Domande dei Letori
Chi che la ze la dona de Isaia 60:1, e come che la se ‘leva su’ e la ‘assa slusar la so luce’?
Isaia 60:1 dise: “Leva su, ò dona, assa slusar la to luce, parché la to luce la ze rivada. La glòria de Geovà la slusarà sora ti.” I versìcoli prima e dopo i ne giuta a capir che questa “dona” la ze Sion, o sia, Gerusalen, che la era la cità pi importante de Giudà. a (Isa. 60:14; 62:1, 2) Tante volte che la Bìblia la dopera la parola Gerusalen la ze drio parlar de tuta la nassion de Israel. Adesso, ndemo risponder a due domande sora questa Gerusalen, o sia, la nassion de Israel: ‘Quando e come che Gerusalen la se ga “levà su” e la ga “assà slusar la so luce”? Come che la professia de Isaia la ze drio realisarse ancoi de una maniera ancora pi granda?’
Quando e come che Gerusalen la se ga ‘levà su’ e la ga ‘assà slusar la so luce’? Nei 70 ani che i giudei ghe ga tocà restar in Babilònia, el témpio el se ga rovinà. Ma quando la Medo-Persa ga tolto el poder de Babilònia, i giudei i ga podesto tornar ala cità, rangiar su el témpio e tornar a adorar a Geovà dela maniera giusta. (Esd. 1:1-4) Alora, in 537 vanti de Cristo, arquanti giudei dele 12 tribo de Israel i ga scominsià el viaio par tornar ala so cità. (Isa. 60:4) Quando i ze rivadi, lori i ga scominsià a far sacrifissi a Geovà, far le so festività e a rangiar su el témpio. (Esd. 3:1-4, 7-11; 6:16-22) Cossita, podemo dir che la glòria de Geovà la ga scominsià a slusar nantra volta sora Gerusalen, o sia, sora el so pòpolo. Par quela che el pòpolo de Geovà l’è deventà come una luce che slusea intrà le nassion che no lo cognossea mia.
Come el pòpolo no’l ga seità leal a Geovà, sol una parte dele professie de Isaia le se ga realisà in quel tempo. (Nee. 13:27; Mal. 1:6-8; 2:13, 14; Mat. 15:7-9) Par esémpio, ani dopo, i giudei no i ga gnanca credesto che Gesù l’era el Messia. (Mat. 27:1, 2) E nel ano 70 dopo de Cristo, la cità de Gerusalen e el témpio i ze stati finidi fora par la seconda volta.
Geovà el gavea belche dito che sucederia queste robe. (Dan. 9:24-27) Cossita, capimo che Geovà belche el savea che le professie de Isaia capìtolo 60 le se realisaria sol in parte in quel tempo.
Sarà che le professie de Isaia le ze drio realisarse de una maniera ancora pi granda ancoi? Si, ma cola “Gerusalen de sora”. Paolo el ga dito sora questa Gerusalen: “La ze nostra mare”. (Gàl. 4:26) Ma chi zela questa Gerusalen de sora? Ela la ze la parte dela organisassion de Geovà che la ze nel cielo. In questa organisassion, ghen’è miliari de àngeli fedeli a Geovà. E i “fioi” de questa ‘Gerusalen de sora’ i ze Gesù e i 144 mila untadi che i ga la speransa de viver in cielo, compagno Paolo. I untadi insieme i ze “una nassion santa” e el ‘Israel de Dio’. — 1 Pie. 2:9; Gàl. 6:16.
Ma come che la Gerusalen de sora la se ‘leva su’ e ‘la assa la so luce slusar’? La professia la se realisa par meso dei untadi che ancora i ze qua nela Tera. Adesso, ndemo veder come quel che dise nela professia de Isaia capìtolo 60 l’è drio suceder con lori.
Come che i fradei untadi i ga bio de ‘levarse su’? Dopo che el ùltimo apòstolo l’è morto, arquante persone le ga scominsià a contar tante busie sora i dissìpoli de Gesù. (Mat. 13:37-43) Cossita, podemo dir che in quela època, i fradei i era come che presi in Babilònia, la Granda, o sia, nele religion false. Lori i ze restadi presi fin quando ga scominsià el ‘fin del sistema de cose’ in 1914. (Mat. 13:39, 40) Dopo un tempo, in 1919, questi fradei i ze stati liberadi e i ga scominsià a slusar par meso dela predicassion dele bone notìssie del Regno. b Cossita, persone de tuti i posti le ze restade maraveiade con questa luce e le ga volesto imparar de pi, anca i “rè” che Isaia 60:3 parla. — Apo. 5:9, 10.
Nel futuro, i untadi i assarà slusar la luce de Dio de una maniera ancora pi bela. Come? Quando i 144 mila untadi i sarà tuti ressussitadi par esser rè e sasserdoti in cielo, lori i deventarà la noiva de Cristo, o sia, la “Nova Gerusalen”. — Apo. 14:1; 21:1, 2, 24; 22:3-5.
La “Nova Gerusalen” la sarà tanto importante par realisar la professia de Isaia 60:1. (Varda anca Isaia 60:1, 3, 5, 11, 19, 20 e Apocalisse 21:2, 9-11, 22-26.) Parché? Nel passà, Gerusalen la rapresentea el governo de tuta la nassion de Israel. Dela medèsima maniera, la “Nova Gerusalen” e Cristo i ndarà rapresentar el governo che governarà tuta la Tera. Ma de che maniera la Nova Gerusalen ‘la vegnarà do del cielo e de Dio’? Gesù e i untadi i ndarà cambiar tante robe qua nela Tera. Par esémpio, i servi fedeli de Dio de tute le nassion i ndarà ‘caminar nela so luce’ e no i ndarà mai pi sofrir par causa del pecato gnanca morir. (Apo. 21:3, 4, 24) Alora, finirà el tempo de ‘meter a posto tute le robe’, cossita come Isaia e altri profeti i gavea dito. (Ati 3:21) Questo tempo de ‘meter a posto tute le robe’ ga scominsià quando Gesù l’è deventà Rè, e el finirà nel fin dei Mila Ani del Governo de Cristo.
a In Isaia 60:1, la Tradução do Novo Mundo dopera la parola “dona” invesse de Sion o Gerusalen parché i verbi ‘levarse su’ e ‘assar la luce slusar’ nel ebraico i ze stati doperadi in questo versìcolo come se fusse par una dona. La medèsima roba ga sucedesto quando ghen’è “ti”. La parola “dona” la giuta la persona che la ze drio leder a capir che el testo l’è drio parlar de una dona simbòlica.
b Ezechiel 37:1-14 e Apocalisse 11:7-12 parla che i servi de Geovà i tornaria a adorar a Geovà dela maniera giusta. Questo ga sucedesto in 1919. Ezechiel el gavea dito che, dopo tanto tempo, tuti i fradei untadi i tornaria a adorar a Geovà dela maniera che lu el vol. La professia che ghen’è in Apocalisse la parla che un pìcolo grupo de untadi che i tenderia del pòpolo de Dio i ndaria come che nasser nantra volta. Lori i ze nassesti nantra volta parché, par un tempo, lori no i era stati boni de servir a Geovà parché i era in preson. In 1919, questi fradei i ze stati scoliesti par esser el “schiavo fedele e prudente”. — Mat. 24:45; varda A Adoração Pura de Jeová É Restaurada!, pàg. 118.
