Ndo bebelwa na u alutshela ḓoroboni ya Rome, fhethu hu ne ha dzula vhashayi. Vhutshilo ho vha hu tshi konḓa. A tho ngo vhuya nda ḓivha mme anga vha vhukuma nahone ndo vha ndi si na vhushaka havhuḓi na khotsi anga. Ndo aluwa ndi tshi ḓivha matshilele a tshiṱaraṱani.

Musi ndi na miṅwaha ya fumi, ndo vha ndo no thoma u tswa. Ndi na miṅwaha ya 12, ndo shavha hayani lwa u tou thoma. Kha zwiitea zwinzhi, khotsi anga vho vha vha tshi ḓa u ndzhia ofisini khulwane dza mapholisa nahone vha nnyisa hayani. Ndo vha ndi tshi hanedzana na vhathu tshifhinga tshoṱhe—ndo vha ndi na dzikhakhathi nahone ndo sinyutshela shango ḽoṱhe. Musi ndi na miṅwaha ya 14, ndo ṱuwa hayani lwa tshoṱhe. Ndo thoma u daha zwidzidzivhadzi nahone nda dzula tshiṱaraṱani. Ngauri ndo vha ndi si na fhethu ha u eḓela, ndo vha ndi tshi pwasha goloi nda eḓela nga ngomu hayo u swika ḽi tshi tsha. Nga zwenezwo, ndo vha ndi tshi ṱoḓa fhethu hu ne ha vha na maḓi uri ndi kone u ṱamba.

Ndo vha makone wa u tswa tshiṅwe na tshiṅwe, u bva kha u dzhavhula bege, u tswa dzifuletheni na miḓini vhusiku. Ndo thoma u vha na phungo i si yavhuḓi nahone nga u ṱavhanya nda rambiwa uri ndi vhe muṅwe wa tshigwada tshi re na bvumo ḽivhi, zwe zwa ita uri ndi vhe na tshibuli tsha u tswa dzibanngani. Nga nṱhani ha uri ndo vha ndi na vhuhali, nga u ṱavhanya ndo vha muraḓo wa tshigwada a ṱhonifhiwaho. Ndo vha ndi sa tshimbili ndi si na tshigidi tshanga; nga zwenezwo, ndo vha ndi tshi eḓela ndo tshi siamela. Vhuvemu, zwidzidzivhadzi, luambo lu songo kunaho na vhuḓifari vhu si havhuḓi, zwo vha matshilele anga. Mapholisa vho vha vha tshi dzula vha tshi khou nṱoḓa. Ndo farwa lunzhi, nahone ndo fhedza miṅwaha minzhi ndi tshi sokou farwa ndi tshi vhuya.

Kha tshiṅwe tshiitea musi ndi tshi bva dzhele, ndo humbula u dalela mmane wanga. Ndo vha ndi sa zwi ḓivhi uri mmane wanga na vhana vhavho vho no vha Ṱhanzi dza Yehova. Vho  nkhumbela uri ndi ye navho miṱanganoni ya Dziṱhanzi. Nga nṱhani ha u ṱoḓa u ḓivha, ndo mbo ḓi ṱuwa navho. Musi ri tshi swika Holoni ya Muvhuso, ndo kombetshedza u dzula tsini na muṋango uri ndi kone u vhona vhane vha dzhena na u bva. Ndo vha ndi na tshigidi tshanga.

Wonoyo muṱangano wo shandula vhutshilo hanga. Ndo vha ndi tshi humbula uri ndi nga vha ndi kha ḽiṅwe shango. Vhathu vho nndumelisa nga lufuno, vhukonani na zwifhaṱuwo zwo takalaho. Ndi kha ḓihumbula zwavhuḓi vhuthu na lufuno zwe zwa sumbedzwa nga Dziṱhanzi. Zwenezwo zwo vha zwi sa fani na zwe nda vha ndo zwi ḓowela!

Ndo thoma u guda Bivhili na Dziṱhanzi. Musi ndi tshi bvela phanḓa na u guda, ndo thoma u shandula matshilele anga nga ho fhelelaho. Ndo tevhela nyeletshedzo yo ṅwalwaho kha Mirero 13:20 ine ya ri: “Mu-endelana-na-vhaṱali u a ṱalifha-vho; mu-konana-na-tsilu u ḓo tambula-vho.” Ndo zwi ṱhogomela uri ndi fanela u sendela kule na tshenetsho tshigwada. Zwo vha zwi songo leluwa u ita nga u ralo, fhedzi nga thuso ya Yehova ndo zwi kona.

Ndo dovha nda ḓikunakisa nga lwa ṋama. Nda ita vhuḓidini vhuhulu ha u litsha u daha sigareṱe na u shumisa zwidzidzivhadzi. Ndo gera mavhudzi anga malapfu, nda bvula zwiṅina zwanga nahone nda litsha u amba luambo lu songo kunaho. Lwa u tou thoma vhutshiloni hanga, ndo kona u langa zwiito zwanga.

Ndo vha ndi sa takaleli u vhala na u guda, nga zwenezwo, zwo vha zwi khaedu u livhisa ṱhogomelo na u shumisa zwe nda zwi vhala kha pfunzo ya Bivhili. Naho zwo ralo, samusi ndo ita vhuḓidini, ndo thoma u funa Yehova nga zwiṱuku nga zwiṱuku nahone ha vha na tshanduko kha nṋe—luvalo lwanga lwo thoma u nndina. Kanzhi ndo vha ndi na maḓipfele a si avhuḓi nga ha nṋe muṋe, ndi tshi timatima uri Yehova a nga si vhuye a nkhangwela kha zwithu zwivhi zwe nda vhuya nda zwi ita. Nga zwenezwo zwifhinga, ndo khuthadzwa nga u vhala nga ha Yehova musi a tshi hangwela Khosi Davida nga murahu ha u ita tshivhi tshihulwane.—2 Samuele 11:1–12:13.

Iṅwe khaedu yo vha i ya u vhudza vhaṅwe nga ha lutendo lwanga vhuḓinḓani ha nnḓu nga nnḓu. (Mateo 28:19, 20) Ndo vha ndi tshi ofha uri ndi nga ṱangana na muthu we nda mu pfisa vhuṱungu kana u mu khakhela nga iṅwe nḓila tshifhingani tsho fhiraho! Nga zwiṱuku nga zwiṱuku ndo kona u kunda nyofho yanga. Ndo thoma u wana dakalo ḽihulu ḽa u thusa vhaṅwe u guda nga ha Khotsi ashu wa ṱaḓulu, ane a hangwela zwihulu.

U guda nga ha Yehova zwo tshidza vhutshilo hanga! Vhunzhi ha khonani dzanga dza kale dzo fa kana dzi dzhele, fhedzi ndi tshila vhutshilo vhu takadzaho vhukuma nahone ndi na vhumatshelo he nda vhu lavhelela. Ndo guda u ḓiṱukufhadza na u thetshelesa na u langa mbiti dzanga. Nga zwenezwo, ndi ḓiphina nga vhushaka ha khwine na vhathu vho ntangaho. Ndi mbinganoni yavhuḓi na mufumakadzi wanga wa u naka Carmen. Roṱhe ri takalela u thusa vhaṅwe u guda Bivhili.

Zwino ndi ita mushumo u fulufhedzeaho—une nga zwiṅwe zwifhinga wa katela dzibannga, nṱhani ha u tswa ndi vho dzi kunakisa!