Noantri, Testimònie de Geovà, credemo sol in quel che ghen’è nela Bìblia. Alora, quando capimo meio qualche insegnamento dela Bìblia, noantri cambiemo le nostre credense. a

 Questi cambiamenti i ze de acordo con quel che la Bìblia la dise in Proverbi 4:18: “Ma la strada del giusto la ze come la luce che la slusa ala matina, che la sciara cada volta de pi fin che pròpio sciara el di.” Intanto che el sol el sciara, semo boni de veder cada volta meio quel che ghen’è intorno de noantri. Dio el fà compagno cole verità dela Bìblia. Lu el ne giuta a capirle cada volta meio nel so tempo. (1 Piero 1:10-12) E la Bìblia la dise che lu l’è drio far questo ancora de pi adesso che semo drio viver nel “tempo del fin”. — Daniel 12:4.

 Alora, no ghemo de farse maraveia gnanca catar strànio questi cambiamenti. Anca arquante persone che le adorea a Dio nel passà ghe ga tocà cambiar la so maniera de pensar parché la era sbaliada. Par esémpio:

•   Moisè el pensea che l’era bon de libertar la nassion de Israel. Ma l’è stà sol 40 ani dopo che Dio el ga assà che lo fesse. — Ati 7:23-25, 30, 35.

•   I apòstoli no i gavea capio quel che le Scriture le disea sora la morte e ressuression del Messia. — Isaia 53:8-12; Mateo 16:21-23.

•   Arquanti dei primi dissìpoli de Gesù del passà i gavea idee sbaliade sora quando che saria el “giorno de Geovà”. — 2 Tessalonissensi 2:1, 2.

 Dopo de un tempo, Dio li ga giutadi a capir meio sora quel che i pensea. Ancoi preghemo che Dio el giute anca a noantri a capir meio le nostre credense e cambiar quel che ocore. — Tiago 1:5.