Quei che i ze ùmili i mostra rispeto, no i cata che i ze meio che i altri e gnanca i vol esser tratadi come persone importante. Invesse, i ga vero interesse nele persone e i ghe piase de imparar con lore.

Arquanti i cata che una persona ùmile la ze fiaca. Ma, in verità, la ze una persona forte parché ghe vol coraio par ricognosser i so sbali e capir che ghen’è robe che no la ze bona de far.

• La persona ùmile la ga de pi amighi. El libro A Epidemia do Narcisismo a el dise che “l’è fàcile par quei che i ze ùmile ciacolar, star insieme dei altri e far amighi”.

• La persona ùmile la gavarà un futuro meio. Se el to fiol impara a esser ùmile adesso, sarà pi fàcile catar un laoro quando el vien grando. El Dotor Leonard Sax el dise: “Se un gióveno el pensa massa sora si stesso e no’l sa quel che no l’è bon de far, lu no’l ndarà ben quando el cata un laoro. Ma, se el gióveno aceta la opinion dei altri, lu el sarà bon de gaver un laoro.” b

Giuta el to fiol a no pensar massa sora si stesso.

CONSÌLIO DELA BÌBLIA: “Se qualchedun el pensa che l’è importante quando che no l’è, l’è drio imbroiar a lu stesso.” — Gàlati 6:3.

• Parla la verità al to fiol. Parlar cose come “Tuti i to insogni i ndarà realisarse” e “Te pol esser quel che te vol” par che pol darghe motivassion, ma queste cose no le sucede de verità. El to fiol el sarà pi felice se lu el ga ogetivi che el sa che ze bon de rivar e laora par rivar fin lori.

• Loda quel che el to fiol el fà. Se te parli sempre al to fiol che lu l’è brao no te ndarè giutarlo a esser ùmile. Par quela, daghe de pi lode sol quando el fà una roba bona.

• Controla el tempo che el to fiol el resta nele rede sossiai. Tante volte nele rede sossiai, le persone le ghe piase de farse veder e de mostrar le robe che le fà. Far cossita no l’è esser ùmile.

•   Insegna to fiol a domandar scusa. Giuta el to fiol a capir quel che el ga fato de sbalià, ricognosser el sbàlio e suito domandar scusa.

Insegna to fiol a sempre ringrassiar.

CONSÌLIO DELA BÌBLIA: “E mostreve grati.” — Colossensi 3:15.

• Giùtalo a ringrassiar par la naturesa. I tosatei i ga de imparar a ringrassiar par tuta la creassion. E che ne ocore dela naturesa par viver. Ghemo de bisogno dela ària par tirar su el fià, dela àqua par bever e del magnar. Dopera questi esempi par giutar i tosatei a darghe valor ale cose che Dio el ga creà.

• Insegnali a darghe valor ale persone. Ricorda el to fiol che sempre gavarà una persona con una abilità meio che la soa. Invesse de gaver invìdia, lu el pol imparar a darghe valor ale abilità dei altri e imparar de lori.

• Mostra che te si grato. Insegna el to fiol a dir “gràssie” de volentiera e nò par obrigassion. Esser grato ne giuta a seitar ùmile.

Spiega al to fiol che l’è bon far cose par i altri.

CONSÌLIO DELA BÌBLIA: “Ma gavé de esser ùmili e pensar che i altri i ze pi importanti che valtri. No sté preocuparve sol con quel che valtri volé, ma anca con quel che i altri i vol.” — Filipensi 2:3, 4.

• Insegna el to fiol a far i laori de casa. Se te disi al to fiol che lu no’l ghe ocore giutar nei laori de casa, te ndarè farlo pensar che lu l’è massa importante. Lu el ga de capir che vanti de divertirse, el ga de giutar nei laori de casa. Spiega che el so aiuto l’è bon par tuta la fameia e, che se el fà cossita, tuti restarà felice e ndarà rispetarlo.

• Mostra che giutar i altri l’è un privilègio. Far cose par i altri l’è la meio maniera de gaver responsabilità. Giuta el to fiol a saver chi che ghe ocore de aiuto e cossa che el pol far par giutar. Loda e giuta el to fiol quando el fà qualcossa par i altri.