Domande dei Letori
Sarà che i israeliti i magnea sol manà e codorne quando i era nel deserto?
Nei 40 ani che i israeliti i ze restadi nel deserto, la roba che lori i ga magnà de pi l’è stà el manà. (Éso. 16:35) E due volte, Geovà el ghe ga dato codorne par magnar. (Éso. 16:12, 13; Nùm. 11:31) Ma lori i gavea anca altre robe de magnar.
Par esémpio, arquante volte Geovà li ga menadi in bei posti ndove ghen’era àqua e magnar. Un de questi posti l’è stà Elin, ndove ghen’era 12 fontane de àqua e 70 palmere, che fursi le era de tamare. (Éso. 15:27) Un libro che el parla dele piante del passà el dise che ‘la pianta che la dà tamare la vien su ben nel deserto. Alora, tante persone le pol magnar i so fruti e doperarla par gaver òio e ombria’.
Nantro posto ndove fursi i israeliti i ze ndati ga nome Feiran. a Un libro el spiega che questo posto el resta in meso ale montagne, el ga 130 km e l’è un dei posti pi bei che ghen’è nel Sinai. La parte pi bela, che l’è ndove i israeliti i ze ndati, la ze 610 metri pi alta che el mar, la resta 45 km distante de ndove el rio va rento el mar e la ze granda quasi 5 km. Come ghen’è tante palmere e l’è tanto bel, tante persone le ga dito che l’è compagno al giardin del Èden. Fà tanti ani che le persone le vien a questo posto par causa dele piante che le dà tamare.
Palmere che dà tamare in Feiran
Quando i israeliti i ze ndati via del Egito, lori i ga portà via massa de pan, mastela par impastar la massa e fursi grani e òio. Sicuro che queste robe le se ga finio presto. Lori i gavea portà anca una mùcia de bèstie. (Éso. 12:34-39) Ma come l’era tanto fadiga viver nel deserto, pol esser che tante de queste bèstie le ze morte. Arquante bèstie anca le ze state copade par magnar o le ze state doperade par far sacrifissi par Geovà e fin par falsi dei. b (Ati 7:39-43) Ma savemo che i israeliti i gavea ancora tante bèstie. Parché? Parché, un tempo dopo, quando lori i ga desobedio a Geovà, lu el ga dito che ‘so fioi i deventaria pastori nel deserto par 40 ani’. (Nùm. 14:33) Magari, ancora che queste bèstie le ghe desse late e dele volte le era copade par magnar la so carne, no le ghe bastaria par darghe de magnar a milioni de persone par 40 ani. c
Ma ndove quele bèstie catea fora àqua e magnar? d Pol esser che in quela època, piovea de pi e ghen’era pi piante nel deserto. El libro Estudo Perspicaz das Escrituras, Volume 1, dise che intorno de 3.500 ani indrio, ghen’era pi àqua de quel che ghen’è adesso nela Aràbia. Come ancoi se vede posti in meso i monti ndove ghen’era rii, se pol creder che ghen’era piova par impienir questi rii. Ancora cossita, el deserto l’era grando e ghe fea paura. (Deu. 8:14-16) Alora, i israeliti e le bèstie sol i ga seità vivi par causa dei miràcoli che Geovà el ga fato par darghe àqua. — Éso. 15:22-25; 17:1-6; Nùm. 20:2, 11.
Moisè el ga dito ai israeliti che Geovà ghe gavea dato el manà par insegnarghe “che el omo no’l vive sol de pan, ma de cada parola che la vien dela boca de Geovà”. — Deu. 8:3.
a Varda La Sentinela de 1 de maio de 1992, pàg. 24, 25.
b La Bìblia la parla de due volte che i israeliti i ga fato sacrifissi de bèstie par Geovà intanto che i era nel deserto. La prima la ze stata quando ga scominsià el laoro dei sasserdoti. E la seconda la ze stata nela Pàscoa. Queste due volte le ze state nel ano 1512 vanti de Cristo e due ani dopo che i ze ndati via del Egito. — Lev. 8:14–9:24; Nùm. 9:1-5.
c Quando i 40 ani i era quasi drio finirse, i israeliti i ze stati boni de ciapar tante bèstie dele nassion che i gavea vinsesto nele guere. (Nùm. 31:32-34) Ancora cossita, lori i ga seità a magnar el manà fin che i ze ndati rento la Tera Prometesta. — Gios. 5:10-12.
d Noantri credemo che le bèstie no le magnea mia el manà, parché Geovà el gavea dito che i israeliti i gavea de ciapar sol el manà che ghe ocorea par el giorno. — Éso. 16:15, 16.
