Ghemo de tender del nostro pupà e dela nostra mama quando lori i vien veci. La Bìblia la dise che i fioi i mostra che i adora a Dio quando i tende dela so pròpia fameia. Cossita i ‘darà indrio a so pare e a so mare quel che i ghe ga fato de bon e Dio el ghe piase’. (1 Timòteo 5:4) Quando i fioi i tende del so pupà e dela so mama i obedisse a quel che la Bìblia la dise de dar onor a lori. — Efesi 6:2, 3.

 La Bìblia no la dise tuto quel che ne ocore far quando ghemo de tender dei nostri veci. Magari, la ga esempi de done e òmini fedele che i ga fato cossita e anca la ga boni consili de come podemo farlo.

•  Come che arquanti servi de Geovà del passà i ga tendesto del so pupà e dela so mama?

•  Che consili la Bìblia la dà a quei che i tende del so pupà e dela so mama quando i vien pi veci?

•  L’è sbalià el to pupà o la to mama ndar de star nte un asilo?

 Lori li ga tendesti de maniere difarente, de acordo con quel che i podea far.

•   Giusepe l’era de star distante del so pupà, Giacò. Ma el ga fato che so pare el vegnesse de star darente de lu. Cossita Giusepe el ghe daria de magnar, un posto meio de star e el podaria tenderlo. — Génesi 45:9-11; 47:11, 12.

•   Rute la ga cambià el so posto de star par restar insieme dela so sogra. Anca la ga laorà tanto par tenderla. — Rute 1:16; 2:2, 17, 18, 23.

•   Poco vanti de morir, Gesù el ga scoliesto una persona par tender dela so mama, Maria, che fursi la era védova. — Gioani 19:26, 27. a

 Dele volte, pol esser fadiga i fioi tender del so pupà e dela so mama parché i resta strachi. Ma la Bìblia la ga consili che i pol giutarli.

•   Daghe onor.

   La Bìblia la dise: “Daghe onor a to pare e a to mare.” — Ésodo 20:12.

   Come meter in pràtica? No stà voler comandar tuto quel che to pare e to mare i fà. Alora, assa lori parlar come i volaria esser tendesti e proa far tuto quel che te pol par giutarli.

•   Sia perdonador e proa capir quel che i pensa.

   La Bìblia la dise: “El omo che el ghe vede rento el frena la so ràbia, e l’è bel dela so parte passar sora la ofensa.” — Proverbi 19:11.

   Come meter in pràtica? Se el to pupà o la to mama i dise una roba sensa pensar e no i ghe dà valor par quel che te si drio far, te pol domandarte: ‘Come che mi me sentiria se mi fusse nel so posto?’ Quando te fè sforso par perdonarli e par capir i so sentimenti, le robe no le deventarà pedo.

•   Parlaghe coi altri.

   La Bìblia la dise: “Quel che te vol far no’l ndarà ben se no te parli coi altri. Ma ghen sarà boni resultadi se te scolti consili.” — Proverbi 15:22.

   Come meter in pràtica? Proa saver come tender ben dele malatie del to pupà e dela to mama. Va in serca de saver se el governo el dà aiuto par i pi veci nel posto ndove lori i ze de star. Parla con altri che i ga belche tendesto dei so veci. Se te ghè fradei, valtri podé dessider insieme cossa cada un el pol far.

•   Ricòrdate che ghen’è robe che no te sì bon de far.

   La Bìblia la dise: “Quei che i sà el so limite i ga sabedoria.” — Proverbi 11:2.

   Come meter in pràtica? Pol esser che no ghemo tempo gnanca forsa par far tuto quel che volarìssino al nostro pupà e ala nostra mama. Alora, ricòrdate che no te sì bon de far tuto quel che te vol. Se te te senti straco parché te ghè tante robe de far par lori, domanda aiuto dela to fameia o de altre persone.

•   No stà desmentegarte de ti.

   La Bìblia la dise: “Gnanca un omo el ga mai odià el so pròpio corpo, ma lu lo alimenta e lo tende.” — Efesi 5:29.

   Come meter in pràtica? Ghemo de tender del nostro nostri pupà e dela nostra mama quando i vien pi veci e dela nostra fameia se semo maridadi. Ma ghemo anca de tender de noantri stessi. Par quela, te ghè de magnar e dormir ben e far qualcossa par divertirte. (Eclesiasti 4:6) Cossita te sarè bon de tender dei to veci ancora meio.

 La Bìblia no la parla del posto che i pi veci i ga de star par esser tendesti. Dele volte, el pupà e la mama i va de star insieme coi so fioi o i resta nela so pròpia casa e i fioi i va tenderli. Anca ghen’è de quei che i va de star nte un asilo. Alora, cada fameia la ga de dessider la meio maniera de tender del so pupà e dela so mama. — Gàlati 6:4, 5.