Miteko 7:1-60
7 Masi namukuttho muulupale aahikoha oriki: “Itthu iya ekeekhai?”
2 Siteefano aahaakhula wira: “Nyuwo anna ni axitiithi, mukiwiriyane. Muluku oovuwa, aahimukhumelela muhavinre ahu Abrahamu, nlelo okhalaka oMesopotamia, ohinatthi othaamela oHarani.
3 Muluku owo, aahimuhimeerya Abrahamu wira: ‘Mukhume elapo anyu ni mwaahiye amusi anyu, murowe elapo kinrowa aka owooniheryani’.
4 Siiso, owo aahikhuma elapo ya oKhaldeya, onarowa okhala oHarani. Nuumala paapa awe okhwa oHarani weiwo, Muluku aahimuthaamiherya elapo ela munikhala anyu.
5 Masi Muluku khanvanhe elapo ela, nnakhala opuro mwaamukhaani. Ohiya-vo, aahimuleiherya onvaha elapo ela, siiso elapo ela ti yawawe ni osuulu* awe. Abrahamu khaarina mwaana okathi Muluku aamuhimenrye awe moolumo ala.
6 Nave-tho, Muluku aahimuhimeerya Abrahamu wira osuulu* awe, waarowa okhala anamurwa elapo ehikhanle yawaya, ni atthu a elapo eyo yaarowa waakhaliha ipottha ni waahaaxa* mpakha iyaakha 400.
7 Muluku aahihimya wira: ‘Nto miyo kinoophukela elapo eyo enrowa waakhaliha ipottha. Nuumala itthu iya wiiraneya, awo anookhuma mulaponi-mmo, ni anrowa okikokhorelaka opuro yoola’.
8 “Muluku aahipaka nivarihano ni Abrahamu nenno naalipihiwa mwaha wa winnuwihiwa. Vano Abrahamu aahimuyara Isaakhi, ni aahimwinnuwiha nihiku na neethanu neeraru. Isaakhi aahimuyara* Yakobe, nto Yakobe aahaayara amuhavinre ahu* 12.
9 Amuhavinre ahu awo, yaahimukhalela nrima munnaya, Yosefe, ni yaahaatumiherya atthu a wExiitu. Masi Muluku aari nuuwo,
10 ni aahimoopola moohaawani mwawe motheene. Aahinvaha ankhili ni aahimwiiriha oreereliwa murima ni Farawo, mwene a wExiitu. Mwene owo, aahimuhela ekhulupale wira olamuleleke wExiitu ni etthoko yotheene ya mwene.
11 Masi, yaahikhumelela etala yuulupale elapo yotheene ya wExiitu ni oKanaani. Tthiri, waahikhumelela ohaawa wuulupale,* nto amuhavinre ahu khiyaawerya ophwanya yoolya.
12 Vano Yakobe aahiiwa wira yaahikhala yoolya* wExiitu, nto aahaaruma amuhavinre ahu, ekwaha yoopacerya.
13 Ekwaha ya nenli, Yosefe aahiisuweliha wa axinnawe, nave emusi ya Yosefe yaahisuweliwa ni Farawo.
14 Siiso, Yosefe aahiruma wiihaniwa Yakobe, paapa awe, vamosa ni amusi awe otheene wira akhume oKanaani arowaka wExiitu. Atthu ene yaaronwe wExiitu, yaari 75.
15 Vano Yakobe aahikhuruwa orowaka wExiitu, ni aahikhwa weiwo. Nave amuhavinre ahu yaahikhwa weiwo.
16 Nto yaahikuxiwa makhuva aya, aroihiwaka oSikhemi, ni yaahivithiwa mahiye Abrahamu aathumme awe ni anamwane a Amoori, oSikhemi.
17 “Waattamelaka okathi waarowa aya wiiraneya itthu Muluku aamuleihenrye awe Abrahamu, nloko nahu naahinnuwa, nincerereya vanceene wExiitu,
18 mpakha okhumelela mwene mukina wExiitu, yoowo ahaamusuwela Yosefe.
19 Mwene owo aahirumeela olavilavi wira aahaaxe atthu a nloko nahu, ni aahaakhanyererya axitiithi ihu waanyanyala anaaya, wira ahikhale akumi.
20 Okathi owo aahiyariwa Moise, yoowo aari ooreera vanceene ohoolo wa Muluku. Nave, owo aahaamwihiwa* miyeeri miraru vatthokoni va paapa awe.
21 Masi okathi axipapawe yaakhanyereriwe aya omuhiya, mwaana mwaamuthiyana a Farawo, aahimukuxa, onamuhuwa ntoko mwanawe.
22 Tivo, Moise aahiixuttihiwa osuwela wotheene wa wExiitu. Tthiri, aanilavula ni owerya, ni aanipaka itthu sinceene.
23 “Aaphiyerinhe awe iyaakha 40, Moise aahuupuwela* orowa waaxukurya* axinnawe, anaisarayeli.
24 Aahinweha mulopwana mmosa a wExiitu omuhaaxaka mwisarayeli, tivo aahimukhaliherya munnawe, omunlelaka ikuhu ni omwiiva mulopwana ole a wExiitu.
25 Moise uupuwela wira axinnawe yaamoona wira Muluku, aamurumeela owo wira owoopole, masi awo khiyoona siiso.
26 Mmeeloni mwaya, Moise aahaaphwanya axinnawe awanaka. Owo aaheererya owaataaniha, aahimeeryaka wira: ‘Alopwana, nyuwo mwa axinna. Xeeni munihaaxana anyu?’
27 Nto ole aamuhaaxa mukhwaawe, aahimukakha Moise, onamukoha wira: ‘Ti pani oothanlaleni wira munilamuleleke ni muniphukeleke?
28 Niireke muniphavela okiiva ntoko mmwiivale anyu mulopwana ole a wExiitu nsana?’
29 Okathi aiwale awe moolumo ala, Moise aahitthyawa, onarowa okhala ntoko namurwa elapo ya oMidiyani. Weiwo aahaayara anamwane anli.
30 “Nuuvira iyaakha 40, nlaikha naahimukhumelela Moise moothakoni wa omwaako Sinayi, vamiiwani* waapatta mooro.
31 Okathi Moise aawenhe awe eyo, aahitikinihiwa vanceene. Vano owo, aahaattamela wira awehe oratteene, nto naahiiwanyeya nsu na Yehova, nriki:
32 ‘Miyo ka Muluku a amuhavinre anyu, Muluku a Abrahamu, ni a Isaakhi ni a Yakobe’. Moise aahipacerya othukumela,* ohinaphavela-tho oweha.
33 Yehova aahimuhimeerya wira: ‘Murule isantaalya sanyu, okhala wira opuro muninyakela anyu, ti woowaarya.
34 Tthiri miyo kihoona ohaaxiwa wa atthu aka wExiitu, ni kihiiwa wuupulela waya. Tivo, kinookhuruwa wira kiwoopole. Vano murwe, koorumeeni wExiitu’.
35 Moise owo, ti yoole awo yaamukhoottale aya, yiiraka: ‘Ti pani oothanlaleni wira munilamuleleke ni muniphukeleke?’ Nto Muluku, aamurumme yoowo ntoko namalamulela ni moopoli, orumeelaka nlaikha, nenlo naamukhumelenle eriyari ya mwiri wa miiwa waapatta mooro.
36 Moise owo, aahaahoolela amuhavinre ahu, opakaka miteko sootikiniha ni miiriirya wExiitu, ni Ephareya Yooxeerya ni moothakoni mwa iyaakha 40.
37 “Moise owo, ti yoole aahimenrye aisarayeli wira: ‘Eriyari ya atthu a nloko nanyu, Muluku onimookumiheryani profeta ntoko miyo’.
38 Ti yoole aari ni aisarayeli moothakoni. Owo aari ni nlaikha naamulavulinhe omwaako Sinayi, vamosa ni amuhavinre ahu. Aahaakhela moolumo makumi a Muluku wira onivahe.
39 Amuhavinre ahu khiyaaphavenle omwiiwelela, masi yaahimukhootta. Vamurimani vaya, awo yaaniphavela otthikela wExiitu.
40 Nto yaahimuhimeerya Aroni wira: ‘Munipakele amuluku wira anihooleleke, maana khaninsuwela etthu emukhumelenle Moise, yoowo onikuminhe wExiitu’.
41 Siiso, okathi ole, yaahimpaka muluku eethiru, aalikana ni mwaanyompe, ananvaha mikuttho. Nave, yaahipaka efesta wira atthapele ele yaapanke aya.
42 Tivo, Muluku aahaanyanyala, aahiya wira akokhoreleke nsuwa, mweeri ni itheneeri sa wiirimu, ntoko silempwale aya eliivuru ya Maprofeta, wira: ‘Nyuwo atthu a Isarayeli, khahiyo mwaakivaha miyo mikuttho soovirikana mwaavaha anyu moothakoni mwa iyaakha 40.
43 Nyuwo mooteexa eheema ya Molokhi ni elatarato ya etheneeri, yeeyo eri muluku Refani. Iyo ti ilatarato mpanke anyu wira mukokhoreleke. Tivo, kinimooroihani ottaiwene, ovikana oBabilonia’.
44 “Amuhavinre ahu, yaahikhalana eheema ya nivarihano* Muluku aapanke awe moothakoni, siisaale aamurumme awe Moise, wira opake ottharaka ntakiheryo oonale awe.
45 Muhoolo mwaya, anaaya amuhavinre ahu, vamosa ni Yoxuwa, yaahikuxa eheema eyo, aroiha elapo ya atthu akina, yaawo Muluku aawoomonle awe ohoolo wa amuhavinre ahu. Eheema eyo yaahikhala weiwo, mpakha mahiku a Davidi.
46 Owo aahireereliwa murima ni Muluku, ni aahivekela ovahiwa eparakha ya omutekela empa Muluku a Yakobe.
47 Masi Salomoni taamutekenle empa Muluku.
48 Muluku Muulupalexa, khonikhala ipa sitekiwe ni matata, ntoko profeta ohimyale awe wira:
49 ‘Yehova onihimya wira, erimu ehice aka, nave elapo ti opuro kinipweherya aka inawu saka. Nto, empa xeeni munrowa anyu okitekela? Aahiiso, nipuro xeeni kikhanle aka oomaka?
50 Kiira ti miyo kipanke itthu iya sotheene?’
51 “Nyuwo atthu oowiisoona, ni ahiniphavela wiiwa ni oowuumiha murima, okathi wotheene munnikhootta munepa woowaarya. Nyuwo munniira ntoko siirale aya amuhavinre anyu.
52 Profeta xeeni amuhavinre anyu ahimulupantthe aya? Awo aawiiva ale yaalaleya wira aamoorwa naxariya, yoowo nyuwo munvarinhe anyu ni mmwiivale anyu.
53 Muluku aahiruma malaikha woovahani Nlamulo, masi nyuwo khamwiiwelenle”.
54 Vaiwale aya itthu iya, awo yaahinanariwa vanceene vamurimani vaya, nave yaanilumanyiha maino anwehexexaka Siteefano.
55 Masi, Siteefano osareyale ene munepa woowaarya, aahiweha wiirimu ni aahoona ovuwa wa Muluku, nave aahimoona Yesu eemenle ene moono woolopwana wa Muluku.
56 Vano aahihimya wira: “Mooneke! Kinniweha erimu ehuleyale ene, ni kinninweha Mwaana a mutthu eemenle ene moono woolopwana wa Muluku”.
57 Siiso, yaahikhuwela ni ikuru saya sotheene, ni yaahittiyela maaru aya ni matata. Vano otheene aya yaahimutuphela.
58 Nuumala-vo, yaahimpurulela ota wa epooma, anapacerya onvonyakasa maluku. Nto anamoona oowootha, yaahimuhiyerya malaya aya a ota, mmiravo mmosa aihaniwa Saulo.
59 Okathi yanvonyakasa aya maluku Siteefano, owo aahixonttela oriki: “Pwiya Yesu, mwaakhele okumi aka”.*
60 Nuumala-vo, aahikokhora, onakhuwela vanceene, oriki: “Yehova, muhaavahe nthowa mwaha wa etampi ela”. Ahimyaka-ru siiso, owo aahikhwa.*
Inoota
^ Ekereku, “mmiso”.
^ Ekereku, “mmiso”.
^ Aahiiso, “waahasula”.
^ Aahiiso, woonasa wene: “aahiira etthu emosa-ru ni”.
^ Aahiiso, “axitiithi ihu”.
^ Ekereku, “maxakha maalupale”.
^ Aahiiso, “saahikhala ipyo”.
^ Aahiiso, “aahihuuwa”.
^ Aahiiso, “aahilakela”.
^ Aahiiso, “oweettelela”.
^ Onihimmwa mwiri mwaamukhaani orina miiwa.
^ Aahiiso, “ottettemela”.
^ Aahiiso, “eheema yooniherya wira Muluku aari naawo”.
^ Aahiiso, “ikuru sa okumi”. Ekereku, pneuma.
^ Ekereku, “aahirupa”.
