Musi Yesu a sa athu fa, o ḓivhadza a ri: “Mafhungo-maḓifha aya a muvhuso wa ṱaḓulu a ḓo ḓivhadzwa mashangoni oṱhe, uri a vhe thovhedzo kha dzitshakha dzoṱhe. Ndi hone hu tshi ḓo ḓa vhufhelo.” (Mateo 24:14) Fhedzi wonoyu mushumo wa u huwelela shangoni ḽoṱhe u ḓo khunyeledzwa hani? Nga u tevhela tsumbo yo vhewaho nga Yesu musi a tshee kha ḽifhasi?—Luka 8:1.

Ri lingedza u amba na vhathu mahayani avho. Yesu o gudisa vhafunziwa vhawe u huwelela mafhungo maḓifha nnḓu nga nnḓu. (Mateo 10:11-13; Mishumo 5:42; 20:20) Vhenevho vhaevangeli vha ḓanani ḽa u thoma ḽa miṅwaha vho vha vho avhelwa fhethu he vha vha vha tshi ḓo huwelela hone. (Mateo 10:5, 6; 2 Vha-Korinta 10:13) Nga hu fanaho ṋamusi, mushumo washu wa u huwelela wo dzudzanywa zwavhuḓi nahone tshivhidzo tshiṅwe na tshiṅwe tshi avhelwa tsimu ine tsha tea u i ṱanganya. Hezwi zwi ita uri ri kone u khunyeledza ndaela ya Yesu ya “u huwelela kha vhathu na u vha ṱanzielela nga maanḓa.”—Mishumo 10:42.

Ri lwela u swikelela vhathu hu sa londwi hune vha nga wanala hone. Yesu o dovha a vhea tsumbo nga u huwelela fhethu ha vhomuthumunzhi, fhethu hu ngaho khunzi-khunzini ya lwanzhe kana tshisimani tsha tshitshavha. (Marko 4:1; Yohane 4:5-15) Na riṋe ri amba na vhathu nga ha Bivhili huṅwe na huṅwe—zwiṱaraṱani, fhethu ha mabindu, dziphakhani kana nga luṱingo. Ri dovha ra ṱanziela vhahura vhashu, vhane ra shuma navho, vhane ra dzhena navho kilasini na mashaka musi ri tshi wana tshibuli tsho teaho. Honovhu vhuḓidini hoṱhe ho ita uri vhathu vha dzimilioni ḽifhasini ḽoṱhe vha pfe mafhungo maḓifha a u “tshidza hawe.”—Psalme ya 96:2.

Naa hu na muthu ane na nga ṱoḓa u mu vhudza mafhungo maḓifha a Muvhuso wa Mudzimu na zwine eneo mafhungo a zwi amba nga ha vhumatshelo hawe? Ni songo dzula na wonoyu mulaedza wa fulufhelo. U vhudzeni vhaṅwe nga u ṱavhanya nga hune na nga kona ngaho.

• Ndi afhio “mafhungo maḓifha” ane a tea u ḓivhadzwa?

• Ṱhanzi dza Yehova vha khou edzisa hani tsumbo ya Yesu ya u huwelela?