“Dzenedzo Ṱhanzi dzo vha dzi tshi sumbedza vhuthu kha vhathu na kha mmbwa dzanga. Ḽiṅwe ḓuvha, Elaine we a vha o ima tsini na tshigariki, o ṋea mmbwa dzanga zwiḽiwa. U bva tsheetsho musi ri tsini na zwigariki, mmbwa dzanga dzo vha dzi tshi ṱoḓa u ya kha Dziṱhanzi uri dzi wane zwiḽiwa.

“Ho fhela miṅwedzi ndi tshi ḓi haseledzanyana na Dziṱhanzi, ngeno mmbwa dzanga dzi tshi khou ḓi fhiwa zwiḽiwa. Fhedzi ndo vha ndi sa ṱoḓi u tou ambesa navho. Ndo vha ndi na miṅwaha i fhiraho 70 nahone ndi sa ḓivhi zwine Ṱhanzi dza tenda khazwo. Ndo vhona zwi khwine u tou ḓivhalela Bivhili nga nṋe muṋe ngauri ndo vha ndo kulwa nungo nga zwe nda zwi vhona dzikerekeni.

“Nga tshenetsho tshifhinga ndo vha ndi tshi vhona dziṅwe Ṱhanzi vho ima na zwigariki tsini na henefho hune nda dzula hone. Na vhone vho vha vha tshi takalela vhathu. Tshifhinga tshoṱhe vho vha vha tshi mphindula vha tshi shumisa Bivhili nahone zwenezwo zwo ita uri ndi vha fhulufhele nga ho engedzeaho.

“Ḽiṅwe ḓuvha Elaine o mmbudzisa uri: ‘Naa vha a tenda uri zwifuwo ndi tshifhiwa tshi bvaho kha Mudzimu?’ Nṋe nda ri: ‘Ee, ndi a tenda.’ Elaine a mmbalela Yesaya 11:6-9. Zwenezwo zwo ita uri ndi ṱoḓe u guda Bivhili. Fhedzi ndo vha ndi sa athu u ṱoḓa u vhala bugu dza Dziṱhanzi.

“Kha maḓuvha a tevhelaho, Elaine na munna wawe Brent, vho vha vha tshi mmbudza mafhungo avhuḓi a re Bivhilini, fhedzi ro vha ri sa ambi tshifhinga tshilapfu. Vho mmbudza uri ndi vhale Mateo u ya kha Mishumo uri ndi kone u pfesesa zwine Mukriste wa vhukuma a vha zwone. Nda zwi ita. Hu sa athu u fhela tshifhinga tshilapfu, ndo tenda u gudiswa Bivhili nga Brent na Elaine. Ho vha hu vhukati ha ṅwaha wa 2016.

“Ndo vha ndi tshi takalela u gudiswa Bivhili vhege iṅwe na iṅwe na u ya miṱanganoni. Zwo ntakadza u guda zwine Bivhili ya zwi funza. Ndo mbo ḓi lovhedzwa nga murahu ha ṅwaha. Zwino ndi na miṅwaha ya 79 nahone ndi livhuwa uri ndo wana vhurereli ha ngoho. Yehova o mphaṱutshedza nga u tenda ndi tshi vha mushumeli wawe.”