Iṅwe ṱhoḓisiso ye ya itwa ngei Amerika, yo sumbedzisa uri vhaswa vha phesenthe dza 80 ngei Amerika vha a rabela, fhedzi a si vhoṱhe vhane vha rabela ḓuvha ḽiṅwe na ḽiṅwe. Khamusi vhaṅwe vha a ḓivhudzisa uri: ‘Naa thabelo i sokou ita uri ndi ḓipfe ndi khwine kana hu na zwiṅwe?’

•  Thabelo ndi mini?

•  Naa Mudzimu u a thetshelesa?

•  Ndi nga rabela nga ha mini?

•  Zwine vhaṅwe vhaswa vha amba

Thabelo ndi nḓila ine ra amba ngayo na musiki wa zwithu zwoṱhe. Naho Yehova a tshi fhira vhathu vhoṱhe, “u tsini na muṅwe na muṅwe washu.” (Mishumo 17:27) Bivhili i sumbedza uri Mudzimu u khou ṱoḓa ri tshi vha tsini hawe, i ri: “Sendelani tsini na Mudzimu, na ene u ḓo sendela tsini na inwi.”​—Yakobo 4:8.

Ni nga sendela hani tsini na Mudzimu?

• Nga thabelo, ndi nḓila ine na nga amba ngayo na Mudzimu.

• Iṅwe nḓila ndi nga u guda Bivhili, ndi nḓila ine Mudzimu a amba ngayo na inwi.

U amba na Mudzimu nga thabelo na u mu tendela a tshi amba na inwi nga u guda Bivhili, zwi ḓo ita uri vhukonani haṋu nae vhu khwaṱhe.

“U amba na Yehova Mudzimu wa ṱaḓulu ṱadulu, ndi tshiṅwe tsha zwifhiwa zwihulwane zwe zwa ṋewa vhathu.”​—Jeremy.

“U somolela Yehova zwa haṋwani, zwi ita uri ndi ḓipfe ndi tsini tsini nae.”​—Miranda.

Naho ni tshi tenda uri Mudzimu u hone, ni tshi amba nae nga thabelo, nga zwiṅwe zwifhinga ni nga timatima uri u a thetshelesa thabelo dzaṋu. Naho zwo ralo, Bivhili i amba uri Yehova ndi “Mupfi wa thabelo.” (Phisalema 65:2) I dovha ya ri “Ni mu kumedzele mbilaelo dzaṋu dzoṱhe.” Ndi ngani? “Ngauri u na ndavha na inwi.”​—1 Petro 5:7.

Zwine na nga humbula nga ha zwo: Naa ni a ḓi ṋea tshifhinga tsha u amba na khonani dzaṋu tshifhinga tshoṱhe? Ni nga ita zwi fanaho na kha Mudzimu. Dzulani ni tshi amba nae tshifhinga tshoṱhe nahone ni shumise dzina ḽawe ḽine ḽa vha Yehova. (Phisalema 86:5-7; 88:9) Bivhili i ni vhudza uri ni ‘dzule ni tshi rabela.’​—1 Vhathesalonika 5:17.

“Thabelo ndi nḓila ine nda amba ngayo na Khotsi anga wa ṱaḓulu, ndi mu shululela zwoṱhe zwi re mbiluni yanga.”​—Moises.

“Ndi vhudza Yehova zwoṱhe, u fana na nḓila ye nda vha ndi tshi nga amba ngayo na mme anga kana khonani yanga ya tsini-tsini.”​—Karen.

Bivhili i ri: “zwoṱhe zwine zwa ni vhilaedzisa ni vhudze Mudzimu nga thabelo, nga u humbela zwi tshi bva mbiluni ni tshi mu livhuwa.”​—Vhafilipi 4:6.

Naa zwenezwo zwi amba uri ni nga vhudza Mudzimu thaidzo dzaṋu? Ee. Bivhili i ri: “Kumedzela Yehova muhwalo wau, ene u ḓo u ṱhaḓula.”​—Phisalema 55:22.

Fhedzi musi ni tshi amba na Mudzimu a no ngo tea u amba nga thaidzo dzaṋu fhedzi. Chantelle o amba uri: “Vhukonani hanga na Yehova ho vha hu sa ḓo vha havhuḓi arali ndo vha ndi tshi amba nae ndi tshi ṱoḓa thuso fhedzi. Ndi vhona u nga musi ndi tshi rabela ndi tea u thoma nga u mu livhuwa nahone zwithu zwine nda tea u zwi livhuwa zwi tea u vha zwinzhi u fhira zwithu zwine nda zwi humbela.”

Zwine na nga humbula nga hazwo: Ndi mini zwe Yehova a ni itela zwone zwine na zwi livhuwa? Naa ni nga humbula nga ha zwithu zwiraru zwe Yehova a ni itela zwone zwine na nga tama u mu livhuwa zwone ṋamusi?

“Ri tea u livhuwa Yehova na kha zwithu zwiṱukuṱuku zwi ngaho sa u vhona luvha ḽo nakaho.”​—Anita.

“Elekanyani nga ha tshithu tshavhuḓi tshe Yehova a tshi sika tshe na tshi vhona kana luṅwalo lwe lwa ni kwama nahone ni livhuwe Yehova.”​—Brian.