Yesu aahimmye so: “Maloko makina anovirikanya maloko makina, omwene omwene mukina. Sinokhumelela itetere sulupale; mapuro manjene anorwela iretta n’itala”. (Luka 21:10, 11) Ntoko siisaale impressão digital ennikhaliherya aya omusuwela mutthu, itthu Yesu aahimmye awe saamooniherya oratteene wira “Omwene wa Muluku ohàttamela”. Niireke itthu iyo sinniiraneya olumwenku wotheene? Nrowe niwehe.

1 IKHOTTO

Mwaakha wa 1914, yaahipacerya ekhotto yahaatonko okhumelela, okhuma vaavale apinaatamu apattuxiwe aya! Alipa-oolepa sowiiraneya anihimya wira 1914 waari mwaakha wa marukunuxo maalupale, mwaha woowi yaahipacerya Ekhotto Yoopacerya ya Olumwenku Wotheene. Khisaatonko orumeeliwa ibomba, iviyau sa ekhotto, ikapwitthi, akaaxi ootakhala ni ikaruma sikina sa ekhotto soowiiva ovikana khalai. Moottharelana yaahikhumelela Ekhotto ya Nenli ya Olumwenku Wotheene, yeeyo sahaareere orumeeliwa ibomba sootakhala. Tthiri okhuma 1914, saahikhumelela ikhotto ilapo sinceene seiyo saawiivale atthu anceene.

2 ITETERE

Eliivuru Britannica Academic, ehimmye wira khula mwaakha sinnikhumelela itetere 100 seiyo “sinihonona itthu sinceene”. Nave Serviços Geológicos ya wEstados Unidos ehimmye wira “moovarihana ni irelatoorio (okhuma 1900) khula mwaakha sinnivira itetere 16 suulupale”. Atthu akina anihimya wira olelo-va itetere sinootepa mwaha woowi khula nihiku ninniiwa wira itetere sookhumelela. Tthiri itetere iyo sinnikumiherya ohaawa wuulupale ni sinniwiiva atthu anceene.

3 ETALA

Olumwenku wotheene, etthu enitepiha etala mwaha wa ikhotto, makhwankwa, othowa musurukhu ni ohisuweliwa makhalelo a olima. Erelatoorio ya 2018 ya Organização Mundial de Alimentação enihimya so: “Olumwenku wotheene atthu imilyau 821 annivoliwa etala ni eriyari ya atthu awo imilyau 124 annivoliwa etala ehinimala”. Nave anamwane anivikana imilyau 3.1 annookhwa khula mwaakha. Mwaakha wa 2011, ohilya saana woowiiva anamwane 45 pursento, olumwenku wotheene.

4 IRETTA NI IKWERERE

Eliivuru emosa ya Mutthenkeso wa Okumi wa Olumwenku Wotheene enihimya so: “Iyaakha iya 20 sivinre, sookhumelela iretta ni ikwerere sinceene. Iretta sa khalai ntoko koolera ni febre amarela sootthikela, nave sookhumelela iretta isya sootakhala ntoko kamasi, SARS [síndrome respiratória aguda severa], MERS [síndrome respiratória do Médio Oriente], Ebola ni Zika”. Nnaamwi masientista ni mameediku asuwenle ene moota wooloola iretta, awo khawenrye ophwanya moota wooloola iretta sotheene.

5 OLALEIWA IHAPARI SOOREERA OLUMWENKU WOTHEENE

Yesu aahihimya etthu ekina yaarowa wooniherya wira Omwene ori vakhiviru. Owo aahimmye so: “Ehapar’ila yorera y’Omwene wa wirimu enolaleiwa mulaponi mothene, wira maloko othene esuwele, yamini. Vano-nto olumwenk’ula omaleke”. (Matheyo 24:14) Nnaamwi olelo-va, olumwenku ola osareyale ene mixankiho, atthu anivikana imilyau 8 olumwenku wotheene, annilaleya ihapari sooreera sa Omwene wa Muluku ilapo sinivikana 240 ni mattaava anivikana 1.000.

Itthu Yesu aahimmye awe wira saamwiiraneya, sinnikhumelela olelo-va. Xeeni vanireerela aya ovaha efaita? Mwaha woowi, Yesu aahimmye so: “Monakaru iya sìraneyaka, musuweleke wira Omwene wa Muluku ohàttamela”.—Luka 21:31.

Ikanyeryo Yesu aahimmye awe ipantta sikina sa mBiibiliyani sinninikhaliherya osuwela wira Omwene wootikitheriwa wiirimu mwaakha wa 1914. * Mwaakha wa 1914, Yesu Kristu tokhalihiwe awe Mwene a Omwene wa Muluku. (Esalimo 2:2, 4, 6-9) Moohipisa Omwene wa Muluku onrowa olamulelaka valaponi, opwetexa ikuvernu sotheene sa apinaatamu ni wiiriha elapo okhala eparayiisu. Tthiri okathi owo, apinaatamu anrowa okhalaka mahiku otheene.

Moohipisa animwiiraneya moolumo a nivekelo na ntakiheryo na Yesu oowi: ‘Omwene anyu orwe . . . otthuna wanyu wireye ntoko wirimu siso vathí-va’. (Matheyo 6:10) Masi, etthu xeeni Omwene onipaka aya okhuma okathi opacenrye awe olamulela mwaakha wa 1914? Exeeni enrowa wiiraneya vaavo Omwene onrowa aya olamulelaka valaponi?