Evangeli Ya Yohane 15:1-27
15 “Nṋe ndi munḓirivhe wa vhukuma, mulimi ndi Khotsi anga.
2 Khotsi u rema tavhi ḽi re kha nṋe ḽi sa aṋwiho mitshelo, ḽi aṋwaho mitshelo u a ḽi khwathela,* uri ḽi kone u aṋwa mitshelo minzhi.+
3 Inwi no no khwathelwa nga zwe nda ni vhudza.+
4 Dzulani ni na vhuthihi na nṋe, na nṋe ndi ḓo dzula ndi na vhuthihi na inwi. Samusi tavhi ḽi sa koni u aṋwa mitshelo arali ḽo remiwa kha munḓirivhe, na inwi ni nga si aṋwe mitshelo arali ni si na vhuthihi na nṋe.+
5 Ndi nṋe munḓirivhe; inwi ni matavhi. Ane a dzula e na vhuthihi na nṋe, na nṋe ndi na vhuthihi nae, onoyo u aṋwa mitshelo minzhi;+ ngauri a hu na tshine na nga tshi ita arali ni si na vhuthihi na nṋe.
6 Ane a si dzule e na vhuthihi na nṋe, u a laṱwa sa tavhi ḽo omaho. Vhathu vha kuvhanganya eneo matavhi vha a posa muliloni a swa.
7 Arali na dzula ni na vhuthihi na nṋe, na dzula ni tshi humbula zwe nda ni vhudza, zwine na zwi tama ni ḓo zwi wana.+
8 Khotsi anga u a huliswa musi ni tshi dzula ni tshi aṋwa mitshelo minzhi na u sumbedza uri ni vhafunziwa vhanga.+
9 Samusi Khotsi anga o mpfuna+ na nṋe ndo ni funa; dzulani ni tshi ita zwine nda zwi funa.
10 Arali ni tshi tevhedza milayo yanga, ndi ḓo dzula ndi tshi ni funa, vhunga na nṋe ndo tevhedza milayo ya Khotsi, a ḓi dzula a tshi mpfuna.
11 “Ndo ni vhudza zwenezwi zwithu uri ni takale samusi na nṋe ndo takala.+
12 Hoyu ndi mulayo wanga, wa uri ni funane vhunga na nṋe ndo ni funa.+
13 A hu na a re na lufuno lu fhiraho lwa ane a fela* khonani dzawe.+
14 Ni khonani dzanga arali ni tshi ita zwine nda ni vhudza.+
15 A thi tsha ri ni vhalanda, ngauri mulanda ha ḓivhi zwine muṋe wawe a zwi ita. Fhedzi ni khonani dzanga, ngauri ndo ni vhudza zwoṱhe zwe nda zwi pfa kha Khotsi anga.
16 A si inwi we na nnanga, nṋe ndo nanga inwi, ndo ni vhea uri ni dzule ni tshi aṋwa mitshelo na uri i dzule i hone, uri Khotsi a ni ṋee zwine na humbela dzinani ḽanga.+
17 “Ndo ni vhudza zwenezwi, uri ni funane.+
18 Arali shango ḽi tshi ni vhenga, ni ḓivhe uri ḽo thoma ḽa vhenga nṋe ḽi sa athu u ni vhenga.+
19 Arali ni vhe ni tshipiḓa tsha shango, shango ḽo vha ḽi tshi ḓo funa vha re vhaḽo. Zwino a ni tshipiḓa tsha shango,+ ngauri nṋe ndo ni nanga khaḽo, ndi ngazwo shango ḽi tshi ni vhenga.+
20 Ni humbule zwe nda ni vhudza nda ri: Mulanda ha fhiri muṋe wawe. Arali vho ntovhola, na inwi vha ḓo ni tovhola,+ arali vho tevhedza zwe nda zwi amba, vha ḓo tevhedza na zwine na ḓo zwi amba.
21 Fhedzi vha ḓo ni ita zwenezwi zwoṱhe nga nṱhani ha dzina ḽanga, ngauri a vha ḓivhi We a nthuma.+
22 Arali ndi vhe ndi songo ḓa nda amba navho, vho vha vha tshi ḓo vha vhe si na tshivhi.+ Fhedzi zwino a vha koni u ḓiimelela kha zwivhi zwavho.+
23 Ane a mmbenga u vhenga na Khotsi anga.+
24 Arali ndi vhe ndi songo ita mishumo i songo itwaho nga muṅwe muthu, vho vha vha tshi ḓo vha vhe si na tshivhi;+ fhedzi vho mmbona na u vhenga nṋe na Khotsi anga.
25 Fhedzi hu khou itea zwo ṅwaliwaho Mulayoni wavho, zwine zwa ri: ‘Vho mmbenga ndi si na mulandu.’+
26 Musi muthusi ane nda ḓo ni rumela ene a tshi ḓa a tshi bva kha Khotsi, ane a vha muya mukhethwa une wa dzumbulula ngoho,+ u bvaho kha Khotsi, onoyo u ṱanziela nga ha nṋe;+
27 na inwi ni ḓo ṱanziela nga ha nṋe,+ ngauri no vha ni na nṋe u bva mathomoni.
Ṱhaluso dzi re magumoni a siaṱari
^ Thevhedz., “u a ḽi kunakisa.”
