El spìrito santo l’è el poder de Dio in assion, l’è la so forsa ativa. (Michea 3:8; Luca 1:35) La Bìblia la dise che Dio el ‘manda el so spìrito’. Come che lu fà questo? Lu el manda la so energia in tuti posti che ghe ocore par far la so volontà. — Salmo 104:30; 139:7.

 Nela Bìblia, la parola “spìrito” la ze la tradussion del ebraico rú·ahh e del greco pneú·ma. Tante volte, questa parola la fà riferensa ala forsa ativa de Dio, o so spìrito santo. (Génesi 1:2) La Bìblia anca la dopera la parola spìrito par dir altre robe, come:

•   Fià. — Abacuche 2:19; Apocalisse 13:15.

•   Vento. — Génesi 8:1; Gioani 3:8.

•   La forsa de vita che la ze in tute le creature. — Génesi 6:17.

•   La atitùdine, o disposission, de una persona. — Nùmeri 14:24.

•   Persone con corpo spiritual, come Dio e i àngeli. — 1 Rè 22:21; Gioani 4:24.

 Tute queste spression le ga la medèsima idea: una roba che no se pol veder, ma che fà qualcossa che se pol pròpio veder. Dela medèsima maniera, el spìrito de Dio, “compagno al vento, no te lo vedi, no te lo ciapi ma el ga forsa”. — An Expository Dictionary of New Testament Words (Dissionàrio che Spiega le Parole del Novo Testamento), de William Vine.

 La Bìblia anca la fà riferensa al spìrito santo come le “man” o i “dei” de Dio. (Salmo 8:3; 19:1; Luca 11:20; vedi anca Mateo 12:28.) Cossita come un artesan el dopera le so man e i so dei par far el so laoro, Dio el dopera el so spìrito par far quel che el vol, come:

•   El Universo. — Salmo 33:6; Isaia 66:1, 2.

•   La Bìblia. — 2 Piero 1:20, 21.

•   I miràcoli e la predicassion con zelo che i servi del passà i ga fato. — Luca 4:18; Ati 1:8; 1 Corinti 12:4-11.

•   Le bone qualità che le persone che le serve a Dio le mostra. — Gàlati 5:22, 23.

El spìrito santo no l’è una persona

 Quando la fà riferensa al spìrito come “man”, “dei” o el “fià” de Dio, la Bìblia la fà veder che el spìrito santo no l’è una persona. (Ésodo 15:8, 10) Le man de un artesan no le pol laorar lore sole, sensa el so corpo e la so mente. Dela medèsima maniera, el spìrito santo no’l pol laorar sensa che Dio lo guide. (Luca 11:13) La Bìblia anca la fà comparassion del spìrito de Dio cola àqua. Queste comparassion le mostra che el spìrito santo no l’è una persona. — Isaia 44:3; Ati 6:5; 2 Corinti 6:6.

 La Bìblia la dise i nomi de Geovà Dio e del so fiol, Gesù Cristo. Ma in gnanca un posto ela la dise che el spìrito santo el ga nome. (Isaia 42:8; Luca 1:31) Quando el màrtir cristian Stevon el ga bio una miracolosa vision del cielo, el ga visto sol due persone, nò tre. La Bìblia la dise: “Lu, pien de spìrito santo, el ga vardà fisso al cielo e el ga visto la glòria de Dio, e Gesù in pié ala drita de Dio.” (Ati 7:55) El spìrito santo l’era el poder de Dio in assion, e l’è stato par meso de questa forsa che Stevon el ga bio questa vision.

 Idea sbaliada: El spìrito santo l’è una persona che fà parte dela Trinità, come mostra el testo de 1 Gioani 5:7, 8 nela version Almeida dela Bìblia in portoghese.

 Verità: Anca se arquante version dela Bìblia, come la Almeida in portoghese, le mete insieme in 1 Gioani 5:7, 8 le parole “ntel cielo: el Pare, la Parola e el Spìrito Santo; e sti tre i ze un. E tre i ze quei che i dà testimònio ntela tera” a, studiosi i ga descoverto che questo toco no l’è stà scrito par el apòstolo Gioani, e par quela, no’l fà parte dela Bìblia. El professor universitàrio Bruce Metzger el ga scrito: “No semo in dùbio che questo toco l’è bastardo e no’l ga el dirito de restar nel Novo Testamento.” — A Textual Commentary on the Greek New Testament (Comentàrio del Testo sora el Novo Testamento Greco).

 Idea sbaliada: La Bìblia la parla del spìrito santo come se fusse una persona, e questo prova che lu l’è una persona.

 Verità: Arquante volte le Scriture le parla del spìrito santo come se fusse una persona. Par esémpio, quando el apòstolo Gioani el ga mensonà le parole de Gesù, el ga parlà del spìrito santo come “quel che dà aiuto” (paràclito) che ‘ndaria mostrar’, ‘guidar’, ‘parlar’, ‘scoltar’, ‘dar glòria’, ‘ricever’ e ‘proclamar’. (Gioani 16:7-15) Ma questo no l’è una prova de che el spìrito l’è una persona. La Bìblia anca la parla dela sabedoria, dela morte e del pecato come se fusse persone. (Proverbi 1:20; Romani 5:17, 21) Par esémpio, la Bìblia la parla che la sabedoria la ga “òpere” e “fioi”, e el pecato l’è descrito come drio ‘seduser’, ‘sassinar’ e drio ‘far vegner fora voie sbaliade’. — Mateo 11:19; Luca 7:35; Romani 7:8, 11.

 Idea sbaliada: El batésimo in nome del spìrito santo prova che lu l’è una persona.

 Verità: Arquante volte la Bìblia la dopera la spression “in nome de” par parlar sora poder o autorità. (Deuteronómio 18:5, 19-22; Ester 8:10) L’è compagno de dir “in nome dela lege”: questo no vol dir che la lege la ze una persona. Quando qualchedun l’è batesà ‘nel nome del’ spìrito santo, lu el ricognosse el poder e la funsion del spìrito santo in far la volontà de Dio. — Mateo 28:19.

 Idea sbaliada: I apòstoli de Gesù e i primi cristiani i credea che el spìrito santo l’era una persona.

 Verità: La Bìblia no la dise questo, e gnanca la stòria. La Encyclopædia Britannica la dise: “La definission che el Spìrito Santo l’era una Persona difarente e come Dio . . . la ze vegnesta fora nel Consìlio de Costantinopla in 381 dopo de Cristo.” Questo ga sucedesto de pi de 250 ani dopo dela morte del ùltimo apòstolo.