RENEÉ, murokora yoowo orina iyaakha sinaattamela 35, ohuuwale emusi ya Anamoona, yaawo yaakhalela nthiti muteko woolaleerya wAustralia. Owo onihimya so: “Hiyo naanihakalala vanceene okathi naakhaliherya ahu mittetthe soothowa anamalaleerya a Omwene. Paapa aka ni Maama aka yaanipaka itthu sooreera ni saanihakalaliha! Nto okathi kaarina aka anamwane anli kaahilakela owiirelaka sisaale ntoko anamuyari aka yaakiirela aya”.

 Iyawe Reneé oniitthaniwa Shane, munna orina iyaakha sinaattamela 40, aarina soolukama imosaru. Owo onitthokiherya so: “Nuumala omuyara mwanihu a nenli, naahisoma wa erevista Owehaweha, yeeyo yaalavula sa emusi emosa ya Anamoona yaaronwe mapuro oorakamela a oPacífico ni barco aya arowaka olaleerya esisiro eniitthaniwa Tonga. * Erevista eyo yaahiniiriha olepa epaphelo niroihaka wAustralia ni efiliyaali ya Anamoona a Yehova ya oNova Zelândia nikohereryaka muttetthe woothowa anamalaleerya a Omwene. * Nto nahaakhuliwa nivekeliwaka orowa oTonga—Nipuro nenne naasomme ahu murevistani!”

Nuumala Shane, Reneé ni anaaya yiitthaniwa Jacob ni Skye orumeela elapo ele muhina mwa eyaakha emosa, yaahikhuma moohilakela atthikelaka wAustralia mwaha wa owana-wana waakhumelela elapo ele ya oTonga, masi nlelo yaahikhalana yoolakela aya ya olaleerya mapuro makina. Eyaakha ya 2011, yaahithaamela Esisiro ya Norfolk, esisiro yaamukhaani ya oPacífico, enikhala ikiloomu 1500, okhuma wAustralia. Exeeni yaakhumelenle? Jacob, vano orina iyaakha 14 onihimya so: “Tthiri Yehova aahinikhapelela ni aahinikhaliherya wira nisiveliweke ni muteko woolaleerya!”

Ntoko Shane, Reneé ni anaawe, imusi sikina sa Anamoona a Yehova sinniivahererya ni murima wotheene orumeela “mapuro oothowa anamalaleerya”. Exeeni eniwiiriha opaka eyo?

Burnett ni Simone, anamathelana yaawo arina iyaakha sinaattamela 30, vamosa ni anaaya, Eston ni Caleb, arina iyaakha 12, mukina 9, aathaamela oBurketown, muttetthe mmosa woorakamela wa Queensland, wAustralia. Burnett onitthokiherya oriki: “Anamoona yaalaleerya muttetthe ole ekwaha emosa khula iyaakha thanu wala ixexe. Atthu anceene yaanisiveliwa ni ihapari sooreera. Nto naaphavela wira atthu awo amwiixutteke Biibiliya moohihiyererya”.

Mark ni Karen, yaawo vano arina iyaakha sinaattamela 55, yaawo arumeelale miloko soovirikana waattamela oSydney, wAustralia, ahinatthi waayara anaaya araru, Jessica, Jim, ni Jack, yaahithaamela oNhulunbuy, muttetthe woorakamela waathimpwa eweero. Mark onihimya so: “Kinnaaphenta atthu, nto kaaphavela orumeela muloko ohireere miteko ni woothowa anamalaleerya”. Wuupaceryani, Karen aanoovelela othaama. Nto owo onihimya so: “Masi nuumala woovelela, Mark ni akina yaahikilipiha. Nto kaaheererya othaama. Vano nkinithanana ni yoothanla aka!”

Mwaakha wa 2011, Benjamin ni Carolyn ni anaaya anli acikhaani, Jade ni Bria, yaahikhumasa oQueensland, wAustralia, arowaka oTimor-Leste, elapo yaamukhaani ya esisiro ya oTimor yeeyo eniirela mpantta isisiro sa wIndonesia. Ben onihimya so: “Miyo ni Carolyn noorumeela ntoko mapioneero a vameekhaaya oTimor-Leste. Naanisiveliwa vanceene muteko waavara ahu, ni anna yaanikhaliherya. Vaahiniwereya vanceene okhuma. Masi naahilakela otthikela-tho. Nuumala waayara aniihu, naahimunteerya palano ahu, masi khinaamuliyanle”. Carolyn onnincererya oriki: “Naaphavela wira aniihu yaalimalele mamisionaario, maBethelita ni mapioneero a vameekhaaya wira yaakhaliherye okhalana soolukama soomunepani”.

Yesu aahaaleela atthareli awe wira: “Tthiri t’ani a nyuwo, àphavelaka oteka empa yorekama, ahinapajerya okilathi, khupuwela musurukhu orina awe okumiha, wira asuwele waphiyeryaka omalihana?” (Luka 14:28) Moolikanasa, okathi emusi enuupuwela aya othaamela mapuro makina, vannireerela ompaka palano oratteene. Etthu xeeni woonasa wene enireerela aya wuupuwelela?

WIILOKIHERYA MOOMUNEPANI: Ben onihimya so: “Naaphavela waarumeela akina ohiya waavaha muteko. Tivo, nihinatthi othaamela opuro mukina nahiilokiherya momunepani. Nave naahincererya muteko ahu woolaleerya ni miteko sikina sa mmulokoni”.

Jacob yoowo oromoliwe wanipacerya, onihimya so: “Nihinatthi othaamela Esisiro ya oNorfolk, naahisoma soowiiraneya sa mookumini siniphwanyaneya mu irevista sa Owehaweha ni Despertai! voohimya sa imusi sathaamenle mapuro oothowa anamalaleerya. Naanithokorerya mixankiho imusi iyo saakhalana aya, ni moota Yehova aakhaliherya awe”. Murokora awe a iyaakha 11 oniitthaniwa Skye, aahihimya-tho wira: “Kaanivekela ikwaha sinceene mekhaka, ni kinari ni Maama aka ni Paapa aka!”

 OLOKIHERYA MUUPUWELO: Reneé onihimya so: “Vaamukikhweela ohithaama muttetthe aka, maana amusi aka ni apatthani aka yaari vakhiviru. Masi ohiya wuupuwela itthu kaarowa aka ohiya ottuli, kaanuupuwelela mireerelo kaarowa aka ophwanya kathaama vamosa ni emusi”.

MAKHALELO OOVIRIKANA: Imusi sinceene sinniphavela vahinatthi, osuwela oratteene opuro onithaamela aya. Mark onihimya so: “Naahisoma itthu sinceene voohimya sa elapo ya Nhulunbuy. Anna anikhala mapuro awo yaahiniruuhela ikoopiya sa ijornale, nto naanisuwela sa atthu anikhala mapuro awo ni makhalelo aya”.

Shane, yoowo aathaamenle Esisiro ya oNorfolk, onnihimya-tho so: “Yoolakela aka yaari wooniherya mikhalelo sa eKristau. Kaanisuwela wira kakhala ooreera murima, oowiimaaliha, oororomeleya ni ooluttuweliwa muteko, kanwerya okhala khula nipuro”.

Wira mutthu akhumele saana “mapuro oothowa anamalaleerya”, vanitthuneya ohivarexexa moonelo awe okathi omphwanyiwa awe mixankiho ahaalipelela awe. Muthokorerye matakiheryo ala:

Reneé onihimya so: “Kaahiixutta inamuna soovirikana sa opaka itthu. Mwa ntakiheryo, vaavo mawimpi anaatta aya ephareya ya oNorfolk, apakiti khaniwerya ophiya nto yoolya ennithowa. Okathi onaapeya aka, kihaana ophima oratteene yoolya”. Iyawe, Shane, onnilavula-tho oriki: “Ninnilokiherya inamuna sinirumeela ahu musurukhu ahu”.

Mwanaya oniitthaniwa Jacob, onnilavula mixankiho sikina oriki: “Muloko onirumeela ahu vano, orina paahi atthu 7, ni otheene aya toowunnuwela. Nto nkaarina mpatthani orina aka iyaakha imosaru. Masi okathi kaalaleeryaka ni anna awo owuunuwela, naahikhala apatthani moohipisa”.

Jim, yoowo vano orina iyaakha 21, waahimphwanya muxankiho mmosaru. Owo onihimya so: “Muloko waattamenle ni Nhulunbuy, waari ikiloomo 725, nto naanittottela mureerelo vanceene okathi wa asembeleya ni kongresu. Naanaakuva ophiya wira nahakalaleke ni annihu ni arokora. Nto naanoona okhala okathi woohakalaliha!”

Biibiliya onihimya wira: “Ojaliwa w’Apwiya onniraliha”. (Mir. 10:22) Olumwenku wotheene, atthu yaale anirumeela mapuro oothowa anamalaleerya, ahoona wira masu ala ahaakhwanela mookumini mwaya.

Mark onihimya so: “Othaamela muttetthe woothowa anamalaleerya ohaakhaliherya aniihu. Ale naapacenrye ahu waayara anniroromela wira Yehova onimwaakhaliherya otheene yaale anipweha nipuro noopacerya Omwene wa Muluku. Ororomela iwo khonithummwa”.

Shane onihimya so: “Kihaataana vanceene ni mwaaraka ni anaaka. Kinnihakalala vanceene owiiwa yaalavulaka enamuna Yehova onaakhaliherya awe”. Mwanawe oniitthaniwa Jacob, onilavula oriki: “Vaakiisivela vanceene orwa opuro ola. Kinnixukhurela vanceene!”