NELA antiga cità de Babilònia, i studiosi i ga catà una mùcia de matoni coti che i era doperadi par far su la cità. De acordo con Robert Koldewey, quei matoni i ze stati fati in forni che i era ‘fora dela cità, ndove ghen’era un baro bon e tante piante par far fogo e cosinarli’.

I studiosi i ga catà prove che la gente de Babilònia la doperea quei forni anca par far robe pròpio brute. Par esémpio, Paul-Alain Beaulieu, che l’è maestro nela Università de Toronto e studioso dela stòria e dela lèngua dela Assìria, el ga dito: “Arquanti scriti de Babilònia i mostra che el rè el mandea brusar le persone che lo desobedisse e che no le gavesse rispeto par i so dèi.” Un de questi scriti dei giorni del rè Nabucodonosor el dise: “Finìli fora, bruseli, rostili, meteli nel forno e fé vegner fora la so fumassa, copeli nel fogo.”

Questo ne fà ricordarse de quel che la Bìblia la dise in Daniel capìtolo 3. Lì, spiega che el rè Nabucodonosor el ga fato su una stàtua de oro pròpio granda in Dura, un posto fora dela cità de Babilònia. Alora, quando tre gióveni ebrei de nome Sadrache, Mesache e Abednego no i se ga mia indenocià davanti de quela stàtua, Nabucodonosor el se ga incativà. Par quela, lu el ga mandà ‘scaldar el forno sete volte de pi’ e el ga mandà ‘trar rento el forno’ quei tre gióveni. Ma, un àngelo pròpio poderoso li ga salvadi. — Dan. 3:1-6, 19-28.

I matoni che i studiosi i ga catà in Babilònia anca i mostra che la Bìblia la ze vera. In questi matoni, ghen’era stampade tante parole che ghe dea onor al rè. In un de questi, ghen’è scrito: ‘Nabucodonosor, rè de Babilònia. El palàssio che mi, el grando rè, go fato su. I me dissendenti i governarà qua par sempre.’ Queste parole le se someia a quel che l’è scrito in Daniel 4:30 quando Nabucodonosor el ga dito: “L’è questa la granda Babilònia, che mi la go fata su par esser la casa del rè, cola me pròpia forsa e poder, e par mostrar la glòria che go come rè!”