Zwiṅwe zwifhiwa ndi zwa ndeme ngauri ri vha ro ṋewa nga muthu wa vhuimo ha nṱha kana muthu ane ra mu ṱhonifha vhukuma. Naho zwiṅwe zwifhiwa zwi sa ḓuri, ri a zwi dzhiela nṱha ngauri ri vha ro ṋewa nga muraḓo wa muṱa ane ra mu funa kana khonani ine ra i fulufhela. Zwo vha zwo tou ralo na kha tshifhiwa tshe Russell a tshi ṋea Jordan, we ra haseledza nga hae kha thero yo fhiraho. Zwenezwi zwi shuma hani kha tshifhiwa tsha tshirengululi?

Tsha u thoma, Bivhili i amba uri “Mudzimu o ruma Murwa wawe mubebwa e eṱhe shangoni uri ri kone u wana vhutshilo ngae.” (1 Yohane 4:9) Zwenezwo zwi ita uri tshenetshi tshifhiwa tshi vhe tsha ndeme vhukuma. A hu na muthu a re na maanḓa u fhira Mudzimu. Mupsalme wa Muheberu o ṅwala zwi tevhelaho nga ha Mudzimu: “Dzina ḽau ḽi pfi Yehova, Wa-Ṱaḓulu-ṱaḓulu. Mashangoni oṱhe ndi Iwe u woṱhe.” (Psalme ya 83:18) A hu na muthu wa vhuimo ha nṱha ane a nga kona u ri ṋea tshifhiwa u fhira Mudzimu.

Tsha vhuvhili, Mudzimu ndi “Khotsi-ashu.” (Yesaya 63:16) Nga nḓila-ḓe? O ri ṋea vhutshilo. Zwiṅwe hafhu, u a ri ṱhogomela u fana na khotsi o ḓiimiselaho u ṱhogomela vhana vhawe. Musi Mudzimu a tshi khou amba na vhaṅwe vhathu vhawe vha kale sa Efuraimi, o vhudzisa uri: “Naa Efuraimi a si ene murwamufunwa wanga naa! na ṇwana’nga a takadzaho! . . . Ndi zwone zwe mbilu yanga ya swa ngazwo’, nda mu khathutshela lwa u khathutshela.” (Yeremia 31:20) Mudzimu u ḓipfa nga  nḓila i fanaho nga vhagwadameli vhawe ṋamusi. Ha sokou vha Musiki washu ramaanḓaoṱhe, fhedzi u dovha a vha Khotsi ashu na Khonani yashu i fulufhedzeaho. Naa zwenezwo a zwi iti uri tshifhiwa tshiṅwe na tshiṅwe tshi bvaho khae tshi vhe tsha ndeme vhukuma?

Zwiṅwe zwifhiwa ndi zwa ndeme ngauri muṋei wazwo u ri ṋea nga u ḓifunela, a sa kombetshedzwi. Muṋei a si na tseḓa ha lavheleli u wana zwiṅwe zwithu murahu.

Mudzimu o ri ṋea Murwa wawe ngauri u a ri funa. Bivhili i ri: “Ro dzumbululelwa lufuno lwa Mudzimu nga yeneyi nḓila, ngauri Mudzimu o ruma Murwa wawe mubebwa e eṱhe.” Ndi ngani o ita zwenezwi? “Uri ri kone u wana vhutshilo ngae.” (1 Yohane 4:9) Naa Mudzimu o vha a tshi kombetshedzea u ita nga u ralo? Na khathihi! “Tshirengululi tsho lifhiwaho nga Kristo Yesu” tshi sumbedza ‘vhuthu vhuhulu’ ha Mudzimu.—Vharoma 3:24.

Ndi ngani tshifhiwa tsha Mudzimu tshi ‘vhuthu vhuhulu’? Bivhili i ri: “Mudzimu o ri sumbedza lufuno lwawe, ngauri musi ri tshi kha ḓi vha vhaitazwivhi, Kristo o ri fela.” (Vharoma 5:8) Lufuno lu si lwa tseḓa lwo ṱuṱuwedza Mudzimu uri a thuse vhathu samusi vho kulea nungo nahone vhe na tshivhi. Tshenetshi tshifhiwa a ro ngo tshi shumela nahone ri nga si kone u mu lifhela. Tshenetshi tshifhiwa tshi sumbedza nḓila khulwane ine a ri funa ngayo.

Zwiṅwe zwifhiwa ndi zwa ndeme ngauri zwi sumbedza u ḓidzima huhulu ha muṋei wazwo. Musi muthu o ḓiimisela u ri ṋea tshithu tshine tsha vha tsha ndeme khae, tshenetsho tshifhiwa ri a dzhiela nṱha vhukuma.

Mudzimu o “kumedza Murwa wawe mubebwa e eṱhe.” (Yohane 3:16) Ho vha hu si na we a vha a tshi nga vha o mu kumedza u fhira Yesu. Miṅwahani minzhi-minzhi ye Mudzimu a i fhedza a tshi khou sika fhethu hoṱhe, Yesu o shuma nae nahone Mudzimu a mu ‘takalela.’ (Mirero 8:30) Yesu ndi “Murwa [wa Mudzimu] ane a mu funa” nahone ndi “tshifanyiso tsha Mudzimu a sa vhonali.” (Vhakolosa 1:13-15) Yesu na Mudzimu vha na vhushaka ha tsini vhukuma.

Naho zwo ralo, Mudzimu ho ngo ri tshivha “Murwa wawe.” (Vharoma 8:32) Yehova o ri ṋea zwa khwinesa. Kha zwifhiwa zwoṱhe, a huna tshifhiwa tshi fhiraho tshe a ri ṋea tshone.

Zwiṅwe zwifhiwa ndi zwa ndeme ngauri zwi vha zwi zwithu zwine ra zwi shaya na zwine ra zwi ṱoḓa nga tshenetsho tshifhinga. Sa tsumbo, arali ha nga vha na muthu ane a nga ni badelela tshelede ya ngalafho ine na si kone u i badela, no vha ni tshi ḓo mu livhuwa vhukuma! A zwi timatimisi uri tshenetsho tshifhiwa tsho vha tshi tshi ḓo vha tshi tsha ndeme.

“Samusi roṱhe ri tshi fa nga mulandu wa Adamu, roṱhe ri ḓo vuswa nga nṱhani ha Kristo.” (1 Vhakorinta 15:22) Sa vhaḓuhulu vha Adamu, roṱhe ri a “fa,” a ri koni u thivhela malwadze na lufu kana u ḓipfumedzanya na Mudzimu. Nahone samusi ri vhathu vha songo fhelelaho, a ri koni u ḓitshidza kana u tshidza vhaṅwe. Bivhili i ri: “Huufha mukomana á sa koni u tshidza murathu, hú si na muthu ané a pfumedzanya muthu muṅwe na Mudzimu! A huna tshipfumelelo tsho eḓanaho u rengulula muya wawe; ndi zwiné a zwi litsha tshoṱhe.” (Psalme ya 49:7, 8) Ri ṱoḓa thuso ngauri ri nga si kone u ḓirengulula. Nga riṋe vhane, a hu na zwine ra nga zwi kona.

Nga nṱhani ha uri Yehova u a ri funa, o ita ndugiselelo ine ya ḓo tshidza vhutshilo hashu, uri ‘roṱhe ri vuswe’ nga nṱhani ha Yesu. Tshirengululi tshi khunyeledza hani zwenezwi? “Malofha a Yesu Murwa wawe a ri  ṱanzwa kha zwivhi zwoṱhe.” U vha na lutendo kha malofha a Yesu o shululwaho, zwi ita uri ri kone u hangwelwa zwivhi zwashu na u wana vhutshilo vhu sa fheli. (1 Yohane 1:7; 5:13) Ndi mini zwine tshirengululi tsha ḓo zwi itela vhafunwa vhashu vho faho? “Samusi lufu lwo vha hone nga muthu, na mvuwo ya vhafu yo vha hone nga muthu [Yesu].”—1 Vhakorinta 15:21. *

A hu na tshifhiwa tshe tsha vhuya tsha ṋekedzwa kana u ṱuṱuwedzwa nga lufuno u fhira tshiṱhavhelo tsha Yesu. A hu na we a vhuya a ri ṋea zwithu zwinzhi u fana na zwe Yehova Mudzimu a ri ṋea zwone. Nahone a hu na tshifhiwa tshine tsha swikelela zwine ra zwi shaya u fhira tshiṱhavhelo tsha Yesu tshine tsha ri vhofholola kha tshivhi na lufu. A hu na tshifhiwa tshine tsha nga vhambedzwa na tshirengululi.