Muru nsommahu woopatxerani, nohiiwa ithoonyero Yesu ahimmaawe. Ithoonyero iyo, sinnonihera weera Omwene wa Muluku wootikitheriwa wiirimu, ni Yesu tori mwene.

Biblya aathaliha weera, Yesu akhalaru mwene, aarowa omwiikara Satana ni mademoniyu awe wiirimu. Mene miteko sa Satana khasineetta nnene elapo ya vathi, nto okhuma eyaakha ya 1914 onootepa okumiha maxupo elapo ela.— Apokalise 12:7, 9.

Hata makhalelo a elapo yootheene eriki otepa onanara, Yesu ntoko mwene a Omwene wa Muluku, onnaakhavihera atthu a elapo yootheene. Owo onnaakhavihera atthu ni muteko onvariwa elapo yootheene, aani woomuxuttera Biblya. Nto atthu antxipale annaxuttera ni annivarela muteko malamulo ari mBiblyani. (Yesaya 2:2-4) Imiliyawu sintxipale saatthu, sooxuttera okhalano moonelo wooreera woohima sa muteko, ni ekumi ya vatthokoni. Annikhalano tho moonelo wooreera woohima sa muhakhu weera ehikhale akaporo a muhaku aya. Atthu awo annixuttera moota woottottela mureerelo Omwene owo vanano vaava. Ni aniilipihera okhala atthu oophwanelela Omwene eene yoowo.

Ekhaikhai weera Yesu onnilamulela wiirimu, mene elapo ya vathi enlamuleliwa ni iguvernu saatthu. Nto Muluku oomuleela Yesu weera: “mulamule variyari va amwittan’anyu” (Nsalmu 110:2) Moohilekela, Yesu onrowa waanyanya ootheene ale ari amwiittani awe. Mene onoowiitthuwiha oottheene yaale anamwiiwelela Muluku.

Ehuhu eene yeeyo, Omwene wa Muluku onrowa opaka etthu.

• Omaliha ittiini soowotha. Ittiini seiyo sinxuttiha ithiru voohima sa Muluku, ni sinakumihera maxupo ikumi saatthu. Biblya onniitthana ittiini iyo soowotha okhala muthiyana ooraruwa. Onyanyiwa wa ittiini iyo soowotha, onrowa okhala ntoko etxitopa ya atthu antxipale.— Apokalise 17:15, 16.

• Onoomaliha iguvernu sa atthu. Omwene wa Muluku onoswanye ni onoonyaanye imwene sothene sikina, yowo okhalaka wa mahiku othene. Nto onookhale omala wa iguvernu saatthu. — Apokalise 19:15, 17, 18.

• Wiiviwa wa atthu oonanara murima. Eheeni enrowa okhumelela ni atthu ale anipaka itthu soonanara, ekhoottaka omwiiwelela Muluku? “Vahera atakhali enehononiwe mulaponi”. — Miruku 2:22.

• Satana ni malaika awe anoovonyeriwa moowixa. Satana ni malaika awe yavonyeriwa moowixa, khanrowa owera “othweleliha miloko s’atthu”.— Apokalise 20:3, 10.

Mwa sootheesene iya sithalihiwe, sintaphulela eheeni wa atthu ale anaakhulela Omwene wa Muluku?

Omwene owo onnalamulela wiirimu, nave Yesu onoopaka itthu sintxipale sihipakiwe ni mamwene ootheene a elapo ela ya vathi. Ni owo onrowa olamulelaka ni atthu 144.000 yaawo athanlinwe variyari va atthu. (Apokalise 5:9, 10; 14:1, 3) Owo onamweeriha weera yootthuna ya Muluku, epakeye elapo ela ya vathi. Omwene wa Muluku onaapake eheeni ni atthu anikhala elapo yootheene ya vathi?

• Onoomaliha iretta ni okhwa. “Khavo anahime: kòvoreiwa” ni “okhwa khorwa okhala”. — Yesaya 33:24; Apokalise 21:4.

• Onooruha murettele ni ovareleleya. “Murettele wa anamwan’á onokhale mutokotoko” ni ‘mutthu ti mutthu anakilathi vamutusini va eviny’awe ni efigu awe’. — Yesaya 54:13; Mikeya 4:4.

• Owo onoonivaha muteko wooreera. “Òthanliwa aka enelawihe sowima sa miteko sa matat’aya, khanrowa okhulumuwa siyonvene.”— Yesaya 65:22, 23.

• Onoomaliha maxupo a etthaya.“Nikare ni ehewehewe, sitthape, Musatala ohakalale ni ottuve ntoko tuthuli.”— Yesaya 35:1.

• Onnaaxuttiha atthu moota woophwanya ekumi yoohimala. ‘Ela ti ekumi yoohimala wi yaale yòsuwenle weyo Muluku mmosá a ekhaikhai ni ole omurummawe, Yesu Kristu.’— Yohani 17:3.

Muluku onttthuna weera nyuwo muttottele mureerelo eparakha ela. (Yesaya 48:18) Muru onttharelana, onrowa ohima eheeni mukhanla anyu oopaka weere mweerele empari itthu iyo sooreera sinrowa weereya muhoolo.