Wiisuupulula 20:1-15
20 Nave kaahiweha nlaikha nikhuruwaka wiirimu, nikunxe ene exaavi ya nlitti noowiixa ni ekwirinti yuulupale mmatatani mwaya.
2 Nlaikha nlo naahivara enowa ele yuulupale, yeele ya khalai, eyo piiyo, Diabo ni Satana, nitthukwa mwa iyaakha 1.000.
3 Nlo naahirihela enowa ele mulittini moowiixa, nitthukwela memmo, khuhela ekanyeryo vasulu vaya, wira ehaahapuxe-tho atthu, mpakha omala iyaakha 1.000. Nuuvira iyaakha iyo, ehaana otaphuliwa okathi vakhaani.
4 Kaahiweha-tho ihice, nto ale yaakilaathenle ihice iyo yaahivahiwa owerya wira aphukeleke. Kaahaaweha ale yaiviwe* mwaha wa omukhalela onamoona Yesu, ni olavula itthu sa Muluku. Kaahaaweha-tho ale yahaakokhorenle enama yoowali aahiiso elatarato ya enama eyo, ni yahaaheliwe ekanyeryo vayuuci vaya, nnakhala vantatani vaya. Awo anootthikela okhala akumi, wira yalamuleleke ni Kristu ntoko mamwene, iyaakha 1.000.
5 (Atthu akina akhwiiye khantthikela okhala akumi mpakha omala iyaakha 1.000.) Nno ohihimuxiwa woopacerya.
6 Ale anrowa opacerya otthikela okhala akumi, toohakalala ni toowaarya, okhala wira okhwa wa nenli khonaawerya. Awo anrowa okhala anamukuttho a Muluku ni a Kristu, nave anrowa olamulelaka ni Kristu ntoko mamwene, iyaakha 1.000.
7 Vano, simalaka-ru iyaakha 1.000, Satana onootaphuliwa opuro otthukweliwe awe.
8 Nave, onrowa okhuma wira aahapuxeke atthu a maloko ari ipantte ixexe sa elapo ya vathi, eyo piiyo, Gogi ni Magogi, wira aathukumanye wira yawane ekhotto. Mwaattelo aya, onlikana ni mihaava sa mphareya.
9 Awo yaahimwareela mulaponi motheene ni yaahirukurerya muttetthe wa ale oororomeleya,* ni yaahirukurerya epooma eniphentiwa ni Muluku. Masi waahikhuma mooro wiirimu, khwaapaha atthu awo.
10 Nave Diabo, yoowo aahapuxa atthu awo, aahiriheliwa vantthiyani na mooro ni enxoofere, vaavo-tho vaariheliwe aya enama yoowali ni profeta oowootha. Awo anrowa ohaaxiwaka,* othana ni ohiyu, mahiku otheene ni voohimala.
11 Kaahiweha ehice yuulupale yootteela, ni kaahinweha Ole aakilanthi veehiceni-vo. Elapo ni erimu saahitthyawa ohoolo wawe, khuhiphwanyaneya-tho.
12 Kaahaaweha-tho alipa-ookhwa, aalupale ni acikhaani, yeemenle ene ohoolo wa ehice, nave saahihuliwa iroolu. Vano, yaahihuliwa eroolu ekina. Eyo ti eroolu ya okumi. Nto, alipa-ookhwa yaahiphukeliwa sitthariheliwaka miteko yaavanre aya, ntoko saalempwale aya murooluni-mmo.
13 Ephareya yaahaattikiha atthu yaakhwenle memmo. Okhwa ni Mahiye* yaahaavahererya alipa-ookhwa yaarina aya. Nto khula mmosa aahiphukeliwa sitthariheliwaka miteko saavanre awe.
14 Okhwa ni Mahiye* yaahiriheliwa vantthiyani na mooro. Ntthiya na mooro, ninthoonyerya okhwa wa nenli.
15 Nave-tho, otheene ale masina aya yahaalempwale muliivuruni mwa okumi, yaahiriheliwa vantthiyani na mooro.
Inoota
^ Ekereku, “yaiviwe ni maxatto”.
^ Ekereku, “ale oowaarya”.
^ Aahiiso, “okhoottihiwa; otthukweliwa”.
^ Nwehe Moolumo Ootthokiheriwa.
^ Nwehe Moolumo Ootthokiheriwa.