aFilipi 2:1-30
2 Axinnaka, okhala wira muhiiraana ni Kristu, okhala wira munnaalipiha ni waamaaliha akina mwaha woowaaphenta, okhala wira munnaathokorerya akina, mwaaphentaka ni mwaamorelaka ikharari,
2 nto mukitteeliheke murima mooniheryaka wira murina muupuwelo mmosa-ru, niphento nimosa-ru ni muhiiraana voomalela ni munoolikana muupuwelo.
3 Muhiireke itthu mphavelaka oxinttana wala wiittottopa, nto mwiiyeviheke, khula mutthu awooneleke vatthu akhwaawe ovikana mmensawe.
4 Muhiphaveleke mureerelo anyu paahi, masi-tho mphaveleke mureerelo wa akina.
5 Muhihiye okhalana muupuwelo ni moonelo ola, yoowo aarina awe Kristu Yesu.
6 Nnaamwi owo aari ntoko Muluku, khaaphavela omwaakha Muluku okhulupale awe, iilikanyihaka ni Muluku.
7 Nnaari, masi owo aahileva sotheene aarina awe, aaheemererya okhala epottha ni aahiikhaliha pinaatamu.
8 Nave-tho, nuumala okhala pinaatamu, aahiiyeviha ni aahiiwelela mpakha okhwa, mpakha okhwa vamwirini wa nihaaxeryo.*
9 Tivonto, Muluku onvuwiha vanceene, oomureerela murima, khunvaha nsina ninvikana masina makina otheene,
10 wira otheene amukhoromele* Yesu, akhale ale ari wiirimu, ari elapo ya vathi ni ari vathi va elapo.*
11 Nave, atthu otheene ahaana weemererya wira Yesu Kristu tori Pwiya, wira avuwihiwe Muluku Tiithi.
12 Siiso, axinnaka oophentiwa, nyuwo muhiiwelela okathi wotheene, ohiya paahi okathi kaari aka ni nyuwo, masi vootepa vano kiri aka ottaiwene. Mwiimananiheke vanceene wira moopoliwe ni Muluku, mmuttittimihaka yoowo ni omoova.
13 Tthiri, mwaha wa onireerela wawe murima, Muluku onnikumiherya mwa nyuwo ophavela ni owerya ovara muteko.
14 Mwiireke sotheene muhinlaseyaka nnakhala onyakulihana,
15 wira mukhale ooreera murima ni oohittheka, anamwane ooloka a Muluku, eriyari ya nloko nla nootakhala ni noohiloka. Nto nyuwo munnaarya eriyari aya ntoko mithuko sa mulaponi,
16 nvarexexaka oratteene nuulumo na okumi. Siiso, miyo kinookhalana mathowa ootteeliwa murima nihiku na Kristu, kisuwelaka wira nkitthimanke mahala nnakhala nkivanre muteko mahala.
17 Masi, nnaamwi kimwarexiwaka ntoko mukuttho wa yoovaha ya eviinyu wira kikhaliherye muteko wa Muluku, kinnihakalala vanceene vamosa ni nyuwo, okhala wira waamini wanyu, woowiirihani nave opaka etthu emosa-ru.
18 Nyuwo-tho, mutteeliweke murima, mutthapeke vamosa ni miyo.
19 Kinniroromela mwa Apwiya Yesu wooruuhelani Timootheyo voohipisa, wira miyo kilipihiwe ni ihaali sanyu.
20 Nkirina-tho mutthu mukina oowiivahererya siisa, onrowa woothokoreryani vanceene,
21 okhala wira atthu akina otheene aniphavela mureerelo aya paahi, khaniphavela itthu Yesu Kristu oniphavela awe.
22 Masi nyuwo moosuwela oratteene wira owo ohiivahererya ovara muteko ni miyo, olaleyaka ihapari sooreera, ntoko mwaana onivara muteko vamosa ni paapa awe.
23 Tivonto, ti yoowo onimuroromela aka wooruuhelani voohipisa, kasuwela vanrowa aya omalela mulattu aka.
24 Tthiri, kinnikupali mwa Apwiya wira voohipisa, nave miyo kinimoorwa.
25 Okathi ola kinnoona oreerela wooruuhelani Epafrodito, munnaka onvarana aka muteko, yoowo-tho ori nakhotto a Kristu. Ti yoowo mwaakiruuhenle anyu wira okikhaliheryeke ni itthu saakithowa.
26 Vano onniphavela vanceene woowehani otheene anyu. Owo ooriipiwa murima vanceene maana oosuwela wira nyuwo muhiiwa wira anwereiwa.
27 Mweekeekhai, owo aahiwereiwa onahala vakhaani okhwa, masi Muluku ommorela ikharari, ohiya owo paahi, masi-tho ookimorela ikharari miyo, wira kihitepe oriipiwa murima.
28 Tivonto, kinnimuruma orwa voohipisa wira mutteeliwe-tho murima mwanweha, nave oxanka waka ovukuwe.
29 Mmwaakhele ntoko muniwaakhela anyu awiixutti a Apwiya. Atthu siisa, mwaattittimiheke.
30 Owo aahanle vakhaani okhwa mwaha wa muteko wa Kristu,* aahileva okumi awe wira okikhaliheryeke, okhala wira nyuwo muri ottaiwene.
Inoota
^ Nwehe Moolumo Ootthokiheriwa
^ Aahiiso, “amuttittimihe”.
^ Eyo piiyo, alipa-ookhwa yaawo anrowa ohihimuxiwa.
^ Aahiiso, woonasa wene: “muteko wa Apwiya”.
