Evangeli Ya Marko 12:1-44
12 A amba navho nga zwifanyiso, a ri: “Muṅwe munna o vha o ṱavha minḓirivhe+ tsimuni yawe, a ita luhura u mona nayo, a bwa hune ha sukelwa hone nḓirivhe, a fhaṱa mutsheṱo;+ a ri vhalimi vha i ṱhogomele, a ya shangoni ḽa kule.+
2 Musi tshifhinga tsha u fula nḓirivhe tshi tshi swika, a ruma mulanda wawe kha vhalimi uri a wane mukovhe wawe wa nḓirivhe.
3 Fhedzi vha mu fara vha mu rwa, vha mu humisa a songo fara tshithu.
4 A ruma muṅwe mulanda khavho, vha mu rwa ṱhoho vha mu shonisa.+
5 A dovha a ruma muṅwe, vha mu vhulaya, na vhaṅwe vhanzhi, vhaṅwe vha vha rwa, vhaṅwe vha vha vhulaya.
6 Muṋe wa tsimu ya minḓirivhe a ruma murwa+ wawe ane a mu funa kha vhalimi, a ri, ‘Vha ḓo ṱhonifha murwa wanga.’
7 Fhedzi vhenevho vhalimi vha amba nga tshavho vha ri, ‘Hoyu ndi ene muḽaifa.+ Kha ri mu vhulaye uri ri wane ifa ḽawe.’
8 Vha mu fara vha mu vhulaya, vha mu posela nnḓa ha tsimu.+
9 Muṋe wa tsimu ya minḓirivhe u ḓo ita mini? U ḓo ḓa a vhulaya vhenevho vhalimi, a ṋea vhaṅwe vhathu yeneyo tsimu.+
10 Naa a ni athu u vhala luṅwalo lune lwa ri: ‘Tombo ḽe ḽa laṱwa nga vhafhaṱi ḽo vha thikho ya tshifhaṱo?+
11 Naa a no ngo vhala uri ‘Ḽeneḽi tombo ḽi bva kha Yehova* na uri ḽi takadza maṱo ashu’?”+
12 Musi vha tshi pfa tshenetsho tshifanyiso, vha ṱoḓa u mu fara ngauri vho vha vha tshi zwi ḓivha uri u khou amba nga havho, fhedzi vho vha vha tshi ofha vhathu. Ngauralo, vha mu litsha vha ṱuwa.+
13 Nga murahu, vha ruma vhaṅwe Vhafarisei na vhatevheli vha Herode uri vha mu fashe nga zwine a zwi amba.+
14 Musi vha tshi swika vha ri: “Mufunzi, ri a zwi ḓivha uri a u zwifhi, a u ṱoḓi u takadza muthu, ngauri a u sedzi zwine muthu a vha zwone, u funza nḓila ya ngoho ya Mudzimu. Naa zwo tea uri ri badele Kesare muthelo?
15 Naa ri fanela u badela kana u sa badela?” Nge Yesu a vha a tshi ḓivha uri vha na muhoyo, a amba navho a ri: “Ndi ngani ni tshi nndinga? Nnḓiseleni dinari* ndi i vhone.”
16 Vha ḓisa nthihi. A vha vhudzisa a ri: “Tshifanyiso itshi na dzina iḽi ndi zwa nnyi?” Vhone vha ri: “Ndi zwa Kesare.”
17 Yesu a ri: “Kesare mu ṋeeni zwi re zwawe,+ na Mudzimu ni mu ṋee zwi re zwawe.”+ Vha tshi pfa zwenezwo vha mangala zwihulu.
18 Ha ḓa Vhasadukei vhane vha tenda uri vhathu a vha nga vuswi,+ vha ri:+
19 “Mufunzi, Mushe o ri ṅwalela uri arali munna a fa a sia mufumakadzi a si na ṅwana, murathu wawe u fanela u vhinga onoyo mufumakadzi uri a bebele mukomana wawe ṅwana.+
20 Ho vha hu na vhanna vha sumbe vha re vhana vha muthu. Wa u thoma a vhinga mufumakadzi, fhedzi a fa a si na ṅwana.
21 Wa vhuvhili a mu vhinga, fhedzi a fa a si na ṅwana, na wa vhuraru a mu vhinga na ene a fa a si na ṅwana.
22 Vhoṱhe vha sumbe vha fa vha si na ṅwana. Mafheleloni na onoyo mufumakadzi a fa.
23 Musi vhafu vha tshi vuswa, onoyo mufumakadzi u ḓo vha wa nnyi kha vhenevho vha sumbe? Ngauri vhoṱhe vho vha vho mu vhinga.”
24 Yesu a ri: “No khakha, ngauri a ni ḓivhi Maṅwalo kana maanḓa a Mudzimu.+
25 Ngauri musi vhafu vha tshi vuswa, vhanna a vha nga vhingi na vhafumakadzi a vha nga vhingwi, fhedzi vha ḓo nga vharuṅwa vha ngei ṱaḓulu.+
26 Naa a no ngo vhala buguni ya Mushe zwe zwa itea tshiṱakani tsha mipfa? Mudzimu o vha a tshi khou amba nga ha u vuswa ha vhafu musi a tshi vhudza Mushe uri: ‘Ndi nṋe Mudzimu wa Abrahamu, Mudzimu wa Isaka na Mudzimu wa Yakobo.’+
27 Ndi Mudzimu wa vha tshilaho, hu si vho faho. No khakha nga maanḓa.”+
28 Ho vha hu na muṅwe wa vhamaṅwalo henefho, we a vha o thetshelesa zwe vha vha vha tshi khou amba. Musi a tshi pfa uri Yesu o fhindula zwavhuḓi vhenevho vhanna, a mu vhudzisa a ri: “Mulayo muhulwane kha yoṱhe ndi ufhio?”+
29 Yesu a ri: “Wa u thoma uri, ‘Thetshelesa, Iwe Isiraele, Yehova* Mudzimu washu ndi Yehova e eṱhe,
30 u tea u funa Yehova* Mudzimu wau nga mbilu yau yoṱhe na nga zwoṱhe zwine wa vha zwone na nga ṱhalukanyo yau yoṱhe na nga nungo dzau dzoṱhe.’+
31 Wa vhuvhili uri, ‘U tea u funa muhura wau vhunga u tshi ḓifuna.’+ A hu na muṅwe mulayo u fhiraho yeneyi.”
32 Uḽa munna wa vhamaṅwalo a ri: “Mufunzi, wo amba ngoho, ‘Mudzimu ndi Ene e eṱhe, a hu na muṅwe nga nnḓa ha ene’;+
33 zwa ndeme u fhira zwifhiwa zwa u fhiswa na zwiṱhavhelo ndi u mu funa nga mbilu yau yoṱhe, na nga u ṱalukanya hau hoṱhe, na nga nungo dzau dzoṱhe na u funa muhura wau vhunga u tshi ḓifuna.”+
34 Musi Yesu a tshi pfa uri o fhindula zwavhuḓi, a amba nae a ri: “A u kule na Muvhuso wa Mudzimu.” Fhedzi a ho ngo tsha vha na we a vha na tshivhindi tsha u mu vhudzisa.+
35 Musi Yesu a tshi khou funza thembeleni, a ri: “Ndi ngani vhamaṅwalo vha tshi ri Kristo ndi murwa wa Davida?+
36 Musi Davida o hevhedzwa nga muya mukhethwa+ o ri, ‘Yehova* o amba na Murena wanga a ri: “Dzula thungo ya tshanḓa tshanga tsha u ḽa, u swika ndi tshi ita uri u kande maswina au.”’*+
37 Arali Davida o mu vhidza Murena, a nga vha hani murwa wawe?”+
Gogo ḽo vha ḽi tshi khou takalela u mu thetshelesa.
38 Musi a tshi khou funza a amba a ri: “Thanyelani vhamaṅwalo vhane vha funa u tshimbila vho ambara zwiambaro zwavhuḓi, na u ṱoḓa u lumeliswa mimakete,+
39 na u funa u dzula zwiduloni zwa phanḓa sinagogoni, na u dzudzwa zwiduloni zwo vhetshelwaho vhaeni vha vhuimo ha nṱha zwimimani.+
40 Vha dzhia nnḓu* dza tshilikadzi na u ita thabelo ndapfu u itela u vhonwa. Vhenevho vha ḓo wana khaṱhulo i vhavhaho vhukuma.”
41 A dzula tsini na mbulungelo ya tshelede,+ a lavhelesa nḓila ye gogo ḽa vha ḽi tshi khou dzhenisa ngayo tshelede mbulungeloni, vhapfumi vhanzhi vha tshi khou dzhenisa tshelede nnzhi.+
42 Ha ḓa tshilikadzi i shayaho ya dzhenisa zwipeni zwivhili zwi si na ndeme.*+
43 Yesu a vhidza vhafunziwa vhawe a amba navho a ri: “Ngoho ndi a ni vhudza ndi ri, heyi tshilikadzi yo bvisa u fhira vhoṱhe.+
44 Ngauri vhoṱhe vho dzhenisa vha tshi bvisa kha zwinzhi zwine vha vha nazwo, fhedzi tshilikadzi yo bvisa zwoṱhe zwe ya vha i nazwo, zwe ya vha i tshi ḓo ḓitshidza ngazwo.”+
Ṱhaluso dzi re magumoni a siaṱari
^ Sedzani Ṱhume. B14.
^ Thevhedz., “ita maswina au vhukando ha milenzhe yau.”
^ Kana “thundu.”
^ Thevhedz., “lepitoni mbili, dzine dza vha khwadirani.” Sedzani Ṱhume. B14.