Nel passà, i israeliti i gavea de dar el dìsimo, a o sia, 10% de quel che i guadagnesse nel ano. Lori i gavea de dar el dìsimo par giutar nela adorassion a Geovà. Dio el ghe gavea dito: ‘Valtri gavé de dar la dèssima parte de tute le to piantassion, tuti i ani.’ — Deuteronómio 14:22.

 Geovà el ga dato la Lege ai israeliti par meso de Moisè. Questa lege la disea quel che lori i gavea de far e quel che no i podea mia far. Una dele lege la era pagar el dìsimo. Ma, no ocore mia ai seghidori de Gesù pagar el dìsimo parché no ghe ocore pi obedir questa lege. (Colossensi 2:13, 14) Invesse, la Bìblia la dise che cada un el ga de far “come el ga dessidio nel so cuor, nò sensa voia o par forsa, parché Dio el ama quel che el da con alegria”. — 2 Corinti 9:7.

•  Cossa che la Bìblia la dise sora el dìsimo nel “Vècio Testamento”?

•  Cossa che la Bìblia la dise sora el dìsimo nel “Novo Testamento”?

 La Bìblia la parla tante volta del dìsimo nel Vècio Testamento, ancora de pi nel tempo quando i israeliti i gavea de obedir la Lege che Geovà ghe gavea dato par meso de Moisè. Ghen’è anca testi che i parla sora el dìsimo vanti de israeliti gaver la Lede.

Vanti de i israeliti ricever la Lege

 La Bìblia la parla che la prima persona che la ga dato el dìsimo l’è stà Abraon, che vanti l’era ciamà de Abron. (Génesi 14:18-20; Ebrei 7:4) Lu el ga dato el dìsimo a un omo che l’era rè e sasserdote dela cità de Salen. La Bìblia no la parla che Abraon e gnanca so fioi i ga dato el dìsimo nantra volta.

 La Bìblia anca la parla che Giacò, neto de Abraon, el ga dato el dìsimo. Giacò el gavea prometesto che ghe daria a Geovà la dèssima parte de tuto quel che ricevesse se lu lo giutesse. (Génesi 28:20-22) Arquanti studiosi i dise che Giacò el ga fato sacrifìssi de bèstie come dìsimo. Alora, lu el ga fato quel che el ga prometesto. Ma lu no’l ga mia dito che la so fameia la gavaria de far compagno.

Intanto che i israeliti i obedia ala Lege

 Nel passà i israeliti i gavea de pagar el dìsimo par giutar nela adorassion a Geovà.

•   I òmini dela tribo de Levi, o sia, i leviti, i laorea par Geovà nel témpio e no i gavea colònia par piantar. (Nùmeri 18:20, 21) Par quela, i israeliti li ghe dea el dìsimo. Arquanti leviti i era sasserdoti e altri no i era mia. Tuti i due i ricevea el dìsimo. Ma i leviti che no i era sasserdoti i gavea de dar anca lori el dìsimo a quei che i era sasserdoti. — Nùmeri 18:26-29.

•   Pol esser che i israeliti i ghe dea el dìsimo due volte al ano. Questo secondo dìsimo l’era dato par giutar i leviti e anca quei che no i era leviti. (Deuteronòmio 14:22, 23) Questo dìsimo l’era doperà in arquante festività e dele volte li doperea par darghe de magnar ai poareti. — Deuteronómio 14:28, 29; 26:12.

 Come che el dìsimo l’era contà? Tuti i ani i israeliti i gavea de dar la dèssima parte de tuta la so piantassion. (Levìtico 27:30) Ma, se lori i volesse darghe soldi i gavaria de dar el dìsimo e altri 20%. (Levìtico 27:31) Lori i gavea anca de dar la dèssima parte dele so bèstie. — Levìtico 27:32.

 Come che lori i fea? I israeliti i gavea de ciapar una a cada 10 bèstie che ghen’era. Lori no i podea mia scòlier se la dèssima bèstia la gavea difeti o nò, cambiar par nantra bèstia gnanca darghe soldi invesse dela bèstia. (Levìtico 27:32, 33) Magari, nele festività lori podea darghe in soldi el dìsimo che saria doperà. Cossita, l’era pi fàcile par i israeliti che i vegnea de distante portar el dìsimo. — Deuteronómio 14:25, 26.

 Quando che i israeliti i gavea de dar el dìsimo? I gavea de dar el dìsimo tuti i ani. (Deuteronómio 14:22) Ma, a cada sete ani, i israeliti no i podea piantar parché quel ano l’era de descanso, come se fusse un sabo. (Levìtico 25:4, 5) Alora, in quel ano i israeliti no i ghe ocorea dar el dìsimo nela època dela racolta. Ma, nel terso e nel sesto ano de quei seti ani i israeliti i ghe dea el dìsimo ai leviti e ai poareti. — Deuteronómio 14:28, 29.

 E se la persona no la ghe desse el dìsimo? Par Geovà, quel che no’l ghe desse el dìsimo saria drio ciavarlo. (Malachia 3:8, 9) Ancora cossita, la Lege no la disea che la persona la saria castigada. Alora, i israeliti i ghe dea el dìsimo parché savea che l’era la roba giusta de far e nò parché gavea paura de esser castigadi. Tuti i israeliti gavea de dir a Geovà che gavea dato el dìsimo e dopo domandar la so benedission. — Deuteronómio 26:12-15.

 Sarà che l’era fadiga dar el dìsimo? Nò. Parché Geovà el gavea dito che ndaria benedir i israeliti e darghe tuto quel che ghe ocoresse se lori i ghe desse el dìsimo. (Malachia 3:10) Ma, se lori assessse de darlo, i leviti e i sasserdoti i gavaria de laorar par mantegnerse e no i podaria mia giutar i israeliti a adorar a Geovà dela maniera giusta. Cossita, Dio no ndaria mia benedirli. — Neemia 13:10; Malachia 3:7.

 Intanto che Gesù l’era nela Tera, quei che i adorea a Dio ancora i gavea de dar el dìsimo. Ma, dopo dela morte de Gesù no i ghe ocorea pi.

Intanto che Gesù l’era nela Tera

 La Bìblia la mostra che Gesù el ga dito che ghe tochea pagar el dìsimo e che i israeliti i fea pròpio cossita intanto che lu l’era qua nela Tera. Ma, Gesù el ga dito che i lìderi religiosi i era sbaliadi parché i catea che pagar el dìsimo l’era pi importante che far quel che la Lege la disea de far, o sia, mostrar giustìssia, misericòrdia e esser fedele. — Mateo 23:23.

Dopo dela morte de Gesù

 Dopo che Gesù l’è morto, nissuni ghe ocorea pi obedir la Lege de Moisè. Par quela, nissuni ghe tochea pi pagar el dìsimo. — Ebrei 7:5, 18; Efesi 2:13-15; Colossensi 2:13, 14.