U swika zwino vhathu vho kundelwa u ita uri hu vhe na mulalo shangoni nahone vha ḓo bvela phanḓa vha tshi kundelwa nga nṱhani ha zwiitisi zwo vhalaho:

•   “Muthu ha na maanḓa a u langa nḓila dzawe. Ha na maanḓa a u livhisa ṋayo dzawe.” (Yeremia 10:23) Vhathu a vho ngo sikwa vhe na vhukoni kana ndugelo ya u ḓivhusa vhone vhaṋe, nga zwenezwo vha nga si kone u ita uri hu vhe na mulalo wa tshoṱhe.

•   “Ni songo fhulufhela vharangaphanḓa kana na fhulufhela murwa muthu, ane a si kone u tshidza. Muya wawe u a bva, a vhuyelela mavuni; nga ḽeneḽo ḓuvha na ngelekanyo dzawe dzi a lovha.” (Phisalema 146:3, 4) Vharangaphanḓa vha muvhuso u katela na vhane vha vha na zwiitisi zwavhuḓi, a vha koni u wana thandululo dza u fhelisa nndwa.

•   “Maḓuvhani a vhufhelo hu ḓo vha na zwifhinga zwi lemelaho zwi konḓaho u sedzana nazwo. Ngauri vhathu vha ḓo. . . ita zwa dzikhakhathi, a vha nga funi zwivhuya, vha ḓo vha vhafheṱi, vha ḓo vha na swili, vha ḓikukumusa.” (2 Timotheo 3:1–4) Ri khou tshila “maḓuvhani a vhufhelo” a ḽino shango ḽivhi nahone nḓila ine vhathu vha vha ngayo i ita uri zwi konḓe uri hu vhe na mulalo.

•   “Khombo kha ḽifhasi na lwanzhe, ngauri Diabolo o tsela henengeo kha inwi e na mbiti khulu, a tshi ḓivha uri o salelwa nga tshifhinga tshiṱuku.” (Nzumbululo 12:12) Diabolo, ane a vha swina ḽa Mudzimu o poswa kha ḽifhasi nahone u ṱuṱuwedza vhathu uri vha ite zwithu u fana nae. Musi a tshi kha ḓi vha ‘muvhusi wa ḽino shango,’ hu nga si vhe na mulalo.—Yohane 12:31

•   “[Muvhuso wa Mudzimu] u ḓo kwasha na u fhelisa yeneyi mivhuso yoṱhe [ine ya pikisa Mudzimu], wa ima u woṱhe lini na lini.” (Daniele 2:44) A hu na muṅwe muvhuso nga nnḓa ha Muvhuso wa Mudzimu une wa nga kona u ita uri hu vhe na mulalo wa tshoṱhe shangoni.—Phisalema 145:16.