El Corpo Governante l’è un pìcolo grupo che el tende del laoro dele Testimònie de Geovà in tuto el mondo. Questi bravi fradei i ga due laori importanti:

•   Lori i parecia la istrussion dela Bìblia che vien par meso dele publicassion, dele riunion e dele scole dele Testimònie de Geovà. — Luca 12:42.

•   Lori i organisa el laoro de predicassion che le Testimònie de Geovà le fà in tuto el mondo e i desside come i donativi i sarà doperadi.

 El Corpo Governante el fà compagno i “apòstoli e i ansiani” de Gerusalen, che i dessidia tante robe importante par le congregassion del primo sècolo. (Ati 15:2) Lori no i ze mia i lìderi dela nostra organisassion. El Corpo Governante el sa che Geovà el ga dato a Gesù la autorità sora la congregassion. Par quela, lori i va in serca dele orientassion dela Bìblia. — 1 Corinti 11:3; Efesi 5:23.

 I fradei del Corpo Governante i ze David Splane, Gage Fleegle, Geoffrey Jackson, Gerrit Lösch, Jeffrey Winder, Kenneth Cook, Mark Sanderson, Samuel Herd e Stephen Lett. Lori i ze de star nela sede mondial dele Testimònie de Geovà in Warwick, Nova York, Stati Unidi.

 Lori i ga fato sei comission par tender de tuto el laoro che le Testimònie de Geovà le fà. Cada fradel del Corpo Governante el giuta in al manco una comission.

•   Comission dei Cordinadori: La laora insieme ai departamenti che difende i diriti dela organisassion e dei fradei, la desside cossa far quando ghen’è perseghission, quando sucede una desgràssia e come giutar i fradei quando sucede qualcossa de colpo.

•   Comission del Personal: La tende dei fradei e sorele che i laora in Betel.

•   Comission Editora: La tende del laoro de stampar e mandar le publicassion par diversi posti e dela costrussion de Saloni del Regno, de scritòri de tradussion e de altri posti che la organisassion la dopera.

•   Comission de Servìssio: La organisa el laoro de predicassion dele “bone notìssie del Regno”. — Mateo 24:14.

•   Comission de Insegno: La tende de quel che l’è insegnà nele nostre riunion, scole e in programi de vìdeo e àudio.

•   Comission de Redassion: La tende del laoro de tradussion e de quel che l’è insegnà nele nostre publicassion stampade e nel nostro site.

 El Corpo Governante anca el fà una riunion tute le stimane par veder cossa che la organisassion la ga de bisogno. Par esser tuti de acordo quando i fà una dessision in queste riunion, lori i varda cossa che la Bìblia la dise e i domanda el aiuto del spìrito santo de Dio. — Ati 15:25.

 I fradei che i giuta el Corpo Governante i ze persone de fidarse. (1 Corinti 4:2) Lori i ga speriensa e i ze bravi de far el laoro in queste comission. Tute le stimane, questi assistenti i va nele riunion dele comission. Anca se no i desside cossa che la comission la ndarà far, lori i dà boni consili e i va in serca de orientassion par giutarla a far la meio dessision. Dopo, lori i tende che la comission la meta in pràtica quel che l’è stà dessidio e i vede se el laoro l’è drio ndar ben. Dele volte, el Corpo Governante li scòlie par visitar i fradei in altri paesi e par far discorsi spessiai, come nele riunion anuai e nele formature de Gileade.