AIUTO PAR INFRONTAR EL DOLOR DELA MORTE

El meio aiuto par quei che i ga perso una persona nela morte

SONAR

NEI ÙLTIMI ANI I SPESSIALISTI I GA STUDIÀ TANTO SORA QUEI CHE I PERDE QUALCHEDUN NELA MORTE. Ma, come ghemo visto nei altri artìcoli, i meio consili dei spessialisti i ze de acordo con quel che la Bìblia la dise. Questo mostra che i consili de questo libro antigo i pol giutar fin ancoi. Ma la Bìblia no la ga sol boni consili. Ela la ga informassion che no catemo in nissun altro posto e che pol dar tanto consolo a quei che i ze de luto. Vedemo arquanti esempi.

I nostri cari parenti e amighi che i ze morti no i ze drio sofrir

La Bìblia la dise che i morti “no i sà pròpio gnente” e che “i so pensamenti i se finisse”. (Eclesiasti 9:5; Salmo 146:4) L’è par quela che la Bìblia la dise che la morte la ze come un sono tranquilo. — Gioani 11:11.
Gaver confiansa nte un Dio amoroso l’è tanto consolador

La Bìblia la dise: “I oci de Geovà a i vede quei che i ze giusti, e le so récie le scolta quando i ghe domanda el so aiuto.” (Salmo 34:15) No ghemo de pensar che la orassion la ze sol una maniera de parlar con qualchedun par farne sentir meio o par el alìvio par la testa. In verità, contarghe a Dio quel che noantri sentimo ne giuta a gaver una amicìssia col nostro Creador. E lu el pol doperar el so poder par consolarne.
La speransa de un mondo meio

Imagina quanta alegria gavaremo qua nela Tera quando i morti i tornarà a viver nantra volta! La Bìblia la parla tante volte de quel tempo e anca la parla de come che sarà la vita nela Tera: ‘Dio el sugarà tute le làgrime dei nostri oci, e no ghen sarà pi la morte, gnanca pi tristessa, gnanca piander, gnanca dolor.’ — Apocalisse 21:3, 4.

Tanti che i crede in Geovà, el Dio dela Bìblia, i se sente con de pi forsa par infrontar la morte de qualchedun che i amea parché i se fida in questa promessa. Par esémpio, dopo de 65 ani de maridadi, Ann la ga perso el so sposo. Ela la dise: “La Bìblia la me assa sicura che i nostri parenti e amighi che i ze morti no i ze mia drio sofrir e che Dio el ghe darà nantra volta la vita. Tute le volte che penso nel me sposo che l’è morto mi me ricordo de queste promesse. Lore le me giuta a infrontar la pedo roba che me ga sucedesto!”

Tina, che ghemo mensionà vanti, la dise: “De quando che el me sposo Timo l’è morto, mi sento che Dio el me giuta. Geovà el me ga giutà pròpio tanto a infrontar questo momento difìcile dela me vita. La Bìblia la promete che i morti i viverà nantra volta e mi no go dubi che questa promessa la ndarà realisarse. Questo me dà forsa par seitar avanti fin el giorno che ndarò veder Timo nantra volta.”

Anca milioni de persone che le crede che la Bìblia la ze de fidarse le se sente cossita. Fursi te pensi che le promesse le ze massa bone par crederghe o sol una bela stòria. Ma te podarè veder che la Bìblia l’è el meio aiuto par quei che i ze drio sofrir par la morte de qualchedun.