Iṅwe Nḓila Ine Vhakriste Vha Nga Sumbedza Ngayo Vhuthu
KHA iṅwe ḓoroboni ṱhukhu ya ngei Gujarat kha ḽa India, khotsi a John vho lovhedzwa sa muṅwe wa Ṱhanzi dza Yehova mafheloni a vho-1950. John, vharathu vhawe vhavhili, khaladzi dzawe tharu u katela na mme awe, vho vha vhe miraḓo i fulufhedzeaho ya Kereke ya Katolika nahone vho vha vha tshi hanedza lutendo lwa khotsi avho.
Ḽiṅwe ḓuvha, khotsi a John vho humbela John uri a ise fulobo kha khonani yavho tshivhidzoni. Naho zwo ralo, nga eneo matsheloni, John o ḓihuvhadza musi a tshi khou lingedza u vula thini khulwane ya fagi. Nga nṱhani ha uri o vha a tshi ṱoḓa u thetshelesa khotsi awe, o pomba muṅwe wawe we wa vha u tshi khou nzuruma malofha nga labi nahone a ṱuwa nga milenzhe a isa fulubo.
Musi John a tshi swika he a vha o rumiwa hone, o wana mufumakadzi wa munna we a vha o rumiwa khae, we na ene a vha e Ṱhanzi ya Yehova nahone onoyo mufumakadzi o ṱanganedza yeneyo fulobo. O ṱhogomela uri John o huvhala munwe nahone a humbela u mu thusa. O bvisa kubogisi kwa vhuimo ha shishi, a mu ṱanzwa mbonzhe nga mushonga nahone a mu banditsha. Nga murahu, a itela John tie, nga tshenetsho tshifhinga o vha a tshi khou amba nae nga nḓila ya vhuthu nga ha Bivhili.
Nga tshenetsho tshifhinga, vengo ḽe a vha e naḽo kha Dziṱhanzi ḽo vha ḽi tshi vho thoma u fhungudzea, nga zwenezwo, John a vhudzisa nga ha zwithu zwivhili zwo fhambanaho na zwine khotsi awe vha zwi tenda na zwine a zwi tenda—o vhudzisa arali Yesu e Mudzimu, na uri zwo tea naa uri Vhakriste vha rabele kha Maria. Nga nṱhani ha uri onoyo mufumakadzi o vha a tshi ḓivha Lugujarati lwe lwa vha lu luambo lwa John, o kona u mu fhindula zwi tshi bva Bivhilini nahone a mu ṋea tshibugwana tshine tsha ri “This Good News of the Kingdom.”
Musi John a tshi vhala tshenetsho tshibugwana, o vhona u nga ndi hone a tshi khou tou thoma u pfa ngoho i re Bivhilini. O ya kha mufunzi wawe nahone a mu vhudzisa mbudziso mbili dze a dzi vhudzisa u ḽa mufumakadzi. Mufunzi o sinyuwa nahone a mu posa nga Bivhili, a zhamba a ri: “No no vha Sathane! Ntsumbedzeni Bivhilini fhethu he ha ṅwalwa uri Yesu a si Mudzimu. Ntsumbedzeni he ha ṅwalwa uri a ro ngo fanela u gwadamela Maria. Ntsumbedzei!” John o mangadzwa nga vhuḓifari ha mufunzi nahone a mu vhudza uri, “Ndi nga si tsha dovha nda lu vhea kerekeni ya Katolika.” Nahone ho ngo tsha dovha a lu vhea!
John o thoma u guda na Dziṱhanzi, a imela vhurabeli ha ngoho nahone a thoma u shumela Yehova. Nga u ya ha tshifhinga, miṅwe miraḓo ya muṱa wa hawe yo thoma u ita zwi fanaho. Na ṋamusi John u kha ḓi vha na vhadzi kha munwe wa tshanḓa tsha u ḽa he a ḓihuvhadza hone miṅwahani ya 60 yo fhiraho. U kha ḓi humbula nḓila ya vhuthu ha Vhukriste ye a farwa ngayo nahone zwenezwo zwo ita uri a vhe kha vhurabeli ho kunaho.—2 Vhakor. 6:4, 6.