TSHIFHINGANI TSHASHU HO ITWA ṰHOḒISISO NNZHI NGA HA VHUṰUNGU VHUNE MUTHU A VHU PFA MUSI O LOVHELWA. Samusi zwo sumbedzwa kha thero dzo fhiraho, kanzhi vhulivhisi vhune vhaḓivhi vha amba vhu tendelana na zwine bugu ya vhuṱali Bivhili ya amba. Zwenezwi zwi sumbedza uri vhulivhisi vhu re Bivhilini a vhu fhelelwi nga tshifhinga. Fhedzi Bivhili a i sokou vha na vhulivhisi vhune ra nga vhu fhulufhela. I na mafhungo a sa wanali huṅwe fhethu ane a khuthadza vho lovhelwaho.

• I khwaṱhisedza uri vhafunwa vhashu vho lovhaho a vha khou pfa vhuṱungu

  Kha Muhuweleli 9:5, Bivhili i ri: “Vho faho a vha ḓivhi tshithu.” ‘Ngelekanyo dzavho dzi a lovha.’ (Phisalema 146:4) U tendelana na zwenezwo, Bivhili i vhambedza lufu na u eḓela.​—Yohane 11:11.

• I ri khuthadza nga u ita uri ri tende uri mudzimu u a ri funa

  Kha Phisalema 34:15 Bivhili i ri: “Maṱo a Yehova a a sedza vho lugaho, nḓevhe dzawe dzi thetshelesa vhane vha ṱoḓa thuso.” U amba na Yehova nga thabelo, zwi ri khuthadza u fhira u amba na muṅwe muthu kana u langa mahumbulele ashu riṋe vhaṋe. Zwi ri thusa u fhaṱa vhushaka hashu na musiki washu ane a nga shumisa maanḓa awe u ri khuthadza.

• I ri fhulufhedzisa vhumatshelo havhuḓi

  Kha ri humbule nga vhumatshelo havhuḓi, hune vhoṱhe vha re mavhiḓani vha ḓo vuswa vha tshila kha ḽifhasi. Bivhili i amba nga ha tshenetsho tshifhinga lunzhi lunzhi. Bivhili i ri vhudza uri ḽifhasi ḽi ḓo vha ḽi hani nga tshenetsho tshifhinga. I ri Mudzimu “u ḓo phumula miṱodzi yoṱhe maṱoni avho, lufu a lu tsha ḓo vha hone, u ṱungufhala, u lila na vhuṱungu a zwi tsha ḓo vha hone.”​—Nzumbululo 21:3, 4.

Vhanzhi vhane vha tenda kha Yehova Mudzimu wa Bivhili vha a kona u konḓelela vhuṱungu ha u lovhelwa na u vha na fhulufhelo ḽa uri vha ḓo dovha vha vhona vhafunwa vhavho. Sa tsumbo, Vho Ann vhe vha lovhelwa nga mukalaha wavho we a vha e na miṅwaha ya 65 vha ri: “Bivhili i nkhwaṱhisedza uri vhafunwa vhashu vho lovhaho a vha khou pfa vhuṱungu na uri Mudzimu u ḓo vusa vhoṱhe vha re khumbuloni yawe. Zwenezwi zwi dzulela u ḓa muhumbuloni wanga musi ndi tshi humbula nga ha u xelelwa hanga. Zwi nthusa u konḓelela zwithu zwi vhavhaho vhukuma zwe zwa vhuya zwa itea kha nṋe.”

Vho Tiina vhe vha ambiwa kha thero dzo fhiraho vha ri: “U bva tshe Timo a lovha, ndo pfa Mudzimu a tshi khou ntikedza. Ndo pfa tshanḓa tsha Yehova tshi tshi khou nthusa musi ndo tsikeledzea. Fhulufhelo ḽa mvuwo ḽi re Bivhilini ndi ḽa vhukuma kha nṋe. Ḽi a nkhwaṱhisa uri ndi bvele phanḓa u swika ḓuvha ḽine nda ḓo dovha nda vhona Timo.”

Yeneyi ndi nḓila ine vhathu vha dzimiḽioni vhane vha tenda kha Bivhili vha ḓipfa ngayo. Arali ni tshi pfa u nga zwine Bivhili ya amba zwi nga si konadzee kana u sokou vha muḽoro, itani ṱhoḓisiso inwi muṋe u itela u vhona uri zwine Bivhili ya amba na zwine ya fhulufhedzisa zwi a pfala. Ni ḓo wana uri Bivhili ndi yone ine ya nga thusa vhathu vho lovhelwaho nga nḓila ya khwiṋe na u fhirisa.

Ṱalelani vidio dzi ambaho nga ha enea mafhungo kha website yashu ya jw.org.

 VHUIMO HA VHAFU NDI VHUFHIO?

NAA NI NGA TAKALELA MAFHUNGO MAḒIFHA?