Mudzimu a nga ni thusa uri ni si vhenge vhaṅwe. Muya wawe mukhethwa u nga ri thusa uri ri vhe vhathu vhavhuḓi, zwe ra vha ri sa ḓo zwi kona nga riṋe vhaṋe. Ndi zwavhuḓi uri ri ḓitike nga Mudzimu uri a ri thuse uri ri si vhenge vhaṅwe, nṱhani ha u ḓitika nga riṋe vhaṋe. Arali ra ita nga u ralo, ri nga ḓipfa u fana na muapostola Paulo we a ri: “Ngauri zwoṱhe ndi zwi koniswa nga ane a nṋea maanḓa.” (Vhafilipi 4:13) Ri ḓo kona u amba uri: “Thuso yanga i bva kha Yehova.”—Phisalema 121:2.

Humbelani Yehova nga thabelo uri a ni ṋee muya wawe mukhethwa. (Luka 11:13) Ni mu humbele uri a ni thuse uri ni vhe muthu wavhuḓi. Gudani Bivhilini nga ha zwithu zwi ngaho lufuno, mulalo, u sa fhela mbilu na u ḓifara, zwi ḓo ni thusa uri ni si vhenge vhaṅwe. Wanani nḓila dza u sumbedza zwenezwi zwithu. Nahone ni vhe na khonani dzine dza sumbedza zwenezwo zwithu. Vha ḓo ni thusa uri ni ‘fune vhaṅwe na u ita mishumo mivhuya.’—Vhahevheru 10:24.