri Muluku yoowo ohimmye wira: “Muhiraruwe”, oohimya-tho wira: “Muhimwiive mutthu”. Vano, vakhala wira khamuniraruwa masi munnimwiiva mutthu, weeso munnitthekela nlamulo.
12 Mulavuleke ni mwiireke itthu sotheene ntoko atthu anrowa ophukeliwa ni nlamulo na atthu ootaphuwa.*
13 Mweekeekhai, ole ohinaamorela ikharari akina, onrowa ophukeliwa voohimoreliwa ikharari. Omoriwa ikharari ti wuulupale ovikana ophukela.
14 Annaka: akhala mutthu onihimya wira ookhalana waamini, masi ohinapaka itthu sooreera, mutthu owo oniphwanya-ni? Niireke waamini iwo onoowerya omoopola?
15 Yakhala axinna aahiiso axirokora, ahirina yoowara,* nnakhala yoolya eniphiyerya nihiku nlo,
16 hata vari siiso, mmosa a nyuwo onahimya wira: “Murooke ni murettele; mphwanye yoowara ni yoolya ya khula nihiku”, masi muhinanvaha yoolya aahiiso yoowara, moolumo anyu awo anrowa omukhaliherya sai?
17 Siiso-tho, waamini paahi, ohirina miteko, ti wookhwa.
18 Masi, mutthu pooti ohimya so: “Nyuwo mookhalana waamini, miyo kookhalana miteko. Mukooniherye waamini wanyu ohirina miteko, nto miyo kinowooniheryani waamini waka ni miteko saka”.
19 Kiira munnikupali wira Muluku ori mmosa? Munniira saana! Hata malaikha ootakhala annikupali ni annithukumela yoovaka.
20 Nto nyuwo muhirina ankhili, khamunisuwela wira waamini ohirina miteko khahiyo etthu?
21 Kiira tiithi ihu Abrahamu, aahihimmwa okhala naxariya mwaha wa miteko sawe nuumala onvaha mwanawe, Isaakhi, valtaari?
22 Nyuwo munnoona wira waamini wawe waanivara muteko vamosa ni soowiira sawe. Waamini iwo woomalelihiwa ni miteko.
23 Nto ehiiraneya yoolepa enihimya wira: “Abrahamu aahimwaamini Yehova, nto owo aahithokoreriwa okhala naxariya”, nave aahihimmwa okhala mpatthani a Yehova.
24 Moone wira mutthu onnikhalihiwa naxariya mwaha wa miteko sawe, ohiya mwaha wa waamini paahi.
25 Siiso-tho, yaahiiraneya ni Rahabi, namararuwa. Owo aahikhalihiwa naxariya mwaha wa miteko sawe, vaavo aawaakhenle awe saana anamahottela ni waakhaliherya otthyawa aviraka ephiro ekina.
26 Tthiri, ntoko erutthu ehirina okumi* eri aya yookhwa, siiso-tho, waamini ohirina miteko, ti wookhwa.
Inoota
^ Aahiiso, “nnimoopwapwelani”.
^ Ekereku, “nlamulo na otaphuwa”.
^ Ekereku, “khawanre etthu”.
^ Ekereku, “munepa”.
